આયોજન / ઉમિયાધામ સીદસર અને ગાંઠીલામાં જાણો ક્યારે યોજાશે પાટોત્સવ કાર્યક્રમ, મુખ્યમંત્રી સહિત અનેક મહાનુભાવો રહેશે ઉપસ્થિત

• સીદસર ઉમિયાધામમાં 3 એપ્રિલે પાટોત્સવ
• મુખ્યમંત્રી ભૂપેન્દ્ર પટેલ અને સી.આર.પાટીલ રહેશે ઉપસ્થિત
• ખોડલધામના ચેરમેન નરેશ પટેલને પણ આમંત્રણ 

સૌરાષ્ટ્રના સીદસર ઉમિયાધામમાં 3 એપ્રિલ રવિવારે પાટોત્સવ કાર્યક્રમ યોજાશે.  ચૈત્રી નવરાત્રિના બીજા દિવસે મા ઉમિયાનો પાટોત્સવ યોજાશે. આ ઉપરાંત ઉમિયાધામમાં સામાજિક સંમેલન પણ યોજાશે.  આ કાર્યક્રમમાં મુખ્યમંત્રી ભૂપેન્દ્ર પટેલ અને સી.આર.પાટીલ ખાસ ઉપસ્થિતિ રહેશે. આ ઉપરાંત પરસોતમ રૂપાલા અને મનસુખ માંડવીયા પણ ઉપસ્થિત રહેશે તથા પૂર્વ નાયબ મુખ્યમંત્રી નીતિન પટેલ પણ હાજર રહેશે.  તેમજ  ખોડલધામના ચેરમેન નરેશ પટેલને પણ સંમેલનમાં હાજર રહેવા આમત્રંણ અપાયું છે. 

નરેશ પટેલને પણ અપાયુ છે આમંત્રણ

મહત્વનું છે સીદસર ઉમિયાધામએ કે ઊંઝા જેવુ જ આસ્થાનું કેન્દ્ર કડવા પાટીદારોની કુળદેવીનું આસ્થાનું સ્થાન છે. સૌથી મહત્વની વાત એ છે કે ખોડલધામ ચેરમેન નરેશ પટેલને પણ આમંત્રણ આપવામાંઆવ્યુ છે. બપોર પછી સામાજિક સંમેલનનો કાર્યક્રમ છે જેમાં મુખ્યમંત્રી ભૂપેન્દ્ર પટેલ, ભાજપ પ્રદેશ પ્રમુખ સી.આર પાટીલ અને નરેશ પટેલ મંચ પર એક સાથે હાજર રહે તેવી શક્યતા દર્શાવવામાં આવી છે. જેને લઇને તૈયારીઓનો ધમધમાટ શરુ કરવામાં આવ્યો છે.પાવનભૂમિ સીદસર ખાતે બિરાજમાન કડવા પાટીદારોના કુળદેવી ઉમિયા માતાજીના સાંનિધ્યમાં તા.૯થી ૧૩ ફેબ્રુઆરી ૨૦૧૨ દરમિયાન  રજત જયંતી મહોત્સવ યોજાયો હતો. આ  ઉજવણીને દસ વર્ષ પૂર્ણ થતાં તા.૩ એપ્રિલ-૨૦૨૨ રજત જયંતી દશાબ્દી મહોત્સવ ઉજવવાનું આયોજન કરવામાં આવ્યુ છે. નવનિર્મિત ઉમિયાધામ સિદસરમાં યજ્ઞશાળા, ઉમા ભવન અતિથિ ગૃહ, ગાર્ડન, કૈલાશ ભવન મિટિંગ હોલ, ભોજનાલયનું નવીનીકરણ, લગ્નહોલનું નવીનીકરણ, કૈલાશભવન વગેરે આકર્ષણના કેન્દ્ર બની રહેશે. 

 

ઉમિયાધામ ગાંઠીલા ખાતે પણ કાર્યક્રમ

તો આ તરફ ઉમિયાધામ ગાંઠીલા ખાતે રામનવમીના દિવસે 14મો મહાપાટોત્સવનું આયોજન કરવામાં આવ્યું છે.  જેમાં સર્વ જન હિતાય અને સર્વ જન સુખાયના સૂત્રને સાર્થક કરતા વિવિધ ધાર્મિક પ્રસંગો યોજાશે. 51 કુંડી હવનથી શરુઆત થશે ત્યારબાદ આરોગ્ય કેમ્પ, મહિલા સંમેલન, સામાજિક સંમેલન પણ યોજાશે. અહી પણ સીએમ ભૂપેન્દ્ર પટેલ, સી.આર પાટીલ સહિત રાજકીય દિગ્ગજો ઉપસ્થિત રહેશે.