અમેરિકી ગુપ્તચર એજન્સી CIAનો દાવો છે કે હજુ સુધી યુક્રેન ન જીતાતા રશિયાના પ્રમુખ પુતિને યુદ્ધ જીતવા ખતરનાક નિર્ણય લીધો છે.
અમેરિકી ગુપ્તચર એજન્સી CIAનો દાવો
યુક્રેન જીતવા હવે પુતિન ગમે તે હદે જઈ શકે
આગામી દિવસમાં યુદ્ધ વધારે ખતરનાક બનશે
રશિયા અને યુક્રેન વચ્ચે યુદ્ધ વધુ ખતરનાક બની શકે છે. અમેરિકાની ગુપ્તચર એજન્સીઓ સાથે સંકળાયેલા અધિકારીઓએ આ દાવો કર્યો છે. અમેરિકાના ગુપ્તચર અધિકારીઓનું માનવું છે કે રશિયાના રાષ્ટ્રપતિ વ્લાદિમીર પુતિને યુક્રેનને બે દિવસમાં કબજે કરવાની યોજના બનાવી હતી પરંતુ હજુ સુધી આ કામ ન થયું હોવાથી પુતિન બરાબરના ગિન્નાયા છે અને હવે તેમણે યુક્રેનને જીતવા તમામ તાકાત લગાડી દીધી છે.
યુક્રેન જીતવા પુતિને તમામ શક્તિ કામે લગાડી
યુક્રેન જીતવા પુતિને તમામ શક્તિ કામે લગાડી દીધી છે તેથી આગામી દિવસોમાં યુદ્ધ ખતરનાક મોડ પર પહોંચી શકે છે. સીઆઈએના ડાયરેક્ટર વિલિયમ બર્ન્સનું માનવું છે કે પુતિન યુક્રેનને તોડવા માટે યુદ્ધને વધુ તીવ્ર બનાવી શકે છે. તેમનું કહેવું છે કે રશિયા પાસે મોટી સેના છે અને તે યુક્રેનને ઘણા અઠવાડિયા સુધી બોમ્બથી ઉડાવી શકે છે. તેમનું માનવું છે કે પુતિનમાં પોતાની સેનાની નિષ્ફળતાને લઇને ગુસ્સો અને હતાશા છે, તેથી તેઓ યુક્રેનમાં હજુ પણ વધુ હિંસા અને વિનાશ સર્જવાની તૈયારી કરી રહ્યા છે.
પુતિન હતાશ અને ગુસ્સે થયા છે-અમેરિકી અધિકારી
વિલિયમ બર્ન્સ રશિયામાં અમેરિકાના રાજદૂત રહી ચૂક્યા છે અને તેઓ પુતિનને ઘણી વખત મળી ચૂક્યા છે. પુતિનની માનસિક સ્થિતિ વિશે પૂછવામાં આવતાં તેમણે કહ્યું હતું કે 'મને લાગે છે કે પુતિન હતાશ અને ગુસ્સે છે. તેમનું કહેવું છે કે આ ગુસ્સો અને હતાશા ફક્ત વધી શકે છે અને તે નાગરિકોના મૃત્યુને ધ્યાનમાં લીધા વિના યુક્રેનિયન સૈન્યને કચડી નાખવાના પ્રયત્નોને વધુ તીવ્ર બનાવી શકે છે.
રશિયા યુક્રેન કબજે કરે તો શું થશે
બર્ન્સનું કહેવું છે કે અત્યારે આ યુદ્ધને સમાપ્ત કરવાનો કોઈ સીધો રસ્તો નથી. "તે અકલ્પનીય છે કે યુક્રેનના રાષ્ટ્રપતિ વોલોદિમીર ઝેલેન્સ્કી અચાનક રશિયા પર ક્રિમિયાના કબજાને માન્યતા આપશે અથવા પૂર્વી યુક્રેનના બે ભાગો (ડોનેત્સ્ક અને લુહાન્સ્ક) ની સ્વતંત્રતાને સ્વીકારશે.તેમનું કહેવું છે કે જો રશિયા કિવ પર કબજો કરી લે અને ઝેલેન્સ્કીને હટાવે તો પણ પુતિનને ચાર કરોડ નાગરિકોના બળવાનો સામનો કરવો પડશે. તેમણે કહ્યું કે પુતિન પાસે યુક્રેનિયન બળવાને ડામવા માટે કોઈ કાયમી રાજકીય સમાધાન પણ નથી.
પુતિને કોઈ ભોગે યુદ્ધ જીતવા માગે છે
અમેરિકાના રાષ્ટ્રપતિ જો બાઈડેનના નેશનલ ઈન્ટેલિજન્સના ડાયરેક્ટર એવરિલ હેઈન્સનું કહેવું છે કે પુતિન આ યુદ્ધને કોઈ પણ ભોગે જીતવા માંગે છે.