રેસિપી / ઘરે જ બનાવી લો આ શિયાળુ વાનગી, સાંધા અને કમરના દુઃખાવા સહિત અનેક તકલીફોમાં મળશે રાહત

કચરિયું સ્વાદમાં ગળ્યું હોવાથી બાળકો પણ તેને હોંશે હોંશે ખાઈ લે છે. આ સ્વાદિષ્ટ કચરિયું તમને શિયાળામાં થતા શરદી ખાંસી સામે પણ લડવામાં મદદ કરે છે. તો આજે જ ઘરે આ સિમ્પલ રીતે બનાવી લો ટેસ્ટી અને હેલ્ધી કચરિયું.

સફેદ તલનું કચરિયુ 

સામગ્રી

- 4 ચમચી ઘી
- 1 વાટકી ગોળ 
- 2 વાટકી અધકચરા પીસેલા સફેદ તલ 
- 10 ખજૂરના ઝીણા ટૂકડા
- 2 ચમચી સૂંઠ
- 2 ચમચી ગંઠોડા પાવડર
- 2 ચમચી મગજતરીના બી
- 2 ચમચી ખસખસ
- 4 ચમચી સૂકા કોપરાનું છીણ
- 4 ચમચી સૂકામેવાનો પાવડર

રીત

એક કડાઈમાં 4 ચમચી ઘી ગરમ કરી તેમાં એક વાટકી ગોળ ઉમેરી શેકી લો. ગોળ ઓગળે એટલો જ ગરમ કરો અને હવે ગેસ બંધ કરી દો. હવે એમાં બે વાટકી અધકચરા પીસેલા સફેદ તલ ઉમેરો. ત્યારબાદ તેમાં 10 ખજૂરના ઝીણા ટૂકડા નાંખો અને સૂંઠ, ગંઠોડા પાવડર, ખસખસ, સૂકા કોપરાનું છીણ, સૂકામેવાનો પાવડર ઉમેરી મિક્સ કરો. ગેસ ચાલુ કરો અને થોડી વાર શેકી લો. હવે થાળીમાં ઠારી દો. ઉપરથી મગજતરી, ખસખસથી સજાવી લો. આ રીતે બનાવેલ કચરિયું લાંબા સમય સુધી ટકી રહે છે.

(અહીં તમે સફેદ તલને બદલે કાળા તલનો પણ પ્રયોગ કરી શકો છો.)