IPL 2020 / 20 લાખની બેસ પ્રાઇસવાળા આ નવલોહિયા ક્રિકેટર IPLમાં બની જશે કરોડપતિ

આ ખેલાડીથી હરાજીની શરૂઆત થશે 

આજે સાત બેટ્સમેનોથી હરાજીની શરૂઆત થશે. સૌથી પહેલાં ઓસ્ટ્રેલિયાના એરોન ફિંચ પર બોલી લાગશે. ફિંચ ટી-20 ક્રિકેટનો શાનદાર ખેલાડી છે. ત્યાર બાદ ક્રિસ લીન, ઈયોન મોર્ગન અને રોબિન ઉથપ્પા પર બોલી લાગશે. હરાજીમાં ખેલાડીઓને તેમના કૌશલ્ય પ્રમાણે રાખવામાં આવ્યા છે. હરાજીમાં ખેલાડીઓનો ક્રમ બેટ્સમેન, ઓલરાઉન્ડર, વિકેટકીપર-બેટ્સમેન, ફાસ્ટ બોલર અને સ્પિનર એ પ્રમાણે રહેશે. હરાજીમાં પહેલાં કેપ્ડ ખેલાડી વેચાશે અને પછી અનકેપ્ડ ખેલાડીઓનો નંબર આવશે.

યશસ્વી જયસ્વાલ 

લિસ્ટ-એ ક્રિકેટમાં સૌથી નાની ઉંમરમાં બેવડી સદી ફટકારનારો આ બેટ્સમેન મુંબઈ તરફથી રણજી ટ્રોફી રમે છે. 17 વર્ષીય યશસ્વીની ઊંચાઈ છ ફૂટ છે. વિજય હજારે ટ્રોફીમાં તેણે ઝારખંડ સામે 154 બોલમાં 203 રનની તોફાની ઇનિંગ્સ રમી હતી, જેમાં 17 ચોગ્ગા અને 12 છગ્ગા સામેલ હતા. વિજય હજારે ટ્રોફીની છ મેચમાં 112.80ની શાનદાર એવરેજથી તેણે 556 રન બનાવ્યા છે, જેમાં ત્રણ સદી અને એક અર્ધસદી સામેલ છે. દક્ષિણ આફ્રિકામાં રમાનારા અંડર-19 વિશ્વકપની ટીમમાં પણ તેને સામેલ કરાયો છે. આક્રમક બેટ્સમેન હોવાની સાથે સાથે યશસ્વી ઉપયોગી મિડિયમ પેસર પણ છે. ઘણી ફ્રેંચાઈઝીને ઓપનિંગ બેટ્સમેનની જરૂર છે તેથી તેના પર મોટી બોલી લાગશે એ નક્કી છે.

આર. સાઈ કિશોર 

રવિશ્રીનિવાસન સાઈ કિશોર તામિલનાડુ તરફથી રમે છે. તે ડાબોડી સ્પિનર છે. 6.3 ફૂટની ઊંચાઈ ધરાવતો સાઈ કિશોર આટલી ઊંચાઈએથી બોલિંગ કરે છે ત્યારે બેટ્સમેનો તેના બોલને ઓળખી શકતા નથી. ટપ્પો પડ્યા પછી બોલ સ્પિન પણ થાય છે અને તેના બોલમાં ઉછાળ પણ હોય છે. તાજેતરમાં સૈયદ મુસ્તાક અલી ટ્રોફીમાં ટોચના બેટ્સમેનોને પણ સાઈ કિશોર સામે રમવામાં મુશ્કેલીનો સામનો કરવો પડ્યો હતો. મુસ્તાક અલ ટ્રોફીની 12 મેચમાં 20 વિકેટ સાથે સૌથી વધુ વિકેટ ઝડપનારો બોલર બન્યો હતો. આ 20માંથી 15 વિકેટ તો તેણે પાવર પ્લે દરમિયાન ઝડપી હતી. આ જ બાબત સાઈને મોટું પેકેજ અપાવી શકે છે.

અભિમન્યુ ઈશ્વરન 

દહેરાદૂનમાં જન્મેલો 24 વર્ષીય આ ટોપ ઓર્ડર બેટ્સમેન ઘરેલુ ક્રિકેટમાં સતત રન બનાવી રહ્યો છે. તાજેતરમાં જ તેને બંગાળ ક્રિકેટ ટીમનો કેપ્ટન બનાવવામાં આવ્યો છે. રાહુલ દ્રવિડ સાથે અભિમન્યુએ ઘણો સમય વિતાવ્યો છે. દ્રવિડ પાસેથી મળેલી ટિપ્સની અસર તેની બેટિંગમાં સ્પષ્ટપણે નજરે પડે છે. ઇન્ડિયા-એ સાથે તે ન્યૂઝીલેન્ડ, દક્ષિણ આફ્રિકા, શ્રીલંકા અને વિન્ડીઝની 'એ' ટીમ સામે રમી ચૂક્યો છે. શ્રીલંકા-એ સામે તો તેણે બેવડી સદી ફટકારી હતી.

વિરાટ સિંહ

વિરાટ કોહલીને તો કોઈ ઓળખની જરૂર નથી, પરંતુ વધુ એક વિરાટ ઘરેલુ ક્રિકેટમાં શાનદાર પ્રદર્શન કરી રહ્યો છે. ઝારખંડનો વિરાટસિંહ મિડલ ઓર્ડર બેટ્સમેન છે. વિજય હજારે ટ્રોફીની સાત મેચમાં આ યુવા ખેલાડીએ 83.75ની સરેરાશ અને 100.06ના સ્ટ્રાઇક રેટથી 335 રન બનાવ્યા. મુસ્તાક અલી ટ્રોફીની 10 મેચમાં તેણે 343 રન બનાવ્યા છે.

રવિ બિશ્નોઈ 

રાજસ્થાનનો રવિ બિશ્નોઈ એ સ્પિન બોલર્સમાં સામેલ છે, જે ભવિષ્યમાં ટીમ ઇન્ડિયા માટે રમતો નજરે પડી શકે છે. તેની પાસે શાનદાર ગૂગલી છે અને તે નેટ્સમાં રાજસ્થાન રોયલ્સના ઘણા બેટ્સમેનોને પરેશાન કરી ચૂક્યો છે. નીચલા ક્રમમાં તે ઉપયોગી બેટ્સમેન પણ છે. સાઉથ આફ્રિકામાં રમાનારા અંડર-19 વિશ્વકપ માટેની ટીમમાં પણ તેને સામેલ કરવામાં આવ્યો છે.