અમદાવાદ / મોદી સ્ટેડિયમમાં તસ્કરોનો તરખાટઃ પ્રેક્ષકોના 50થી વધુ મોબાઈલ ચોરાયા, પોલીસ થઈ પરેશાન

• આઈપીએલની મેચમાં તસ્કર ફાવી ગયા
• દર્શકોના 50થી વધુ મોબાઈલ ચોરાયા
• 1 લાખથી વધુ દર્શકો જોવા આવ્યા હતા મેચ 

ઈન્ડિયન પ્રીમિયર લીગ (IPL) 16મી સિઝનની ફાઈનલ જીતીને ચેન્નાઈ સુપર કિંગ્સની ટીમે ઇતિહાસ રચી દીધો છે. કેપ્ટન મહેન્દ્રસિંહ ધોનીની કેપ્ટન્સીમાં ચેન્નઇ સુપર કિંગ્સ પોતાની પાંચમી ટ્રોફી જીતી ગયું છે. રવિવાર 28મેના રોજ વરસાદના કારણે અમદાવાદના નરેન્દ્ર મોદી સ્ટેડિયમમાં રમાનારી આ મેચ મોકૂફ રાખવી પડી હતી, ત્યારે ગઇ કાલે રિઝર્વ ડે પર મેચ રમાઇ હતી. રવિવારે અને ગઇ કાલે મેચ જોવા માટે એક લાખથી વધુ ક્રિકેટ રસિયા આવ્યા હતા. જેમાં મેઘરાજાએ મજા બગાડી હતી સાથે સાથે કેટલાક તસ્કરોએ પણ ક્રિકેટ રસિયાની મજા બગાડી હતી. તસ્કરો દર્શક બનીને મેચ જોવા માટે આવ્યા હતા અને લોકોના મોબાઇલ ફોનની ચોરી કરી લીધી હતી. એક અંદાજ મુજબ ગઇ કાલે 50થી વધુ લોકોના મોબાઇલ ફોન ચોરાયા છે જેમાં પાંચ ફરિયાદ ચાંદખેડા પોલીસ સ્ટેશનમાં નોંધાઇ છે. 

50થી વધારે મોબાઈલ સ્ટેડિયમમાંથી ચોરાયા
વેજલપુરમાં રહેતા રાજેશ તિવારી, બોપલમાં રહેતા રાહુલ ગાંધી, ઇશાન મલ્હોત્રા તેમજ સુરતમાં રહેતા અભિ કારિયા અને નારણપુરામાં રહેતા મૌલિક જસાણીએ ચાંદખેડા પોલીસ સ્ટેશનમાં મોબાઇલ ચોરીની ફરિયાદ કરી છે. પાંચેય યુવકો રવિવારે આઇપીએલની ફાઇનલ જોવા માટે નરેન્દ્ર મોદી સ્ટેડિયમ ખાતે આવ્યા હતા. એક લાખથી વધુ કેપેસિટી ધરાવતું નરેન્દ્ર મોદી સ્ટેડિયમ ગઇ કાલે ક્રિકેટ રસિયાઓથી ખીચોખીચ ભરાઇ ગયું હતું. મેચ ચાલુ થવાના કલાકો પહેલાં અમદાવાદી સહિત ગુજરાતના વિવિધ ખૂણેથી ક્રિકેટ રસિયાઓ નરેન્દ્ર મોદી સ્ટેડિયમ ખાતે આવી પહોંચ્યા હતા. 

5 પોલીસ ફરિયાદ નોંધાઈ
એક તરફ પોલીસનો કડક બંદોબસ્ત હતો ત્યારે તસ્કરોને આટલી મોટી ભીડ જોઇને મોજ પડી ગઇ હતી. તસ્કરો મેચ જોવાના બહાને નરેન્દ્ર મોદી સ્ટેડિયમમાં આવ્યા હતા અને તકનો લાભ લઇને મોબાઇલ ફોન તેમજ પર્સની ચોરી કરી હતી. સૂત્રોનાં જણાવ્યા અનુસાર રવિવારે અને ગઇ કાલે 50થી વધુ લોકોના મોબાઇલ ફોનની ચોરી થઇ છે. જેમાં કુલ પાંચ ફરિયાદ હજુ સુધી નોંધાઇ છે. હજુ બીજા લોકો મોબાઇલ ચોરીની ફરિયાદ નોંધાવે તેવી શક્યતા છે. સ્ટેડિયમની અંદર તેમજ બહારથી સંખ્યાબંધ લોકોના મોબાઇલ ફોન ચોરાયા છે. 

પોલીસની ટીમો કામે લાગી
અમદાવાદમાં જ્યારે જ્યારે આઇપીએલની મેચ રમાઇ હતી ત્યારે ત્યારે ફોન ચોરાયાની અંસખ્ય ઘટનાઓ ચાંદખેડા પોલીસ સ્ટેશનમાં નોંધાઇ છે. મોબાઇલની ચોરી કરતી અનેક ગેંગ મેચ વખતે સક્રિય થઇ હતી. તક અને ભીડનો લાભ લઇને ગેંગ મોબાઇલ ફોનની ચોરી કરીને રફુચક્કર થઇ ગઈ હતી. મોબાઇલ ચોરને પકડવા માટે સ્થાનિક પોલીસ, એલસીબી, તેમજ ક્રાઇમ બ્રાંચની ટીમ પણ કામે લાગી છે. એક અંદાજ મુજબ નરેન્દ્ર મોદી સ્ટેડિયમ ખાતે રમાયેલી આઇપીએલની તમામ મેચમાં કુલ 500થી વધુ મોબાઇલ ફોનની ચોરી થઇ છે.