- રાણીપમાં ભીડનો ગઠિયોએ ઉઠાવ્યો લાભ
- બ્લેડથી થેલી કાપી વૃદ્ધાના રૂ. 3.15 લાખની ચોરી
- પોલીસે ફરિયાદના આધારે તપાસ શરૂ કરી
અમદાવાદના બજારો કે ભીડભાડવાળી જગ્યા પર લોકોના કિંમતી સામાનની ચોરી કરતી ગેંગ ફરી એક વાર સક્રિય થઇ છે. રાણીપમાં 65 વર્ષીય વૃદ્ધા શાકભાજીની ખરીદી કરી રહ્યાં હતાં ત્યારે કોઈ ગઠિયાએ ભીડની આડમાં બ્લેડથી પ્લાસ્ટિકની થેલી કાપી 3.15 લાખ રૂપિયા રોકડ રકમની ચોરી કરતાં ચકચાર મચી ગઈ છે. પોલીસે ફરિયાદના આધારે તપાસ શરૂ કરી છે. ન્યૂ રાણીપમાં અનમોલ બંગલોમાં રહેતાં 65 વર્ષના ભારતીબેન પટેલે ચોરીની ફરિયાદ કરી છે, ભારતીબેન તેમના પતિ સાથે રહે છે અને તેમના બન્ને દીકરા યુએસએમાં પરિવાર સાથે રહે છે.
પર્સમાં હતા કુલ 3.15 લાખ રૂપિયા રોકડા
થોડા દિવસ પહેલાં સવારના દસ વાગે ભારતીબેનના મોટાભાઈ અને તેમનો દીકરો યુએસએ ફરવા જવાના હોવાથી તેઓ તેમને મળવા માટે ગયાં હતાં. તેમના પર્સમાં રૂ.2000ની 150 નોટ (રૂ. ત્રણ લાખ) અને રૂ. 200ની 75 નોટ (રૂ.15 હજાર) એટલે કે કુલ 3.15 લાખ રૂપિયા રોકડા હતા. ભારતીબેન તેમના ભાઈના ઘરે આખો દિવસ રોકાયાં હતાં. ત્યારબાદ તેઓ ચાલતાં ચાલતાં રાણીપ સરદાર ચોક ખાતે શાકભાજી લેવા ગયાં હતાં. ભારતીબેન શાકના પૈસા આપવા ગયાં ત્યારે પ્લાસ્ટિકની થેલીમાં તેમનું પર્સ મળી આવ્યું ન હતું, જેથી ભારતીબેને થેલી ચેક કરી ત્યારે તેમને જાણ થઈ હતી કે કોઈ ગઠિયાએ તેમની થેલી કાપી નાખી હતી.
રોકડ રકમ ભરેલું પર્સ ચોરી ગઠિયો ફરાર
ભારતીબેન સમજી ગયાં હતાં કે, તેઓ જ્યારે શાકભાજી લેતાં હતા ત્યારે કોઈ ગઠિયો ભીડનો લાભ લઇ 3.15 લાખ રોકડ રકમ ભરેલું પર્સ ચોરી કરીને ફરાર થઇ ગયો હતો. ભારતીબેને આસપાસ તપાસ કરી પરંતુ તેમનું પર્સ મળી આવ્યું ન હતું. આથી ભારતીબેને આ અંગે રાણીપ પોલીસ સ્ટેશનમાં ફરિયાદ નોંધાવી હતી. પોલીસે આસપાસના સીસીટીવી ફૂટેજ મેળવી વધુ તપાસ હાથ ધરી છે.
પોલીસે તપાસ શરૂ કરી
શહેરમાં ભીડવાળી જગ્યા પર પર્સ ચોરી કરતી અનેક ટોળકી સક્રિય થઇ છે. જે તમારી નજર ચૂકવીને ગણતરીની મિનિટોમાં પર્સ ચોરી કરીને નાસી જાય છે. શહેરનાં વિવિધ પોલીસ સ્ટેશનમાં મોબાઇલ ચોરીના ગુના દાખલ થયા છે. જેમાં પોલીસે ચોરને પકડી પાડવા માટે ચક્રો ગતિમાન કર્યાં છે. રેલવે સ્ટેશન, બસ સ્ટેન્ડ તેમજ જાહેર જગ્યા પરથી ચોરી થઇ હોવાની ફરિયાદો નોંધાઇ છે. પર્સ ચોરી કરતી ગેંગ ચોરી કરીને પળવારમાં રફુચક્કર થઇ જાય છે.
