સૌરાષ્ટ્ર, ઉત્તર ગુજરાત સહિત કચ્છમાં ગરમી અગન વરસાવશે. હવામાન વિભાગે રાજ્યમાં હિટવેવની કરી આગાહી
ગુજરાતમાં હીટવેવની આગાહી
સૌરાષ્ટ્ર, કચ્છમાં વધશે તાપમાન
અમદાવાદમાં પણ તાપમાનનો પારો ચડશે
રાજ્યમાં અત્યારે બેવડી ઋતુનો અનુભવ થઇ રહ્યો છે. સવારે ઠંડી તો બપોર થતા થતા ગરમીનો અનુભવ થઇ રહ્યો છે. એક તરફ ઠંડા પવનો વચ્ચે માવઠાનો માર તો બીજી તરફ ઉનાળાની પણ ધીરે ઘીરે શરુઆત થઇ રહી છે. ત્યારે આ વખતો ઉનાળો આકરો રહેશે તેમ હવામાન વિભાગે આગાહી કરી છે. હજી તો માર્ચ મહિનામાં જ સૂર્ય અગન વરસાવી રહ્યો છે ત્યારે આગામી દિવસોમાં ગરમીને લઇને હવામાન વિભાગે શું કરી આગાહી આવો જાણીએ.
ગુજરાતમાં હીટવેવની આગાહી
રાજ્યમાં માર્ચ મહિનામાં જ અગનવર્ષા શરુ થઇ ગઇ છે. કાળઝાળ ગરમીનો અનુભવ થઇ રહ્યો છે તેવામાં આગામી દિવસોમાં હવામાન વિભાગે હિટવેવની આગાહી કરી છે. અમદાવાદ શહેરમાં યલો અલર્ટ અને કચ્છમાં ઓરેન્જ અલર્ટ જાહેર કરવામાં આવ્યું છે . કચ્છમાં આગામી 24 કલાક સિવિયર હિટવેવ રહેશે. જ્યારે સમગ્ર ગુજરાતમાં 3 દિવસ હિટવેવ રહેશે. હજુ પણ 1 થી 2 ડિગ્રી તાપમાન વધે તેવી સંભાવના છે. અમદાવાદમાં હાલમાં ગરમીની વાત કરીએ તો ગરમીનો પારો 40 ડિગ્રીને પાર પહોંચી ગયો છે.
સૌરાષ્ટ્રમાં ફૂંકાશે ગરમ પવન
શિયાળાની સત્તાવાર વિદાય પછી હવામાન વિભાગે રાજ્યમાં હિટવેવની આગાહી કરી છે. રાજ્યમાં ત્રણ દિવસ ગરમી વધવાની છે. આગામી ત્રણ દિવસ બે થી ત્રણ ડિગ્રી સુધી તાપમાન વધશે. સૌરાષ્ટ્ર, કચ્છ, અમદાવાદ,પાટણ, બનાસકાંઠામાં પણ હીટવેવની આગાહી કરવામાં આવી છે. સૌરાષ્ટ્રમાં ગરમ ફૂંકાશે તથા સૌરાષ્ટ્રના દરિયા કિનારાના વિસ્તારોમાં રેડ એલર્ટ આપવામાં આવ્યુ છે. તો અમદાવાદમાં બે દિવસ માટે યલો એલર્ટ આપવામાં આવ્યુ છે.