- લલિત મોદી પર બાયોપિક બનાવવાની જાહેરાત થતાં જ વિવાદ વધ્યો
- લલિત મોદીએ પોતાની માતાની મિત્ર સાથે લગ્ન કર્યાં હતાં
- વર્ષ 2018માં મીનલનુ થયુ હતુ મૃત્યુ
આમ પણ લલિત મોદી અને વિવાદ એકબીજાના પર્યાય બની ચૂક્યા છે. લલિત મોદીએ પોતાની માતાની મિત્ર સાથે લગ્ન કર્યાં હતાં. જ્યારે લલિત મોદીને પોતાના પર બનનારી બાયોપિકની જાણ થઈ તો તે ગુસ્સો થઈ ગયો. તેણે ઈન્સ્ટાગ્રામ પર લખ્યું, ''હવે વકીલોને બોલાવવાનો સમય આવી ગયો છે.''
મારા વકીલોને ફરીથી બોલાવવાનો સમય આવી ગયો છે!: લલિત મોદી
ટ્રેડ એનાલિસ્ટ તરણ આદર્શે ટ્વિટર પર માહિતી આપી હતી કે, ફિલ્મ '83' અને 'થલાઈવી'ના નિર્માતા વિષ્ણુવર્ધન ઈન્દુરી IPLના ભૂતપૂર્વ કમિશનર લલિત મોદી પર ફિલ્મ બનાવવા જઈ રહ્યા છે. આ ફિલ્મ સ્પોર્ટ્સ જર્નાલિસ્ટ બોરિય મજૂમદારની લલિત મોદી પર લખાયેલી બુકના આધાર પર બનાવવામાં આવશે. આનાથી ભડકેલા લલિત મોદીએ ઈન્સ્ટાગ્રામ પર લખ્યું, ''કોઈ પુસ્તક સાથે પોતાનું નામ જોડાતા આશ્ચર્ય થાય છે કે જલદી જ તેના પર ફિલ્મ બની જશે. મારે આ ફિલ્મ કે પુસ્તક સાથે કોઈ પણ લેવા-દેવા નથી. મારે આવતા થોડા સમયમાં મારી પોતાની બાયોપિકની જાહેરાત કરવી છે. મારા વકીલોને ફરીથી બોલાવવાનો સમય આવી ગયો છે!''
લલિત મોદીએ પોતાની માતાની મિત્ર સાથે કર્યા લગ્ન
જેવી રીતે આ બાયોપિકની જાહેરાત પર વિવાદ થયો છે, એવું જ વિવાદાસ્પદ જીવન લલિત મોદીનું રહ્યું છે. લલિત મોદીનાં અંગત જીવન વિશે વાત કરીએ તો લલિત મોદીએ પોતાની માતાની મિત્ર સાથે લગ્ન કર્યાં હતાં. મીડિયા અહેવાલો મુજબ જ્યારે લલિત મોદી વિદેશ ભણવા માટે ગયો હતો ત્યારે તેને પોતાની માતાની મિત્ર મીનલ સાથે પ્રેમ થયો હતો. જ્યારે મીનલનાં લગ્ન થવાનાં હતાં ત્યારે લલિતે પોતાની ફિલિંગ્સ મીનલ સમક્ષ વ્યક્ત કરી હતી. ઉંમરમાં નવ વર્ષ મોટી મીનલ લલિતની આ પ્રપોઝલથી નારાજ થઈ અને બંને વચ્ચે વાતચીત બંધ થઈ ગઈ હતી, પણ સમય જતાં મીનલનાં નાઈજિરિયન બિઝનેસમેન પતિ સાથે છૂટાછેડા થયા. ત્યાર બાદ ફરી એક વાર લલિત મોદી અને મીનલ નજીક આવ્યાં. બંનેએ પોતાના પરિવારની મરજી વિરુદ્ધ ૧૭ ઓક્ટોબર, ૧૯૯૧ના રોજ લગ્ન કરી લીધાં હતાં, જોકે ૨૦૧૮માં મીનલનું મૃત્યુ થયું હતું.
લલિત મોદીએ જ IPLની શરૂઆત કરી હતી
૨૦૦૫થી ૨૦૧૦ સુધી લલિત મોદી BCCIના પ્રેસિડેન્ટ પણ રહી ચૂક્યા હતા. તેણે જ IPLની શરૂઆત કરી હતી, પરંતુ ૨૦૧૦ની IPLમાં ગોટાળાના આરોપમાં તેણે કમિશનર તરીકે રાજીનામું આપી દીધું હતું.મની લોન્ડ્રિંગના આરોપ લાગ્યા બાદ ૨૦૧૦માં લલિત મોદી દેશ છોડીને ભાગી ગયો હતો.
