કોવિડ 19 / WHO દ્વારા સૌપ્રથમ આ વૅક્સિનને મળી મંજૂરી, અત્યાર સુધી 40થી વધુ દેશોએ આપી છે પરવાનગી

• WHO એ પહેલી કોરોના વેક્સિનને આપી મંજૂરી 
• અમેરિકી ફાઇઝર વેક્સિન WHO ની મંજૂરી મેળવનાર પ્રથમ રસી બની
• દુનિયાના ઘણા દેશો વેક્સિન માટે WHO પર નિર્ભર છે  

ઘણા દેશો રસી મંજૂરી માટે તેમની રેગ્યુલેટરી સિસ્ટમ પર આધાર રાખે છે, જ્યારે કેટલાક દેશો તેમના રાષ્ટ્રીય રસીકરણ કાર્યક્રમો હાથ ધરવા માટે ડબ્લ્યુએચઓ પર મોટા પ્રમાણમાં આધાર રાખે છે.

અન્ય દેશોમાં પહેલાથી જ મળી ચૂકી છે મંજૂરી 

યુએન હેલ્થ એજન્સીએ ગુરુવારે કહ્યું કે WHO દ્વારા આ રસીના તાત્કાલિક ઉપયોગની મંજૂરીથી યુનિસેફ અને અમેરિકાના અન્ય હેલ્થ ઓર્ગેનાઈજેશનો જરૂરીયાતમંદ દેશો માટે રસી ખરીદવામાં સક્ષમ બની જશે. યુએસ અને યુકે સહિત ઘણા દેશોમાં આ પહેલાથી જ ફાઈઝર ની COVID-19 રસીને મંજૂરી અપાઈ ચૂકી છે. 

કોરોના વાયરસ રોગચાળો ફાટી નીકળ્યા બાદ આ પહેલી વાર છે કે WHO દ્વારા કોરોનાને લગતી કોઈ વેક્સિનને મંજૂરી અપાઈ હોય, WHO ના સહાયક નિયામક મરિયા એન્જેલા સિમાઓએ કહ્યું, "કોવિડ -19 રસી આખી દુનિયા માટે છે અને તેની સુધી સૌની પહોંચ સુનિશ્ચિત કરવા માટેનું આ એક ખૂબ જ સકારાત્મક પગલું છે. પરંતુ હું ભારપૂર્વક જણાવીશ કે સર્વત્ર સૌથી પહેલા જે વસ્તીવર્ગને રસીકરણની જરૂરિયાતો છે તેને  પહોંચી વળવા માટે પૂરતી રસી પૂરી પાડવા પ્રયત્નો કરવા જોઈએ. "

શું છે ફાઇઝર-બાયોનોટેક રસી ?

ફાઇઝર - બાયોનોટેકની રસી અમેરિકન અને જર્મન કંપની દ્વારા વિકસિત કરાયેલી mRNA આધારિત વેક્સિન છે જેમાં વેક્સિનની નવી ટેકનિકનો ઉપયોગ કરવામાં આવ્યો છે, આ રસીના અલગ અલગ જગ્યાએ ટ્રાયલ કરવામાં આવ્યા હતા જેના અંતિમ પરિણામ અનુસાર આ રસીની કોરોના વાયરસ ની સામે આશરે 95 ટકા જેટલી અકસીરતા મપાઈ છે. આવી જ એક અન્ય વેક્સિન મોડર્નાની છે જે પણ 94 ટકા જેટલી અકસીર છે અને  mRNA આધારિત છે. 

જો કે ફાઇઝરની વેક્સિનને ઘણા દેશોમાં ઇમરજન્સી ઉપયોગની મંજૂરી મળી ગઈ છે અને આ કંપનીને ભારતમાં પણ તેની મંજૂરી માંગી છે જો કે હાલમાં ભારતમાં કોવિશિલ્ડ વેક્સિનને મંજૂરી મળી છે અને ફાઇઝરનું આવેદન વિચારાધીન છે.