કરોડોના ખર્ચે બનાવેવી ટેનિસકોર્ટ બની બિસ્માર, અમદાવાદના મેમનગર ટેનિસ કોર્ટના લોકાર્પણની તકતી પણ તુટેલી જોવા મળી
ખેલમહાકુંભની વાતો વચ્ચે AMC દ્વારા નિર્મિત ટેનિસ કોર્ટ બિસ્માર હાલતમાં
કરોડો રૂપિયાના ખર્ચે ટેનિસ કોર્ટ બનાવાયું પણ હાલત ખંડેર જેવી
મેમનગર અને લાંભા વોર્ડમાં આવેલા ટેનિસ કોર્ટ બિસ્માર
એક તરફ રાજ્યમાં સૌ પ્રથમ વાર રાષ્ટ્રીય રમતોત્સવ યોજાવા જઇ રહ્યો છે. જેમાં દેશભરમાંથી 25 હજારથી વધુ રમતવીરો ભાગ લેવા જઇ રહ્યા છે. 27 સપ્ટેમ્બરથી 10 ઑક્ટોબર દરમિયાન ગુજરાતમાં રમતોત્સવ યોજાવાનો છે. જેને લઇને તડામાર તૈયારીઓ શરૂ કરી દેવામાં આવી છે. તો બીજી તરફ અમદાવાદમાં AMC દ્વારા નિર્મિત ટેનિસ કોર્ટ ધૂળ ખાતી નજરે પડી રહી છે.
ટેનિસકોર્ટ ખંડેર હાલતમાં
જી, હા એક તરફ દેશભરના ખેલાડીઓ ગુજરાતમાં આવીને રમશે તો બીજી તરફ ગુજરાતના રમતવીરોને પૂરતી સુવિધા મળતી નથી. વાત કરીએ એએમસી દ્વારા સંચાલિત ટેનિસ કોર્ટની. જેની પાછળ કરોડો રૂપિયાનો ખર્ચો કરવામાં આવ્યો તેમ છતાં આજે ખંડેર હાલતમાં જોવા મળી રહી છે. મેમનગર અને લાંભા વોર્ડમાં આવેલા ટેનિસ કોર્ટ ધૂળ ખાઇ રહી છે.
ગંદકીના થર જામ્યા ટેનિસકોર્ટમાં
સીએમ ભૂપેન્દ્ર પટેલના વોર્ડમાં આવેલા મેમનગર વિસ્તારમાં બે વર્ષ પહેલા 30 લાખના ખર્ચે ટેનિસ કોર્ટ બનાવવામાં આવીને તેનું લોકાર્પણ કરવામાં આવ્યું. પરંતુ આજ દિન સુધી ધૂળ ખાઇ રહી છે. ટેનિસ કોર્ટમાં ઠેર ઠેર ગંદકીના ઢગ જામ્યા છે. શૌચાલયો તૂટી ગયા છે તો ક્યાંક ટેનિસ કોર્ટ અસામાજિક તત્વોનો અડ્ડો બની ગઇ હોય તેમ પણ જોવા મળી રહ્યું છે. ઉલ્લેખનીય છે કે મેમનગર તળાવની પાસે આવેલ દિવ્યપથ સ્કૂલની બાજુમાં આવેલા પ્લોટમાં મ્યુનિસિપલ કોર્પોરેશન દ્વારા બે વર્ષ અગાઉ ટેનિસ કોર્ટ બનાવવામાં આવી હતી.જેનુ લોકાર્પણ કરવામાં આવ્યા બાદ પણ બે વર્ષથી બંધ હાલતમાં છે.
ક્યારે શરૂ કરાશે ટેનિસકોર્ટ ?
ત્યારે અહીં સવાલ એ થાય કે શું તંત્ર દ્વારા માત્ર કોન્ટ્રાક્ટરોને પૈસા આપવા માટે ટેનિસકોર્ટનું નિર્માણ કર્યુ ? કરોડો રૂપિયા ખર્ચવા છતાં કેમ યુવાઓને નથી મળતો લાભ ? એએમસી દ્વારા લાખો-કરોડોના ખર્ચ કરીને વિવિધ વિસ્તારોમાં સ્પોર્ટસ સંકુલ અને ટેનિસ કોર્ટ વગેરે બનાવવામાં આવે છે પરંતુ તેનો કોઇ ઉપયોગ ન થાય અને આમ જ બિસ્માર બની જાય તો પછી કરોડોનો ખર્ચ શું કામનો. ત્યારે હવે જોવુ રહ્યું કે આવનારા દિવસોમાં ટેનિસકોર્ટ શરૂ થશે કે કેમ ?