અફઘાનિસ્તાન / ઉલ્ટા ચોર કોટવાલ કો ડાંટે: તાલિબાને અમેરિકા પર માછલાં ધોયાં, કહ્યું અમેરિકન સૈનિકોએ જ બ્લાસ્ટ કરાવ્યા

• તાલિબાને બ્લાસ્ટના જવાબદાર અમેરિકી સૈનિકોને ગણાવ્યા 
• બ્લાસ્ટમાં કુલ 13 એમરિકી સૈનિકોના મોત 
• 100 કરતા વધારે અફઘાન નાગરિકોના મોત 

અફઘાનિસ્તાનના કાબુલ એરપોર્ટ પર કરવામાં આવેલા બ્લાસ્ટમાં 100થી વધારે લોકોનાં મોત થયાં છે, જેમાંથી ૧૩ અમેરિકન નૌ-સૈનિકો પણ સામેલ છે. એક તરફ જ્યાં  આઇએસઆઇએસએ હુમલાની જવાબદારી સ્વીકારી લીધી છે ત્યારે બીજી તરફ તાલિબાને આ હુમલાનું ઠીકરું અમેરિકાના માથે ફોડ્યું છે. 

અમેરિકાને બ્લાસ્ટ માટે જવાબદાર ગણાવ્યું 

કાબુલ વિસ્ફોટ કરનારા આતંકવાદીઓને દોષ આપવાના બદલે તાલિબાન અમેરિકાને જ આ હુમલા માટે જવાબદાર ગણાવી રહ્યું છે. તાલિબાને કહ્યું કે અમેરિકન સૈનિકોએ પોતાના સામાનને નષ્ટ કરવા માટે વિસ્ફોટ કરાવ્યા છે.થોડા દિવસ પહેલાં અફઘાનિસ્તાનને પોતાના કન્ટ્રોલમાં કરનારા તાલિબાનના પ્રવક્તા જબીબુલ્લાહ મુઝા‌હિદે ‌ટ્વિટ કરી કહ્યું કે કાબુલમાં સાંજે અનેક વિસ્ફોટનો અવાજ આવ્યો. 

તાલિબાને હુમલાની નીંદા કરી 

કાબુલ એરપોર્ટની અંદર અમેરિકન સૈનિકોએ પોતાના સામાનને નષ્ટ કરવા માટે વિસ્ફોટ કર્યા. કાબુલવાસીઓ આનાથી જરાય પણ ગભરાયા નથી   ત્યારે સમાચાર એજન્સી મુજબ તાલિબાને કાબુલ હુમલાની નિંદા કરી છે અને કહ્યું છે કે આ એ વિસ્તારમાં થયું છે, જે અમેરિકન સૈનિકોના નિયંત્રણમાં છે. તાલિબાનના પ્રવક્તા જબીબુલ્લાહ મુઝાહિદે કહ્યું કે અમારું સંગઠન ગુરુવારે થયેલા હુમલાની સખત નિંદા કરે છે અને સુરક્ષા પર પૂરતું ધ્યાન આપી રહ્યું છે.

અમેરિકી સૈનિકો સહિત 100થી વધુ લોકોના મોત 

ઉલ્લેખનીય છે કે અફઘાનિસ્તાનમાં ગુરુવારે થયેલા કાબુલ એરપોર્ટ પાસેના બ્લાસ્ટ અને ફાયરિંગ દ્વારા ભીડ પર કરવામાં આવેલા હુમલામાં 100થી વધું લોકોનાં મોત થયાં છે, જ્યારે અનેક ઘાયલ થયા છે. હુમલામાં ૧૩ અમેરિકન નૌ-સૈનિકો માર્યા ગયા છે.