વિશેષ / આકરા કાયદાથી જ ચાલે છે સિસ્ટમ

કોઈ એક રાજ્ય કે દેશને યોગ્ય રીતે ચલાવવા માટે પણ આ પ્રકારના જ નાના પણ મહત્ત્વના નિયમો-કાયદાનું આકરું પાલન અને તેનાથી બનેલી એક મજબૂત સિસ્ટમ બહુ જરૂરી હોય છે. આ તમામ નિયમોમાં સૌથી વધુ અગત્યના ટ્રાફિકના નિયમો અને કાયદાઓ છે.

૧૯૧૪માં જ લાગુ કરી દેવામાં આવ્યા

વાહન ચલાવવા માટે બનાવવામાં આવેલા નિયમો આમ તો વર્ષ ૧૯૧૪માં જ લાગુ કરી દેવામાં આવ્યા હતા,પરંતુ વર્ષ ૧૯૮૮ના મોટર વિહિકલ એક્ટમાં રહી ગયેલી કેટલીક ખામીમાં સંશોધન કરવામાં આવ્યાં હતાં, જેમાંથી એક સંશોધન એ હતું કે રોડ ફક્ત મોટરકાર કે ડ્રાઈવર માટે જ નથી, પરંતુ સાઈકલચાલક, ફેરિયા અને રાહદારી માટે પણ છે.

માત્ર વાહન ચલાવવું એટલે માત્ર રેસ આપવી નહીં

સમયે સમયે નિયમોમાં પરિવર્તન આવતાં રહે છે, પરંતુ ઘણી વખત નિયમોમાં અનદેખી કરીને રસ્તા પર ખતરનાક ખેલ ખેલાય છે, જ્યાં બીજી વ્યક્તિના જીવની પરવા પણ કરાતી નથી. નાનાં બાળકો સ્કૂટર-બાઇક ચલાવે છે, તેમને નિયમો અને જવાબદારીનો અહેસાસ પણ હોતો નથી. અશિક્ષિત હોવાના કારણે માતા-પિતા એમ વિચારીને બાળકોને વાહન પકડાવી દે છે કે તેમને વાહન ચલાવતાં આવડે છે, પરંતુ તેઓ જાણતાં નથી કે માત્ર વાહન ચલાવવું એટલે માત્ર રેસ આપવી નહીં.

ક્યારેય ફોર લેન રસ્તા પર તમારું ધ્યાન ભટકવા ન દો

ઘણીવાર લોકો વાહન ચલાવતી વખતે એકદમ વળાંક લઇ લે છે, જેથી પાછળ આવતાં વાહન ટકરાઇ જાય છે, જાનમાલને ઘણું નુકસાન થાય છે. ઘણી વાર વ્યક્તિ આવા જ કારણસર પોતાના પ્રિયજનને ગુમાવી દે છે, તેનાથી વધુ દુઃખદાયક વાત કોઇ હોતી નથી. આ બધા માટે કસૂરવાર આપણું તંત્ર પણ છે., જે કેટલાક અનપઢ નેતાઓ અને નાસમજ લોકોના હાથમાં હીબકાં ભરે છે. ગાડીમાં ડ્રાઇવર સાથે ફરતા આવા રાજકારણીઓ ક્યારેય રસ્તા પર શું ચાલે છે તે જોવાની દરકાર લેતા નથી. કેટલાક નવયુવાનોને પોલીસમાં ભરતી થવાનો શોખ હોય છે, પરંતુ તેઓ પોતાની જવાબદારીથી અજાણ હોય છે.ઘણી વખત જવાબદારીને માત્ર ખિસ્સાં ભરવા સુધી જ સીમિત રખાય છે. નિયમોના પાલન કે ઉલ્લંઘન સાથે તેમને કોઇ સંબંધ હોતો નથી. આ બધાના લીધે ભણેલા-ગણેલા એક વર્ગે શિક્ષિત હોવાની ફરજ બજાવવી પડે છે. લોકોએ જાગૃત થવાની જરૂર છે કે રસ્તા કોઇ રમતનું મેદાન નથી અને ગિયર આપીને રેસ આપવાનો અર્થ વાહન ચલાવવું તેવો નથી.

રસ્તા પર કોઇ ભૂલ ન કરે અને તમામ નિયમોનું પાલન કરે તે ખૂબ જરૂરી છે. તમારા દ્વારા થતી આ ભૂલ કોઇ બેગુના વ્યક્તિ માટે દુર્ઘટનાનું કારણ બની જાય છે. લોકોએ સમજવું પડશે કે હંમેશાં ડાબી બાજુ ચાલો, પછી ભલે તમે ટુ લેન કે ફોર લેન રસ્તા પર જતા હો. તમારે કોઇ ગાડીને પાસ કરવાની હોય તો જમણી બાજુની લેન પરથી જ પાસ કરો, પછી ડાબી લેનમાં આવીને ડ્રાઇવ કરો, જેથી પાછળથી ઝડપી ગતિમાં આવતી અન્ય કોઇ ગાડી ડાબી લેનમાંથી તમને પાસ કરી શકે અને કોઇ પણ વ્યક્તિને ડ્રાઇવ કરવામાં કોઇ પરેશાની ન આવે. રસ્તા પર એકદમ બ્રેક ન મારો, કેમ કે તમારી પાછળ આવી રહેલું વાહન તમારી જેટલી ઝડપથી બ્રેક નહીં મારી શકે અને દુર્ઘટના સર્જાશે. પાછળ જોઇ ઇશારો કરી ધીમે ધીમે તમારી ગાડીને ડાબી તરફ લઇ જાંવ. ક્યારેય ફોર લેન રસ્તા પર તમારું ધ્યાન ભટકવા ન દો.

સર્વેક્ષણ અનુસાર મોબાઇલ અકસ્માતોનું મુખ્ય કારણ

મોબાઇલને રસ્તા પર ધ્યાન ભટકાવાનું સૌથી મોટું કારણ માનવામાં આવે છે. સર્વેક્ષણ અનુસાર મોબાઇલ અકસ્માતોનું મુખ્ય કારણ બને છે. કેટલાક લોકો તો એમ્બ્યુલન્સને જોતાં જ રેસ લગાવવાનું શરૂ કરી દે છે. તમારે અહીં સમજવું જોઇએ કે કોઇ વ્યક્તિ જિંદગી અને મોત સામે લડી રહી છે. આપણે તેની જિંદગી બચાવવાની કોશિશ કરવી જોઇએ. એમ્બ્યુલન્સને રસ્તો આપી કોઇનું જીવન બચાવવામાં યોગદાન આપવું જોઇએ.

હંમેશાં ઇશારાનો ઉપયોગ કરો, કેમ કે કોઇને ખ્યાલ હોતો નથી કે તમારે કઇ તરફ વળવાનું છે. જો તમે ઇશારો કરશો તો પાછળ ઊભેલી વ્યક્તિને ખ્યાલ આવશે કે તમારે કઇ બાજુ વળવું છે. ફૂટપાથ, ઝિબ્રા ક્રોસિંગ પગપાળા જતા લોકો માટે છે તેનું ધ્યાન રાખો. સ્કૂલ-કોલેજ નજીક ગાડી ધીમે ચલાવો. હોર્નનો ઉપયોગ કરી વિદ્યાર્થી કે દર્દીઓને પરેશાન ના કરો. એક નિયમ બનાવો કે નિયમોનું પાલન કરીને વાહન ચલાવીશું અને બીજાને પણ તે માટે જાગૃત કરીશું.•