- કેજરીવાલ સરકારનું બજેટ અટવાયું
- ગૃહ મંત્રાલયે પૂછ્યું- જાહેરાત પર વધુ ખર્ચ કેમ?
- ગૃહ મંત્રાલય ખોટું બોલી રહ્યું છેઃ AAP
દિલ્હીમાં આમ આદમી પાર્ટીની સરકાર અને કેન્દ્રની વચ્ચે ફરી એકવાર તકરાર જોવા મળી રહ્યો છે. કેન્દ્રએ મંગળવારે વિધાનસભામાં રજૂ થનારા દિલ્હી સરકારના વર્ષ 2023-24ના બજેટ પર રોક લગાવી દીધી છે. ગૃહ મંત્રાલયના સૂત્રોનું કહેવું છે કે, મંત્રાલયે આમ આદમી પાર્ટીની સરકાર પાસેથી ખુલાસો માંગ્યો છે અને પૂછ્યું છે કે બજેટ પ્રસ્તાવમાં જાહેરાત માટે વધુ પૈસા કેમ ફાળવવામાં આવ્યા છે. સાથે જ AAP સરકારે કહ્યું છે કે ગૃહ મંત્રાલય ખોટું બોલી રહ્યું છે.
દિલ્હી સરકાર પાસે માંગ્યો ખુલાસો
સૂત્રોના જણાવ્યા અનુસાર, ગૃહ મંત્રાલયનું કહેવું છે કે બજેટમાં ઈન્ફ્રાસ્ટ્રક્ચર અને અન્ય વિકાસ કાર્યો માટે પ્રમાણમાં ઓછી રકમની જોગવાઈ કરવામાં આવી છે. દિલ્હી સરકાર પાસે ખુલાસો માંગવામાં આવ્યો છે કે ઈન્ફ્રાસ્ટ્રક્ચર કરતાં વધારે જાહેરાતો પાછળ શા માટે વધુ ખર્ચ કરવામાં આવે છે. જ્યાં સુધી દિલ્હી સરકાર ખુલાસો નહીં કરે ત્યાં સુધી ગૃહ મંત્રાલય દ્વારા મંજૂરી આપવામાં આવશે નહીં.
જાહેરાતના બજેટમાં કોઈ વધારો નથી કરાયોઃ AAP સરકાર
તો બીજી બાજુ દિલ્હી સરકાર દ્વારા એક મોટો દાવો કરવામાં આવ્યો છે. AAP સરકારે કહ્યું કે, ગૃહ મંત્રાલય ખોટું બોલી રહ્યું છે. કુલ 78,800 કરોડનું બજેટ છે. જેમાં ઈન્ફ્રાસ્ટ્રક્ચર પર 22,000 કરોડનો ખર્ચ કરવામાં આવશે. જ્યારે જાહેરાત પાછળ માત્ર 550 કરોડનો ખર્ચ થશે. ગત વર્ષે પણ જાહેરાતનું બજેટ આટલું જ હતું. જાહેરાતના બજેટમાં કોઈ વધારો કરાયો નથી.
17 માર્ચે ગૃહ મંત્રાલયે ઉઠાવ્યો હતો વાંધો
લેફ્ટનન્ટ ગવર્નર (LG) કાર્યાલયના સૂત્રોના જણાવ્યા અનુસાર, લેફ્ટનન્ટ ગવર્નરે 9 માર્ચે કેટલાક અવલોકનો સાથે 2023-2024 માટે વાર્ષિક નાણાકીય વિવરણને મંજૂરી આપી હતી અને ફાઇલ મુખ્યમંત્રીને મોકલી દીધી હતી, જે બાદ દિલ્હી સરકારે ગૃહ મંત્રાલયને એક પત્ર મોકલ્યો અને નિયમ અંતર્ગત રાષ્ટ્રપતિની મંજૂરી માંગી. આના પર ગૃહ મંત્રાલયે 17 માર્ચે વાંધો ઉઠાવ્યો.
23 માર્ચે સમાપ્ત થઈ રહ્યું છે વર્તમાન બજેટ સત્ર
વિધાનસભામાં બજેટ ક્યારે રજૂ થશે તે હજુ સ્પષ્ટ નથી. વિધાનસભાનું વર્તમાન બજેટ સત્ર 23 માર્ચે સમાપ્ત થઈ રહ્યું છે. આ પહેલા સોમવારે નાણામંત્રી કૈલાશ ગેહલોતે કેજરીવાલ સરકારનું આઉટકમ બજેટ રજૂ કર્યું હતું અને દિલ્હી વિધાનસભાના વર્તમાન બજેટ સત્રમાં આર્થિક સર્વે 2022-23નો રિપોર્ટ પણ રજૂ કર્યો હતો. દિવસ દરમિયાન વિધાનસભાની કાર્યવાહી મંગળવારે સવારે 11 વાગ્યા સુધી સ્થગિત કરવામાં આવી હતી.
ખોટા આરોપો લગાવી રહી છે AAP: ભાજપ
ભાજપના પ્રવક્તા હરીશ ખુરાનાએ કહ્યું કે, ગૃહ મંત્રાલય અને એલજીએ કેટલાક વાંધાઓ ઉઠાવ્યા હતા. આ અંગે સવાલો પણ કરવામાં આવ્યા હતા, પરંતુ કોઈ જવાબ મળ્યો નથી મળ્યો. હવે આમ આદમી પાર્ટી ખોટા આરોપો લગાવી રહી છે.
દિલ્હી સરકારે ફાઈલ મોકલી નથીઃ વિજેન્દર ગુપ્તા
ભાજપના ધારાસભ્ય વિજેન્દર ગુપ્તાએ ટ્વીટ કરીને કહ્યું કે, સીએમ કેજરીવાલે દાવો કર્યો છે કે ગૃહ મંત્રાલયે બજેટ દસ્તાવેજો રોકી રાખ્યા છે. સત્ય? દિલ્હી સરકારે આ ફાઇલ દિલ્હી એલજીને મોકલી નથી. અહીં ફેક્ટ શીટ છે. દિલ્હી સરકાર પોતાના જ બજેટમાં વિલંબ કરી રહી છે. આઉટકમ બજેટે આરોગ્ય અને શિક્ષણમાં તેમના પોકળ દાવાઓની વાસ્તવિકતા પહેલેથી જ ઉજાગર કરી દીધી હતી.
