પાણી બચાવવા માટે સોશિયલ મીડિયા અને અખબારો સહિતના કેટલાક માધ્યમોમાં લગભગ દરરોજ કઈક નવો પ્રયાસ જોવા મળે છે. અને ચેતવણી પણ આપવામાં આવે છે કે તમે પાણી નહીં બચાવો તો આવનાર સમયમાં પાણીનું એક ટીપું પણ જોવા નહીં મળે.
તાજેતરમાં નવા ઉપગ્રહ પરથી મળેલા ડેટાએ તેનો પુરાવો પણ આપી દીધો છે. ચેતવણી આપી છે કે પાણી વગરના કપરા દિવસો ટૂંક સમયમાં જ આવશે. પાણીના તળ અંગેની ચેતવણી આપતા ઉપગ્રહ પરથી મળેલા ડેટામાં જાણવા મળ્યું છે કે ટૂંક સમયમાં ભારત સહિતના કેટલાક દેશોમાં પાણીની ગંભીર કટોકટી સર્જાશે.
આ ઉપગ્રહ ભારત અને સમગ્ર વિશ્વમાં સૂકાતા તળ અંગે અભ્યાસ કરે છે. તે દરમિયાન જાણવા મળ્યું છે કે પાણીની સમસ્યામાં ભારત ઉપરાંત મોરોક્કો ઈરાક અને સ્પેન જેવા દેશોનો પણ સમાવેશ થાય છે.
મળતી માહિતી મુજબ અર્લી વોર્નિંગ સિસ્ટમ સેટેલાઈટ ડેવલપ કરનારા વિજ્ઞાનીકો પાસે વિશ્વના પાંચ લાખ ડેમના પાણીના તળ અંગે ની જાણકારી છે. તે દરમિયાન ચેતવણી આપવામાં આવી છે કે ભારતના જળાશયો ઝડપથી સૂકાઈ રહ્યા છે અને પાણીની ગંભીર કટોકટી ઊભી થાય તે દિવસો હવે દૂર નથી.
ભારતમાં પાણીની અછત જલ્દી આવશે તેનું કારણ છે કે અહીં ડેમ અને અન્ય જળાશયોમાં પાણીના ઉપયોગ કરતા બગાડતા પાણીની અસર વધારે છે. જેના આધારે આ ચેતવણી આપવામાં આવી છે અને કહેવામાં આવ્યું છે કે અગાઉ આપેલી ચેતવણી કરતાં પણ ટૂંક સમયમાં અહીં પાણીની ગંભીર અછત જોવા મળશે.
આ ઉપરાંત કહેવામાં આવ્યું છે કે ભારતમાં ઘણાં રાજ્યોમાં પાણીની અછત અત્યારે પણ સર્જાઈ રહી છે. નર્મદા નદી સાથે જોડાયેલા બે જળાશયોમાંથી પાણીની ફાળવણી મામલે તણાવ જોવા મળ્યો છે. ગયા વર્ષે ઓછો વરસાદ પડ્યો હોવાથી મધ્ય પ્રદેશમાં ઈન્દિરા સાગર ડેમમાં પાણીનું સ્તર ત્રીજા ભાગનું થઈ ગયું છે. જેમાં કેટલુંક પાણી સરદાર સરોવર ડેમમાંથી ઠાલવવામાં આવ્યું હતું જેને કારણે ઉહાપોહ થયો હતો કારણ કે સરદાર સરોવર ડેમ ત્રણ કરોડથી પણ વધુ લોકોને પીવાલાયક પાણી પૂરું પાડે છે.
વર્લ્ડ રિસોર્સ ઈન્સ્ટિટ્યૂટે કહ્યું છે કે અન્ય કેટલાક દેશોમાં પણ આવી કટોકટી સર્જાશે. આ અમેરિકન પર્યાવરણ સંગઠન છે જે ડેલ્ટારેસ ડચ સરકાર અને અન્ય કેટલાક સાથે મળીને કામ કરે છે.
પાણી અછત બાબતે આ અગાઉ પણ અહેવાલો મળ્યા હતા કે દક્ષિણ આફ્રિકાના કેપ ટાઉનમાં સતત ત્રણ વર્ષથી વરસાદની અછતના કારણે ત્યાંના રહેવાસીઓને આ એપ્રિલમાં જ એક ટીપું પાણી નહીં મળે. જોકે આ અહેવાલ બાદ કેપટાઉન વાસીઓએ પાણીની 50%થી પણ વધુ બચત કરી હતી જેને કારણે તે આ ગંભીર સમસ્યાનો સામનો હવે 2019 સુધી કરી શકશે.