વલસાડ નગરપાલિકામાં સત્તાધારી પક્ષ ભાજપના જ એક સભ્ય આજે ભાજપી સાશકોને દોડતા કરી દીધા હતા. વલસાડ નગરપાલિકાના વોર્ડ નંબર પાંચના ભાજપના સભ્ય પ્રવિણ કચ્છીએ ભાજપ સામે જ વિરોધ નોંધાવ્યો હતો. પ્રવિણ કચ્છી વલસાડ નગરપાલિકાના પગથિયા પર નાળિયેર મૂકી પૂજા કરી ધરણા પર બેસી ગયા હતા. અને રડતા રડતા પાલિકાના શાસકોને લીકેજ થઈ રહેલું પાણી બંધ કરવા માટે રજૂઆત કરી હતી. જો કે,વલસાડ નગરપાલિકાના બાંધકામ સમિતિના ચેરમેન ઉજેશ પટેલે લીકેજ થઈ રહેલ પાણીને તાત્કાલિક બંધ કરાવવાની ખાત્રી આપી હતી. અને પ્રવિણ કચ્છીને પારણા કરાવી મામલો થાળે પાડ્યો હતો. મહત્વનું છે કે,પ્રવિણ કચ્છીએ વલસાડ નગરપાલિકાના નવા મકાનમાં છેલ્લા બે મહિનાથી ટપકી રહેલા પાણીના લીકેજને બંધ કરાવવા માટે અવારનવાર બાંધકામ સમિતિના ચેરમેન અને પાલિકાના ચીફ ઓફિસરને રજૂઆત કરી હતી. પરંતુ બે મહિના વીતી ગયા હોવા છતાં અને સત્તાધારી પક્ષના સભ્ય હોવા છતાં પણ કોઈ એ વાત ધ્યાને આપતા ન હતા. આથી પ્રવિણ કચ્છીએ ભાજપ સામે જ વિરોધ નોંધાવ્યો હતો.