નિવેદન / ચોથી લહેર ન આવે તે માટે પ્રયાસ: કોરોના વાયરસને લઈને સ્વાસ્થ્ય મંત્રી માંડવિયાએ જુઓ શું કહ્યું?

• ચીનમાં કોરોના કહેરને જોઇ ભારત સરકાર ખૂબ જ સાવધ 
• કોવિડ મહામારીને ફેલાતી અટકાવવા ભારત સરકાર એલર્ટઃ મનસુખ માંડવિયા
• ગુજરાતની જનતા સતર્ક રહે ગભરાવાની જરૂર નથીઃ માંડવિયા

 કોરોનાને કારણે ચીનમાં સ્થિતિ બેકાબૂ બની ગઈ છે. એક રિપોર્ટ મુજબ કોરોનાના BF.7 પેટા પ્રકારને કારણે ચીનમાં દરરોજ 5 હજાર મૃત્યુ થઈ રહ્યા છે. ચીનમાં કોરોનાના નવા પ્રકારને કારણે થયેલા નુકસાનને જોઈને ભારત સરકાર ખૂબ જ સાવધ બની ગઈ છે. આ તરફ બેઠકોનો દોર પણ યથાવત છે. આ બધાની વચ્ચે કેન્દ્રીય આરોગ્ય મંત્રી મનસુખ માંડવિયાનું નિવેદન સામે આવ્યું છે. 

ભારત સરકાર સતર્કતાથી ભરી રહી છે પગલાઃ મનસુખ માંડવિયા
કેન્દ્રીય આરોગ્ય મંત્રી મનસુખ માંડવિયાએ જણાવ્યું કે, ચીન, જાપાન, અમેરિકા, બ્રાઝિલ, યુરોપ સહિતના દેશોમાં કોવિડનો વેવ જોવા મળી રહ્યો છે. આ સ્થિતિની અંદર આપણા દેશમાં કોવિડ મહામારીને ફેલાતી અટકાવવા માટે ભારત સરકાર સતર્કતાથી પગલા ભરી રહી છે. ગઈકાલે જ કોવિડ માટેની એક એડવાઈઝરી જાહેર કરવામાં આવી છે. વિજ્ઞાપનના માધ્યમથી પણ જનતાને સાવચેત કરવામાં આવી છે. સંસદના ફ્લોર પરથી મેં એક નિવેદનમાં દરેકને માસ્ક પહેરવા, સોશિયલ ડિસ્ટન્સ જાળવવાનો આગ્રણ પણ કર્યો છે. જેથી ભવિષ્યમાં આપણા દેશને કોવિડના BF 7ના સંક્રમણથી બચાવી શકાય. 

સતર્કતા રાખો કોઈએ ગભરાવવાની જરૂર નથીઃ કેન્દ્રીય આરોગ્ય મંત્રી
મનસુખ માંડવિયાએ જણાવ્યું કે, કોવિડ પ્રોટોકોલનું પાલન કરીને તમારી બાકી બધી જ વ્યવસ્થાઓ ચલાવો, સતર્કતા રાખો કોઈએ ગભરાવવાનું નથી. ચોથી લહેર દેશમાં ન આવે તે માટે અમે દરેકને સતર્ક કરી રહ્યા છીએ. હું ગુજરાતની જનતાને પણ મીડિયાના માધ્યમથી કહેવા માંગુ છું કે ગુજરાતની જનતા સતર્ક રહે ગભરાવાની જરૂર નથી.

જુલાઈથી કોરોનાના કેસમાં ઘટાડો 
ભારતમાં જુલાઈ મહિનાથી કોરોનાના કેસમાં ઘટાડો થવા લાગ્યો હતો. એક સપ્તાહમાં કોરોનાના 1,200થી પણ ઓછા કેસ નોંધાયા છે. સ્વાસ્થ્ય મંત્રાલયના આંકડા અનુસાર દેશમાં 14 થી 23 ડિસેમ્બર સુધી એટલે કે 10 દિવસમાં કોરોનાના 1,566 કેસ નોંધાયા છે. હાલમાં દેશમાં કુલ 3,380 સક્રિય કેસ છે. 

કોરોના સામે લડવા ભારત તૈયાર 
સરકારી આંકડાઓ અનુસાર જૂન 2022 સુધીમાં દેશભરમાં 13.08 લાખથી વધુ એલોપેથિક ડોક્ટરો છે. આ સિવાય 5.64 લાખ આયુષ ડોક્ટરો પણ છે. તે મુજબ ભારતમાં દર 834 વ્યક્તિએ એક ડૉક્ટર છે. કેન્દ્ર અને રાજ્ય સરકારો કોરોના સામે લડવાની તૈયારીમાં લાગેલી છે. ભારતમાં આંતરરાષ્ટ્રીય પ્રવાસીઓ માટે આજથી રેન્ડમ કોરોના ટેસ્ટ જરૂરી બની ગયો છે. આ ઉપરાંત અનુનાસિક રસી (નાકની રસી) પણ કો-વિન પોર્ટલમાં આગલા દિવસે (23 ડિસેમ્બર) ઉમેરવામાં આવી હતી. તેનો ઉપયોગ બૂસ્ટર ડોઝની જેમ કરવામાં આવશે.