ગુજરાત વિધાનસભાની પ્રથમ તબક્કાની ચૂંટણીમાં મતદારોએ અનેક સંદેશા સાથે લોકોને મતદાન કરવા અપીલ કરી
નવસારીમાં લગ્ન કર્યા પહેલાં પીઠી લગાવીને યુવકે કર્યું મતદાન
ગોંડલમાં પોલીસ સહાયતાથી એક વૃદ્ધા મતદાન મથકે પહોંચી મતદાન કર્યું
પરેશ ધાનાણી સાયકલ પર ગેસનો બાટલો મુકી મોંઘવારીનો વિરોધ કર્યો
સુરત મેયર હેમાલી બોઘાવાલા સાયકલ પર બેનર લગાવી મતદાન કરવા પહોંચ્યા
ગુજરાત વિધાનસભાની ચૂંટણીને લઈ આજે પ્રથમ તબક્કાનું મતદાન છે. તેવામાં આજે મતદારોએ અનેક સંદેશા સાથે લોકોને મતદાન કરવા અપીલ કરી હતી. જેમાં નવસારીમાં લગ્ન કર્યા પહેલાં પીઠી લગાવીને યુવકે મતદાન કરી લોકોને મતદાન કરવા અપીલ કરી છે. આ સાથે સુરતના મેયર હેમાલી બોઘાવાલા સાયકલ પર બેસીને મત આપવા આવ્યાં હતા. સાયકલ પર બેનર લગાવી મતદાન કરવા લોકોને અપીલ કરી.
આ તરફ અમરેલીમાં કોંગ્રેસના ઉમેદવાર પરેશ ધાનાણીએ સાયકલ પર ગેસનો બાટલો મુકી મોંઘવારીનો વિરોધ કર્યો હતો. આ સાથે દરેકને મતદાન કરવા અપીલ કરી હતી. આ સાથે ગોંડલમાં એક વૃદ્ધા પોલીસ સહાયતાથી મતદાન મથકે પહોંચ્યા હતા. જ્યાં તેમણે વૃદ્ધાએ મતાધિકારનો ઉપયોગ કરી અન્યને મતદાન કરવાનો સંદેશ આપ્યો હતો.
ગુજરાત વિધાનસભા ચૂંટણીનું આજે પ્રથમ તબક્કાનું મતદાન છે ત્યારે બીજી તરફ બીજા તબક્કાની વિધાનસભાની બેઠકો પર રાજકીય પક્ષોનો પ્રચાર પણ ચાલી રહ્યો છે. આજે ગુજરાતમાં પ્રથમ તબક્કાના મતદાન સવારે 10 વાગ્યા સુધીમાં 15% વોટિંગ સાથે ડાંગ પ્રથમ નંબર પર છે. મહત્વનું છે કે, ગુજરાતમાં 19 જિલ્લાઓમાં મતદાન માટે લોકોમાં ભારે ઉત્સાહ, સવારે 10 વાગ્યા સુધીમાં 13% જેટલું મતદાન નોંધાયું છે. એક અંદાજ મુજબ 70% સુધી મતદાન થાય તેવી શક્યતા છે.
ચૂંટણી પંચની લૉકજાગૃતિ કામ આવી
ગુજરાતમાં ચૂંટણી પંચની લૉકજાગૃતિ કામ આવી હોય તેમ લોકો ખૂલીને વોટ આપવા નીકળ્યા છે. મહિલાઓ મોટી સંખ્યામાં મતદાન કરવા પહોંચ્યા છે. જોકે મહિલાઓએ કહ્યું છે કે, ઘરકામ પછી કરીશું પહેલા વોટ આપીશું. જોકે હવે વધારે મતદાનથી કઈ પાર્ટીને ફાયદો થશે તે જોવાનું રહ્યું.
ગુજરાત વિધાનસભા ચૂંટણીનું આજે પ્રથમ તબક્કાનું મતદાન
વિધાનસભા ચૂંટણીના પ્રથમ તબક્કાની 19 જિલ્લાની 89 બેઠકો પર મતદાન શરૂ થઈ ચૂક્યું છે. આજે કચ્છ, સૌરાષ્ટ્ર અને દક્ષિણ ગુજરાતની બેઠકો પર મતદાન ચાલુ છે. જેમાં મતદાનનો સમય સવારના 8થી સાંજના 5 વાગ્યા સુધીનો છે. મહત્વનું છે કે, ગુજરાતમાં પ્રથમ તબક્કાની ચૂંટણીમાં 89 બેઠક પર કુલ 788 ઉમેદવારો મેદાનમાં છે. જેમાં 39 રાજકીય પક્ષોના ઉમેદવારો મેદાનમાં છે. તો વળી આજે 2,39,76,670 મતદારો મતદાન કરશે. જેમાં 1,24,33,362 પુરૂષ મતદારો, 1,15,42,811 મહિલા મતદારો અને 497 અન્ય મતદારો મતદાન કરશે.