પ્લાન / શિયાળાની ઠંડીમાં ઘૂસણખોરીની નવી ખતરનાક પદ્ધતિને ડામવા સેનાનો આ છે ‘સ્પેશિયલ પ્લાન’

• એલઓસી પર ઘૂસણખોરી સામે લડવા સેના તૈયાર
• સરહદ પર અનોખી ‘વિન્ટર મેનેજમેન્ટ સ્ટ્રેટેજી’ અપનાવી

શિયાળાના ગાઢ ધુમ્મસ વચ્ચે સરહદી વિસ્તારોમાં પાકિસ્તાની સ્નાઈપર્સ-બેટનો ખતરો 

જમ્મુના મેદાની વિસ્તારોમાં શિયાળો અને ઠંડી વધતાની સાથે જ સરહદી વિસ્તારોમાં ગાઢ ધુમ્મસ છવાઈ જાય છે. આવા સંજોગોમાં દૂર સુધી જોવાનું શક્ય બનતું નથી. પાકિસ્તાની રેન્જર્સ શિયાળામાં સરહદ પર તહેનાત સેનાના જવાનો પર દબાણ વધારવા માટે સરહદી વિસ્તારોમાં સ્નાઈપર્સને સક્રિય કરે છે. પાકિસ્તાન રેન્જર્સની સાથે સાથે પાકિસ્તાની સેના પણ ઈન્ટરનેશનલ બૉર્ડર પરથી આતંકીઓની ઘુસણખોરી કરાવવા માટે સક્રિય બની જાય છે. આંતરરાષ્ટ્રીય સરહદને અડીને આવેલા વિસ્તારોમાં પાકિસ્તાનની સૌથી ખતરનાક ગણાતી બૉર્ડર એક્શન ટીમ (બેટ) દ્વારા હુમલાઓનું જોખમ પણ વધી જાય છે.

એલઓસી છોડીને હવે ઈન્ટરનેશનલ બૉર્ડર તરફ વળ્યા આતંકીઓ

જમ્મુ-કાશ્મીરમાં લાઈન ઑફ કન્ટ્રોલ (એલઓસી) પર ભારે બરફવર્ષાને કારણે નવેમ્બરથી ઘૂસણખોરીના તમામ રસ્તાઓ બંધ થવા લાગે છે. આતંકીઓ ઘૂસણખોરી કરવા માટે જમ્મુમાં ઈન્ટરનેશનલ બૉર્ડર પરના પાકિસ્તાની વિસ્તારોમાં સક્રિય થઈ જાય છે. પાકિસ્તાન અધિકૃત કાશ્મીર (પીઓકે)માં અલગ અલગ લૉંચિંગ પેડ પર અંદાજે 500 આતંકવાદીઓ એલઓસી પરથી ઘુસણખોરી કરવા માટે તૈયાર બેઠા હતા. આમાંના ઘણા આતંકવાદીઓ હવે આંતરરાષ્ટ્રીય બૉર્ડરની સાવ નજીક આવેલા વિસ્તારો તરફ વળી ગયા છે. ઓક્ટોબર મહિના બાદ આ પ્રકારના લગભગ 12 કેસ સામે આવ્યા છે. આ સરહદ પરની ઘાસની ગાઢ ઝાડીઓ આતંકીઓને છુપાઈ જવામાં મદદરૂપ થાય છે. આવી સ્થિતિમાં સેના અવારનવાર સરહદ પરથી ગાઢ ઘાસની ઝાડીઓ કાપતી રહે છે.

બૉર્ડર પાર આતંકીઓની હાજરીના મજબૂત સંકેત મળતાં સેના એલર્ટ

સેનાના સૂત્રોના જણાવ્યા અનુસાર, આંતરરાષ્ટ્રીય બૉર્ડર પાર આતંકીઓની હાજરી હોવાના મજબૂત સંકેત મળ્યા બાદ સુરક્ષાનું સ્તર વધારી દેવામાં આવ્યું છે. પાકિસ્તાનને ચેતવણી આપવામાં આવી છે કે, જો કોઈ ગાઢ ધુમ્મસ અથવા અંધારાની આડમાં સશસ્ત્ર સરહદની નજીક આવશે તો તેને ગોળી મારી દેવામાં આવશે. વિન્ટર મેનેજમેન્ટ સ્ટ્રેટેજી હેઠળ જમ્મુ વિભાગના કઠુઆ, સાંબા અને જમ્મુ જિલ્લામાં સરહદ પર સૈનિકોની તહેનાતી વધારવાની સાથે સાથે વધારાના નાકા અને ચોકીઓ ઊભી કરવામાં આવી રહી છે.

આતંકીઓ પર હવે આધુનિક હથિયારોથી થશે વાર

સરહદ પર આધુનિક ટેક્નોલૉજીનો ઉપયોગ હવે દુશ્મનોને મારવા માટે પણ કરવામાં આવશે. જો સરહદ પર દુશ્મન અંધારા અને ગાઢ ધુમ્મસનો લાભ ઉઠાવશે, તો અંધારામાં પણ જોઈ શકવામાં સક્ષમ એવા આધુનિક નાઈટ વિઝન ડિવાઇસ અને હાઈ ડેફિનેશન કેમેરાથી તે બચી શકશે નહીં. બૉર્ડર સિક્યુરિટી ફૉર્સ પાસે અત્યાધુનિક થર્મલ ઇમેજર, હાઈ રેન્જ નાઈટ વિઝન અને સેન્સર પણ છે.