અખિલ ઠાકોર એકતા સમિતીના પ્રમુખ નવઘણ ઠાકોરે ફેસબૂક પર વિવાદિત પોસ્ટ મૂકતાં ઠાકોર સમાજમાં હડકંપ મચી ગઈ છે. નવઘણસિંહે ફેસબૂક પોસ્ટમાં કહ્યું કે જો દિકરી આપણો સમાજ મુકી બીજા સમાજમાં લગ્ન કરે તો તેને આપણી જૂની પરંપરા મુજબ દૂધ પીતી કરવી જોઈએ. આ પોસ્ટથી ભારે વિવાદ સર્જાતા અંતે નવઘણસિંહે પોસ્ટ ડિલીટ કરી હતી.
બનાસકાંઠામાં ઠાકોર સમિતિના પ્રમુખ નવઘણજી ઠાકોરની વિવાદિત પોસ્ટ વાયરલ થઈ છે. હજુ અઠવાડિયા પહેલાં જિલ્લાના દાંતીવાડા તાલુકાના જેગોલ ગામના ઠાકોર સમાજના બંધારણ પર નવઘણજી ઠાકોરે વિવાદિત પોસ્ટ કરી છે. ફેસબુકમાં તેમણે લખ્યુ છે કે, દીકરી બીજા સમાજમાં લગ્ન કરે તો દૂધ પીતી પ્રથા ફરીથી શરૂ કરવી જોઈએ. તેમણે 'દીકરી દૂધ પીતી'નો જૂનો રિવાજ ફરીથી અમલ કરવા માટે લોકોને જણાવ્યુ છે.
આ પોસ્ટ બાદ લોકોએ સોશિયલ મીડિયામાં તેમની ટીકા પણ કરી હતી. લોકોએ સોશિયલ મીડિયામાં ટ્રોલ કરતા તેમણે પોસ્ટ ડિલીટ કરી હતી. એક તરફ ભાજપ સરકાર બેટી બચાઓ, બેટી પઢાઓના અભિયાન ચલાવે છે.
તો આવામાં જ્યારે સંગઠનના પ્રમુખ નવઘણજી ઠાકોર આ પ્રકારની પોસ્ટ કરી રહ્યા છે તો તેમની સામે શું કાર્યવાહી થશે તે આગામી દિવસોમાં જોવાનું રહેશે.
ઠાકોર સમાજના આગેવાનો પણ આ પોસ્ટનો વિરોધ કર્યો હતો પરંતુ જ્યારે નવઘણજીને આ પોસ્ટ અંગે પૂછવામાં આવ્યું ત્યારે તેમણે કહ્યું હતું કે મને દૂધપીતી પ્રથા શું એ જ ખબર નથી પરંતુ તેમના ફેસબૂક પર કોઈ યુવાને પોસ્ટ કરી દીધી તેવું કહ્યું હતું. નવઘણજીની આ પોસ્ટ બાદ ઉત્તર ગુજરાતના સામાજિક અને રાજકીય માહોલમાં ગરમાવો આવ્યો છે.