થાઇલેન્ડની હોસ્પીટલમાં એક નર્સે એક દર્દીના મૃત્યુ પછી તેના મોબાઈલની ચોરી કરીને કર્યા કરોડો રૂપિયા ટ્રાન્સફર. જાણો સમગ્ર મામલો
નર્સે મૃત વ્યક્તિના મોબાઈલથી પૈસા ટ્રાન્સફર કર્યા
પેશન્ટના મોત બાદ મોબાઈલની ચોરી થઇ હતી
આરોપીના ઘરમાંથી મળી 50 લાખનની રોકડ
હોસ્પિટલમાં દર્દીની સારસંભાળ રાખવાનું કામ નર્સનું હોય છે, પરંતુ જ્યારે નર્સ દર્દીના મૃત્યુ બાદ કઈ એવું કરે જેથી તેને જેલ જવું પડે તો, આવા જ સમાચાર સામે આવી રહ્યા છે જેમાં એક નર્સે મૃતક દર્દીના ખાતામાંથી કરોડો રૂપિયા ઉપાડી લીધા હતા. આ કારણે 46 વર્ષીય નર્સને પણ જેલમાં જવું પડ્યું હતું. જો કે નર્સનું કહેવું છે કે, પેમેન્ટ ટ્રાન્સફર દર્દીના કહેવાથી જ કરવામાં આવ્યું હતું. પરંતુ આ મામલે સવાલ ઉઠી રહ્યા છે કે પેશન્ટના મોત બાદ આ વ્યવહાર કેમ થયો? દર્દીના પુત્રએ આ અંગે ફરિયાદ કરી હતી. આ ઘટના થાઇલેન્ડની છે.
કરોડો રૂપિયા ટ્રાન્સફર કર્યા
રિપોર્ટમાં કહેવામાં આવ્યું છે કે, 46 વર્ષીય નર્સનું નામ સતંગ થોંગગ્રામફાન છે. સાતંગ પર દર્દીના પુત્રએ આરોપ લગાવ્યો છે કે તેણે તેના પિતા એટલે કે મૃતક દર્દીના મોબાઇલની ચોરી કરી હતી અને ત્યારબાદ ઓનલાઇન બેંકિંગ દ્વારા 3 કરોડ 44 લાખ રૂપિયા પોતાના ખાતામાં ટ્રાન્સફર કર્યા હતા.
આ રીતે થયો ખુલાસો
પેશન્ટના પુત્ર પતિવત થાઇસોમે નર્સ અંગે પોલીસમાં ફરિયાદ કરી હતી. ફરિયાદ બાદ પોલીસે નર્સ સાતંગની તેના ઘરેથી ધરપકડ કરી હતી. પતિવતે જણાવ્યું કે તેના પિતા બેંકમાં કામ કરતા હતા. તેમને કેન્સરની સારવાર માટે હોસ્પિટલમાં દાખલ કરવામાં આવ્યા હતા. પરંતુ સારવાર દરમિયાન 9 ઓગસ્ટ 2022ના રોજ તેમનું મોત થયું હતું. આ પછી હોસ્પિટલમાંથી પિતાનો મોબાઈલ પણ ચોરાઈ ગયો હતો, બાદમાં જાણવા મળ્યું હતું કે, બેંક ખાતામાંથી પૈસા પણ ગાયબ છે.
ઘરમાંથી મળી 50 લાખની રોકડ
ફરિયાદ બાદ પોલીસ નર્સના ઘરે તપાસ કરવા ગઇ, પોલીસ પણ આશ્ચર્યમાં પડી ગઇ. તપાસ દરમિયાન પોલીસને 50 લાખ રૂપિયા રોકડા, સોનું અને એક કાર મળી આવી હતી. આ ઉપરાંત તેના ઘરમાંથી 6 બેંક પાસબુક મળી આવી હતી. પૂછપરછ દરમિયાન તેણે કહ્યું કે, તેણે દર્દીનો મોબાઈલ ચોરી નથી કર્યો. તેણે પૈસા ટ્રાન્સફરનો સ્વીકાર કર્યો, પરંતુ તેણે કહ્યું કે દર્દીએ તેને આ કામ કરવાનું કહ્યું હતું. તમને જણાવી દઈએ કે તેમણે દર્દીની બેંક એપથી 17 ટ્રાન્ઝેક્શન કર્યા અને 2 કરોડથી વધુની રકમ ટ્રાન્સફર કરી.