ભારતીય ટીમ અત્યારે સાઉથ આફ્રિકાના પ્રવાસે છે. જ્યાં રવિવારથી ટેસ્ટ શ્રેણીનો શુભારંભ થઇ રહ્યો છે. ભારતીય ટીમે ક્યારેય પણ દક્ષિણ આફ્રિકામાં કોઈ ટેસ્ટ શ્રેણી જીતી નથી. એવામાં ક્રિકેટ પ્રેમીઓને આ વખતે વિરાટ સેના પાસે ઘણી અપેક્ષાઓ છે.
ભારતીય ટીમ અત્યારે સાઉથ આફ્રિકાના પ્રવાસે
ક્રિકેટ પ્રેમીઓને વિરાટ સેના પાસેથી ઘણી અપેક્ષા
જાણો, ટીમ ઈન્ડિયાના કયા ખેલાડીએ કેટલો અભ્યાસ કર્યો
એવામાં અમે તમને જણાવીએ છીએ કે ટીમ ઈન્ડિયાના કયા ખેલાડીએ કેટલો અભ્યાસ કર્યો છે. કારણકે ભારતીય ટીમમાં કોઈ એન્જિનિયર છે તો કોઈએ અધવચ્ચે અભ્યાસ છોડવો પડ્યો હતો. આવો જાણીએ ખેલાડીઓ વિશે.
રવિચંદ્રન અશ્વિન
પોતાના એક ઈન્ટરવ્યુના કારણે ચર્ચામાં આવેલા રવિચંદ્રન અશ્વિન સતત રેકોર્ડ પર રેકોર્ડ બનાવી રહ્યાં છે. તેઓ બોલિંગ કરતી વખતે માઈન્ડ ગેમ રમવા માટે પણ ઓળખાય છે. ખાસ વાત એ છે કે અશ્વિન ઈજનેર છે. ચેન્નઈની મોટી કોલેજમાંથી અશ્વિને બીટેક કર્યુ છે.
અજિંક્ય રહાણે
તાજેતરમાં ટેસ્ટ ટીમમાં ભારતીય ટીમના વાઈસ કેપ્ટન પદેથી હટાવવામાં આવેલા અજિંક્ય રહાણેની ટીમમાં જગ્યા પર સવાલ ઉભા થઇ રહ્યાં છે. જો તેમના અભ્યાસની વાત કરીએ તો રહાણેએ મુંબઈની એક યુનિવર્સિટીમાંથી બેચલર્સ ઈન કોમર્સ કર્યુ છે.
વિરાટ કોહલી
કેપ્ટન વિરાટ કોહલી સ્કૂલના સમયથી ક્રિકેટ રમી રહ્યાં છે. એવામાં તેમણે પોતાના અભ્યાસનું બલિદાન આપવુ પડ્યુ. વિરાટ કોહલી નવી દિલ્હીના વિશાલ ભારતી પબ્લિક સ્કૂલમાંથી 12મુ ધોરણ ભણ્યા છે.
જસપ્રીત બુમરાહ
ભારતીય ટીમના જસપ્રીત બુમરાહ પર આફ્રિકામાં શ્રેણી જીતવાની અપેક્ષા છે. બુમરાહે અમદાવાદની નિર્માણ હાઈસ્કૂલમાંથી ઈન્ટરમીડિયેટનો અભ્યાસ કર્યો છે.
રાહુલ દ્રવિડ
ભારતીય ટીમના કોચ રાહુલ દ્રવિડની ગણતરી સૌથી ભણેલા-ગણેલા ક્રિકેટર્સમાં થાય છે. તેમણે બેંગલોરમાંથી સેન્ટ જોસેફ કોલેજમાંથી કોમર્સમાં ગ્રેજ્યુએશન પૂર્ણ કર્યુ છે. જ્યારે તેઓ એમબીએનો અભ્યાસ કરી રહ્યાં હતા ત્યારે તેમને ભારતીય ટીમ તરફથી આમંત્રણ આવ્યું હતુ.
કેએલ રાહુલ
આફ્રિકા ટેસ્ટ શ્રેણી માટે ટીમના વાઈસ કેપ્ટન બનેલા કેએલ રાહુલે મેંગલોરમાંથી પોતાનો અભ્યાસ કર્યો છે. તેમણે NITKમાં હાઈસ્કૂલનો અભ્યાસ કર્યો. ત્યારબાદ ક્રિકેટના ચક્કરમાં બેંગલોર શિફ્ટ થયા અને ત્યાંથી બેચલર્સ ઓફ કોમર્સ કર્યુ.
મયંક અગ્રવાલ
બેંગલોરમાંથી આવનારા મયંક અગ્રવાલે પોતાનો પ્રારંભિક અભ્યાસ અહીંથી શરૂ કર્યો હતો. પરંતુ બાદમાં જાણીતી જૈન યુનિવર્સિટીમાં એડમિશન લીધુ.
શ્રેયસ ઐયર
ટેસ્ટ ટીમમાં સામેલ થયેલા શ્રેયસ ઐયરે મુંબઈના ડોન બોસ્કો હાઈસ્કૂલમાંથી પોતાનો અભ્યાસ પૂર્ણ કર્યો છે. ત્યારબાદ તેમણે આર.એ.પોડાર કોલેજમાંથી પોતાનુ ગ્રેજ્યુએશન પૂર્ણ કર્યુ.