સ્પોર્ટ્સ / ટીમ ઇન્ડિયા ઓસ્ટ્રલિયાથી સાવધાન! ટેસ્ટ સીરીઝ માટે કેપ્ટને તૈયાર કર્યો આ માસ્ટર પ્લાન, જાણો શું

• ભારત અને ઓસ્ટ્રેલિયા વચ્ચે ચાર મેચની ટેસ્ટ સિરીઝ યોજાશે 
• ઓસ્ટ્રેલિયાએ સાઉથ આફ્રિકાને ત્રણ મેચની ટેસ્ટ સીરિઝમાં 2-0થી હરાવ્યું
• ઓસ્ટ્રેલિયાની આ સ્પિન ત્રિપુટીથી ભારતીય બેટ્સમેનોએ સાવધાન રહેવું પડશે

ભારત અને ઓસ્ટ્રેલિયા વચ્ચે ચાર મેચની ટેસ્ટ સિરીઝ ફેબ્રુઆરી-માર્ચમાં યોજાવા જઈ રહી છે અને ભારત માટે વર્લ્ડ ચેમ્પિયનશિપની ફાઇનલમાં પહોંચવા માટે આ સિરીઝ ખૂબ જ મહત્વની છે. જણાવી દઈએ કે ઓસ્ટ્રેલિયાની ટીમ પણ હાલ શાનદાર ફોર્મમાં છે અને તેને સાઉથ આફ્રિકાને ત્રણ મેચની ટેસ્ટ સીરિઝમાં 2-0થી હરાવ્યું છે.

એવામાં ટીમ ઈન્ડિયા માટે ઓસ્ટ્રેલિયાની ટીમને ટેસ્ટ સીરિઝમાં હરાવવું સહેલું નહીં રહે. આ સાથે જ હાલ ઓસ્ટ્રેલિયાની ટીમ આ સીરિઝ માટે ભારત આવવા માટે તૈયાર થઈ રહી છે. જણાવી દઈએ કે ટેસ્ટ મેચમાં ભારતીય પિચો પર સ્પિન બોલિંગ ખૂબ જ મહત્વપૂર્ણ છે અને આવી સ્થિતિમાં ઓસ્ટ્રેલિયન કેપ્ટન પેટ કમિન્સ નાથન લિયોન સિવાય એશ્ટન અગર અને ટ્રેવિસ હેડને અજમાવવા માંગે છે. તેનો મતલબ એવો થયો કે ઓસ્ટ્રેલિયાની આ સ્પિન ત્રિપુટીથી ભારતીય બેટ્સમેનોએ સાવધાન રહેવું પડશે.

સાઉથ આફ્રિકા સામેની ટેસ્ટ સીરિઝ પૂરી થયા પછી પેટ કમિન્સે એક ઇંટરવ્યૂ દરમિયાન કહ્યું હતું કે 'આ એક મોટી સીરિઝ છે અને અમે અમારી શ્રેષ્ઠ ટીમને મેદાનમાં ઉતારવા માંગીએ છીએ. એગર લેફ્ટ આર્મ સ્પિન બોલર છે અને તે આ સીરિઝ માટે ભારત જશે. ભારત સામે વિકેટ લેવા માટે ત્યાં આવા બોલરો ખૂબ જ ઉપયોગી સાબિત થાય છે.

કમિન્સે આ સાથે ટ્રેવિસ હેડ વિશે વાત કરતાં કહ્યું હતું કે , 'ટ્રેવિસ અલગ ઓફ સ્પિનર છે અને તે અમારા માટે ખૂબ ઉપયોગી સાબિત થઈ શકે છે. તેના પ્રદર્શનથી દરેક લોકો ખુશ છે અને એ માટે તે ટીમનો ભાગ રહેશે. જણાવી દઈએ કે ભારતના ટુર ધ્યાનમાં રાખીને એશ્ટન એગરને સાઉથ આફ્રિકા સામેની ત્રીજી ટેસ્ટમાં મેદાનમાં ઉતારવામાં આવ્યો હતો અને એ મેચમાં તેને 22 ઓવરમાં 58 રન આપ્યા હતા અને કોઈ વિકેટ લઈ શક્યો નહતો.

આ સાથે જ કેમરૂન ગ્રીનને લઈને પણ ઓસ્ટ્રેલિયન ટીમ માટે પણ સારા સમાચાર આવ્યા છે. જણાવી દઈએ કે ઓલરાઉન્ડર કેમેરોન ગ્રીનને આંગળીમાં ફ્રેક્ચરને કારણે સિડની ટેસ્ટમાંથી બહાર થઈ ગયો હતો તે ભારતના એમના ટુર પહેલા સ્વસ્થ થઈ જશે. 

હાલ ઓસ્ટ્રેલિયન ટીમ વર્લ્ડ ટેસ્ટ ચેમ્પિયનશિપના પોઈન્ટ ટેબલમાં નંબર વન પર છે અને ઓસ્ટ્રેલિયાની ટીમે અત્યાર સુધી 15માંથી 10 ટેસ્ટ જીતી છે, જો ભારતીય ટીમની વાત કરીએ તો તે બીજા નંબર પર છે અને ટીમ ઈન્ડિયાએ 14માંથી 8 મેચ જીતી છે.