સિદ્ધિ / માત્ર 14 વર્ષની ઉંમરે આ યુવતીએ શૂટિંગ ગેમ્સમાં ગુજરાતને અપાવ્યું ગૌરવ

• 14 વર્ષની યુવતીનું મોટું લક્ષ્ય
• રાજ્યની શૂટિંગ ગેમ્સમાં મેળવ્યો બ્રોન્ઝ મેડલ
• કોમનવેલ્થ ગેમ્સમાં ભારતને ગોલ્ડ અપાવે તો નવાઇ નહીં 

પોતાના નિશાનને અચૂક રીતે તાકવા અને લક્ષ્યને પામવા માટે રાત દિવસ રાઈફલ શૂટિંગની આકરી પ્રેક્ટીસ કરી રહેલી આ દીકરી સરહદી કચ્છ જિલ્લાના ગાંધીધામ તાલુકાના નાનકડા એવા ગળપાદર ગામની વતની છે. તેની આ ટેલેન્ટનો પરિચય તાજેતરમાં જ ગુજરાત રાજ્ય સ્તરની રાઈફલ શૂટિંગ સ્પર્ધામાં બ્રોન્ઝ મેડલ જીતીને આપી દીધો છે.  હજી પણ આ ક્ષેત્રમાં આગળ વધીને તનીષાબા ગોલ્ડ મેડલ મેળવી પરિવાર સાથે દેશનું નામ રોશન કરવા માંગે છે. તેણીને બ્રોન્ઝ મેડલ મેળવવાની ખુશી છે પણ સાથે  કોમનવેલ્થ ગેમ્સમાં રમીને આંતરરાષ્ટ્રીય સ્તરે ગોલ્ડ મેડલ મેળવવાની અત્યારથી તૈયારી કરી રહી છે. 

કહેવાય છે કે મન હોય તો માળવે જવાય. પરંતુ એક દીકરી માટે જ્યાં સુધી પરિવારમાંથી સપોર્ટ ન મળે ત્યાં સુધી તેની યાત્રાને વેગ મળતો નથી. પરંતુ તનીષાબા આ બાબતમાં ખૂબ ભાગ્યશાળી છે. તેના પિતા મહેન્દ્ર સિંહ ચૌહાણ પોતાની દીકરી માટે કંઈ પણ કરી છૂટવા તૈયાર છે. 

પોતાની પુત્રી દેશને ગોલ્ડ મેડલ અપાવવાનું લક્ષ્ય પાર પાડી શકે તે માટે તેઓ પોતાના પરિવારના તમામ ખર્ચાઓ પર કાપ મૂકીને પુત્રીને રાઈફલ શૂટિંગ ક્ષેત્રે તૈયાર  કરી રહ્યા છે. આ વાતની સાબિતી એ વાત માંથી જ મળે છે કે મહેન્દ્રસિંહે દીકરીને પિસ્તોલ ગન લાવી આપવા માટે પોતાની જિપ્સી કાર પણ વેચી નાંખી છે.