10 જાન્યુઆરીનું વર્ષ 2020ના બોલિવૂડ બોક્સ ઓફિસ પર પહેલા મોટા ફિલ્મી ક્લેશને લઈને આવ્યું છે. આ ક્લેશ અજય દેવગણની ફિલ્મ તાનાજી ધ અનસંગ વૉરિયર અને દીપિકા પાદુકોણની ફિલ્મ છપાકની વચ્ચે છે. બંને ફિલ્મો લાંબા સમયથી ચર્ચામાં હતી. આ સાથે જ બંને ફિલ્મોની સાથે જ રાજકીય પાર્ટીઓ પણ જોડાયેલી છે. એવામાં એ જાણવું જરૂરી છે કે ફિલ્મનું પહેલા દિવસનું કલેક્શન કેટલું રહ્યું.
બોક્સ ઓફિસ પર બે ફિલ્મોનો ક્લેશ
અજય દેવગણની તાનાજી અને દીપિકાની છપાકની વચ્ચે ક્લેશ
જાણો બંને ફિલ્મનું પહેલાં દિવસનું બોક્સ ઓફિસનું કલેક્શન
તાનાજી ધ અનસંગ વૉરિયર
ફિલ્મ તાનાજી ધ અનસંગ વૉરિયરે પહેલા દિવસે જ બોક્સ ઓફિસ પર ખૂબ કમાણી કરી છે. બોક્સ ઓફિસ ઈન્ડિયાના આંકડા અનુસાર ફિલ્મે પહેલાં દિવસે જ 16 કરોડ રૂપિયાની કમાણી કરી છે. ઉલ્લેખનીય છે કે કેટલાક સમયથી અજયની આ ફિલ્મના સમર્થનમાં ભાજપના અનેક નેતા મેદાનમાં ઉતર્યા હતા. આ લિસ્ટમાં તેજિન્દ્ર પાલ સિંહ બગ્ગાનું નામ પણ સામેલ છે.
તાનાજી ધ અનસંગ વૉરિયર અજય દેવગણની 100મી ફિલ્મ
અજય દેવગણની ફિલ્મ અનેક રીતે ખાસ છે. અજય દેવગણની આ 100મી ફિલ્મ છે. જેમાં અજય દેવગણે ખૂબ જ મહેનત કરી છે. ફિલ્મમાં અજય દેવગણની સાથે સૈફ અલીખાન અને કાજોલ પણ મુખ્ય રોલમાં છે. ફિલ્મમાં કાજોલની તાનાજીની પત્નીનો રોલ કરી રહી છે.
છપાકે પહેલા દિવસે બોક્સ ઓફિસ પર કરી હતી આટલી કમાણી
બોક્સ ઓફિસ ઈન્ડિયાના આંકડા અનુસાર દીપિકા પાદુકોણની ફિલ્મ છપાકે બોક્સ ઓફિસ પર પહેલા દિવસે 4.5 કરોડ રૂપિયાની કમાણી કરી હતી. ઉલ્લેખનીય છે કે દીપિકા પાદુકોણની ફિલ્મ રાજસ્થાન, છત્તીસગઢ અને મધ્યપ્રદેશમાં ટેક્સ ફ્રી જાહેર કરવામાં આવી છે. ફિલ્મને કોંગ્રેસનું સમર્થન મળી રહ્યું છે.
છપાક ફિલ્મનું નિર્દેશન મેઘના ગુલઝારે કર્યું છે. ફિલ્મમાં દીપિકાની સાથે વિક્રાંત મૈસી જોવા મળે છે. ફિલ્મ એસિડ એટેક પીડિતાના જીવન પર આધારિત છે. ફિલ્મને લઈને થોડા સમયથી અનેક વિવાદ જોવા મળી રહ્યા છે. ઉલ્લેખનીય છે કે છપાક કેટલાક સમયથી અલગ અલગ કારણોને લઈને ચર્ચામાં છે. ક્યારેક લક્ષ્મી અગ્રવાલના વકીલે ફિલ્મમાં ક્રેડિટને લઈને કોર્ટમાં અરજી કરી તો ફિલ્મની સ્ક્રીપ્ટ પર પણ ચોરીનો આરોપ લાગ્યો છે. અનેક કારણોથી ફિલ્મના રિલીઝને પણ રોકવાની માંગ કરવામાં આવી હતી. પણ ફિલ્મ કોઈ પણ અવરોધ વિના રીલિઝ થઈ હતી.