નવી ચાલ / ચીનની મદદથી નવુ અફઘાનિસ્તાન બનાવશે તાલિબાનો, જાણો શું છે ડ્રેગનની નવી રણનીતિ

• તાલિબાનો અફઘાનિસ્તાનમાં હવે નવી સરકાર બનાવવાની તૈયારીમાં
• તાલિબાન અને ચીનની મિત્રતા હવે સામે આવી
• તાલિબાનો ચીનના પૈસે નવુ અફઘાનિસ્તાન બનાવશે!

અફઘાનિસ્તાનની ખનીજ સંપત્તિ પર ચીનનો ડોળો

તાલિબાનોએ ચીનને મહાન પાડોશી ગણાવ્યું છે અને ડ્રેગનની આર્થિક મદદથી દેશ ચલાવવાનું સપનું જોઈ રહ્યું છે. તાલિબાનના પ્રવક્તા જબીહુલ્લા મુઝાહિદે કહ્યું કે, તેમનું જૂથ મુખ્ય રીતે ચીનની આર્થિક મદદ પર નિર્ભર છે. એક જાણીતા અખબાર સમુહના રિપોર્ટ મુજબ, અફઘાનિસ્તાનમાં 3 ટ્રિલિયન ડોલર એટલેકે લગભગ 200 લાખ કરોડ રૂપિયાની  ખનિજ સંપત્તિ છે,  જેના પર ચીન ડોળો રાખીને બેઠુ છે. આ સાથે જ ચીન તાલિબાન દ્વારા બગરામ એરબેઝને હડપવાનું કાવતરૂ ઘડી રહ્યું છે. અમેરિકાએ અફઘાન યુદ્ધ દરમ્યાન આશરે 20 વર્ષ સુધી એરબેઝનો ઉપયોગ કર્યો હતો.

મદદના બહાને ચીનની આ છે ઈચ્છા

ચીન તાલિબાન સાથે ઘનિષ્ઠ મિત્રતા કરી શિનજિયાંગ પ્રદેશમાં આતંકવાદી ગ્રુપની સક્રિયતાને રોકવા ઈચ્છે છે. આ ઉપરાંત ચીનના વિદેશ મંત્રી વાંગ યીએ મુલ્લા અબ્દુલ ગની બાદર સાથે મુલાકાત દરમ્યાન કહ્યું હતું કે તાલિબાને ETIM સંબંધિત દરેક સંબંધો તોડવા પડશે. આ સંગઠન ચીનની રાષ્ટ્રીય સુરક્ષા અને ક્ષેત્રીય અખંડતાની સામે સીધુ સંકટ છે.

અફઘાનિસ્તાને ચીનને અપાવ્યો વિશ્વાસ

ચીનનો એવા દેશોમાં સમાવેશ થાય છે, જે તાલિબાન સરકારને માન્યતા આપવા માટે તૈયાર છે. ત્યારબાદ તાલિબાને પણ ચીનને વિશ્વાસ અપાવ્યો છે કે તેઓ ઉઈગર મુસ્લિમોના કટ્ટરપંથી તત્વો પર અંકુશ રાખશે અને અફઘાનિસ્તાનની જમીનનો ઉપયોગ ચીન વિરુદ્ધ થવા દેશે નહીં. જોકે, તાલિબાનોએ ભારત સહિત અન્ય દેશોને પણ કહ્યું છે કે અફઘાનિસ્તાનની જમીનનો ઉપયોગ કોઈ દેશની વિરુદ્ધ કરી શકાશે નહીં.