ટી-20 / 'જો આવું થશે તો અમે ભારતને હરાવી દઈશું', મેચ પહેલા અફઘાની ખેલાડીના નિવેદથી કોહલીની વધી ચિંતા

• બુધવારે અફઘાનિસ્તાન સામે ભારતની મેચ 
• ફાસ્ટ બોલર હામિદ હસનનું મોટું નિવેદન 
• કહ્યું ટીમ ઇન્ડિયા સામે મોટો સ્કોર કરીશું તો જરુરથી જીતી જઈશું. 

ભારતીય ટીમ બુધવારે ટી-20 વર્લ્ડ કપમાં અફઘાનિસ્તાન સામે ટકરાશે. ટીમ ઇન્ડિયાની નજર સતત બે મેચ હાર્યા બાદ જીત પર છે, પરંતુ અફઘાનિસ્તાનના પેસર હામિદ હસને મેચ પહેલા મોટું નિવેદન આપ્યું છે. હામિદનું કહેવું છે કે જો અમે ટીમ ઇન્ડિયા સામે મોટો સ્કોર કરીશું તો અમે તેમને હરાવી શકીએ છીએ.

અમારી પાસે ભારત સામે સારી તક 

અફઘાનિસ્તાનના ફાસ્ટ બોલર હામિદ હસને કહ્યું કે, "અમારી પાસે ભારત સામે સારી તક છે. જો અમે બોર્ડ પર સારા રન બનાવીશું તો અમે અમારી બોલિંગ, ફિલ્ડિંગના આધારે તેમને હરાવી શકીએ છીએ. હામિદે કહ્યું, "પીચ પર પણ ઘણું બધું નિર્ભર છે, શરૂઆતમાં આપણે જોઈશું કે પીચ કેવી રીતે રમે છે અને પછી તમારી યોજના પર કામ કરે છે. અમે આ મેચમાં અમારા ૧૦૦ ટકા આપીશું, પછી તે ફાસ્ટ બોલરો હોય કે સ્પિનર્સ'.

શું અફઘાનિસ્તાન સેમિ ફાઈનલમાં પહોંચશે?

જો અફઘાનિસ્તાન આ મેચમાં કમાલ કરીને ટીમ ઇન્ડિયાને હરાવી દેશે તો સેમિ ફાઈનલની નજીક પહોંચી જશે. પાકિસ્તાન લગભગ સેમિ ફાઈનલમાં પહોંચી ગયું છે, હવે ન્યૂઝીલેન્ડ અને અફઘાનિસ્તાન વચ્ચે ખરાખરીનો જંગ છે.અફઘાનિસ્તાન હાલ ગ્રૂપ 2માં નંબર-2 પર છે, તેના ચાર પોઇન્ટ છે. અફઘાનિસ્તાન 3 મેચ રમ્યું છે, જેમાંથી બેમાં જીત મેળવી છે અને એક જ મેચ હારી છે. જ્યારે ભારત બે મેચ રમી ચૂક્યું છે અને બંને મેચ હારી ગયું છે. હામિદ હસને કહ્યું કે, અમારી પાસે પણ સારી બેટિંગ છે, અમે હજુ સુધી અમારી બધી વિકેટ ગુમાવી નથી. જો આપણે 5-6 બેટ્સમેનો ગુમાવીએ તો પણ આખરે અમારી પાસે રાશિદ ખાન જેવો મોટો હિટર બાકી છે.

સેમિફાઈનલમાં પહોંચવા માટે ભારતે અફઘાનિસ્તાન, નામિબિયા અને સ્કોટલેન્ડને હરાવવું પડશે

ઉલ્લેખનીય છે કે ટીમ ઈન્ડિયા પાકિસ્તાન, ન્યૂઝીલેન્ડ સામેની મેચમાં હારી ગઈ છે. જો ભારતને સેમિ ફાઈનલમાં પહોંચવું હોય તો તેણે અફઘાનિસ્તાન, નામિબિયા અને સ્કોટલેન્ડને મોટા અંતરથી હરાવવું પડશે. આ સાથે જ અફઘાનિસ્તાન અને ન્યૂઝીલેન્ડને પણ એક-એક મેચ ગુમાવવી પડશે. તો જ કોઈ ચમત્કાર ટીમ ઈન્ડિયાને સેમિ ફાઈનલમાં લઈ જઈ શકે છે.