T 20 World Cup 2021 / મોહમ્મદ શમીએ ત્રણ બોલમાં સતત ત્રણ વિકેટ લીધી પણ હેટ્રીક ના મળી, ટીમનો આ નિર્ણય છે જવાબદાર

• ભારતીય ટીમે સ્કોટલેન્ડને ફક્ત 85 રન પર સમેટી દીધી
• મોહમ્મદ શમીએ સતત 3 બોલમાં ત્રણ વિકેટ લીધી
• ટીમના આ નિર્ણયને કારણે શમીને હેટ્રીક ના મળી

મોહમ્મદ શમીએ એક ઓવરમાં ત્રણ વિકેટ લીધી પણ હેટ્રીક ના મળી

સ્કોટલેન્ડ ટીમની બેટીંગ દરમ્યાન 17મી ઓવર નાખવા આવેલા મોહમ્મદ શમીની આ ત્રીજી ઓવર હતી. તેમણે ઓવરની પ્રથમ બોલ (16.1 ઓવર)માં કેલમ મૈકલિયોડને આઉટ કર્યો. ઓવરના બીજી બોલ વખતે સાફયાન શરીફ સ્ટ્રાઈક પર હતા. શમીએ ફરી એક વખત યોર્કર બોલ નાખી હતી અને બેટર કશું સમજી શક્યા ન હતા. આ બોલ બેટરના બુટ પર વાગી હતી. બેટર શરીફ રન લેવા માટે દોડ્યા હતા. પરંતુ ટીમ ઈન્ડિયાએ  LBWની અપીલની માંગ કરી હતી. જોકે, શરીફ ક્રીઝ છોડીને ખૂબ આગળ નિકળી ગયા હતા ત્યારે ઈશાન કિશન તકનો લાભ જોઈ સ્ટમ્પ તરફ દોડ્યા અને શરીફને રન આઉટ કરી દીધો.

હેટ્રીક ના મળવા પાછળ આ છે કારણ

ત્યારબાદ ઓવરની ત્રીજી બોલમાં એલેસડેર ઈવાન્સ ક્રીઝ પર હતા. શમીએ ફરી એક વખત પરફેક્ટ યોર્કર ફેંક્યો હતો અને ઈવાન્સ બોલ્ડ થયો હતો. આ શમીની ઓવરમાં સતત ત્રીજી વિકેટ હતી. જો ઓવરની બીજી બોલમાં એમ્પાયરે LBWની અપીલને આઉટ જાહેર કર્યુ હોત તો નિશ્ચિત રીતે શમીના ખાતામાં હેટ્રીક થઇ હોત. પરંતુ એમ્પાયરે આ અપીલને નકારી દીધી અને ઈશાન કિશનના રનઆઉટના રૂપમાં વિકેટ આપી દીધી. આ સ્થિતિમાં ભારતીય ટીમે આ નિર્ણયને રિવ્યુ કરવાનું ના વિચાર્યુ.

શમીની બોલિંગ વખાણવાલાયક

શમી ખૂબ જ સારા અંદાજમાં બોલિંગ કરી રહ્યાં હતા. અગાઉ કેપ્ટન વિરાટ કોહલીએ આજે પાવરપ્લેની અંતિમ ઓવરમાં શમીને પ્રથમ વખત અજમાવ્યો હતો. જ્યાં શમીએ ઓવરની બીજી બોલમાં ધીમી બોલિંગ કરી જ્યોર્જ મંસીને શિકાર બનાવ્યો.