ચુકાદો / સસ્પેન્ડેડ IAS અધિકારી ગૌરવ દહિયાને દિલ્હી હાઈકોર્ટથી મોટી રાહત, ગૂગલ-ફેસબુકને અપાયો આ આદેશ

દિલ્હી હાઈકોર્ટે શું કહ્યું?

દિલ્હી હાઈકોર્ટે નોંધ્યું હતું કે લીનુ સિંઘ દ્વારા મહિલા સેલમાં દાખલ કરવામાં આવેલ ફરિયાદમાં તપાસ બાદ દહિયા વિરુદ્ધમાં કોઈ પુરાવા મળ્યા ન હતા. જો કે લીનુ સિંઘે આ મુદ્દે ઓનલાઈન ઘણો શોરબકોર કરતા આ મુદ્દે સોશ્યલ મીડિયા ઉપર ઘણા બધા આર્ટીકલ્સ લખાયા અને શેર થયા હતા અને ગૌરવ દહિયા આ પોસ્ટ્સ અને લખાણને હટાવવા માંગે છે. 

અદાલતે એમ પણ કહ્યું કે જો આવા લખાણ ઓનલાઈન રહેશે તો ગૌરવ દહિયા , જેની સામે હાલ કોઈ ગુનો પુરવાર થાય તેવા પુરાવા નથી, તેમની માનહાનિ થશે. આથી અદાલતે લીનુ સિંઘ અથવા તેમના સાથીઓ દ્વારા સોશ્યલ મીડિયામાં કરેલી પોસ્ટ તેમ જ ગૂગલ, ફેસબુક, ટ્વીટર જેવી વેબસાઈટ ઉપર ગૌરવ દહિયાને લગતા અને આ કેસને લગતા લખાણો, અને કોઈ પણ પ્રકારના સાહિત્યને દૂર કરીને અથવા તે કન્ટેન્ટને બ્લોક કરી દેવાની સૂચના આપી છે. 

આ મુદ્દે ગૂગલના વકીલ દ્વારા ટિપ્પણી કરવામાં આવી હતી કે આ પ્રકારની પોસ્ટની જવાબદારી ગૂગલની નહીં બલકે જે તે ન્યુઝ ચેનલ કે જે તે વેબસાઈટની રહે છે. આ મુદ્દે અદાલતે ગૂગલને દેશના ડોમેઈનમાં આ તમામ આર્ટીકલ્સ અને પોસ્ટ્સની લિંક ગૂગલ ઉપરથી બ્લોક કરી દેવાની સુચના આપી હતી.

ગત મહિને જ દહિયાએ લીનુ સિંઘ સામે FIR દાખલ કરી હતી

ઉલ્લેખનીય છે કે હાલમાં જ 28 જૂનના રોજ આ મામલો ફરી ચર્ચામાં આવ્યો હતો. દહિયાએ કથિત પૂર્વ પત્ની લીનુ સિંઘ સામે ફરિયાદ દાખલ કરાવી છે. દહિયાએ ખંડણી માંગવી અને હેરાન કરવાનો આરોપ લગાવ્યો છે. સાથે અન્ય વ્યક્તિ સાથે લગ્ન કર્યાનો પણ ફરિયાદમાં ઉલ્લેખ કર્યો હતી. આ મામલે દહિયાએ દિલ્હી પોલીસ સ્ટેશનમાં ફરિયાદ નોંધાવી હતી. આ ફરિયાદ મુજબ તેની કથિત પૂર્વ પત્ની લીનુસિંહે 2015માં કુલદીપ દિનકર નામના વ્યક્તિ સાથે લગ્ન કરી લીધા હતા. ત્યાર બાદ આ બન્નેએ ભેગા મળી ગૌરવ દહિયાને ફસાવી અને પૈસા પડાવવા માટે કાવતરું ઘડ્યું હતું. દિલ્હી પોલીસની તપાસના તથ્યો બાદ દહીયાએ પોલીસ ફરીયાદ નોંધાવી હતી.

શું છે વિવાદ? 

ઉલ્લેખનીય છે કે, એક વર્ષ પહેલા દિલ્હીની મહિલા લીનુ સિંઘે ગુજરાતના આરોગ્ય વિભાગના પૂર્વ કમિશનર ગૌરવ દહિયા સામે ગંભીર આરોપ લગાવ્યા હતા. લીનુ સિંઘે આરોપ લગાવતા કહ્યું હતું કે, દહિયા પરણિત હોવા છતાં તેમણે તેને બીજા લગ્ન કરવા દબાણ કરી છેતરપિંડી કરી હતી. તેમને સોફ્ટ ડ્રિન્ક પીવડાવી અર્ધબેભાન કરી તેના બિભત્સ ફોટા-વીડિયો ઉતારી તેને વાયરલ કરવાની તેમજ જાનથી મારી નાખવાની ધમકીઓ આપી લગ્ન માટે દબાણ કર્યું હતું. જે બાદ 2018માં લગ્ન કર્યા હતા.

0