તપાસ / સુશાંત કેસની તપાસ ટીમમાં મરાઠી સિંઘમ ઓફિસરની એન્ટ્રી થતાં ડ્રગ્સ માફિયામાં ફફડાટ

બોલિવૂડ અભિનેતા સુશાંતસિંહ રાજપૂતનાં મોતની તપાસમાં ડ્રગ્સનો એંગલ સામે આવ્યા બાદ આજે સવારે નાર્કોટિકસ કંટ્રોલ બ્યૂરો (એનસીબી)ની ટીમે રિયા ચક્રવર્તીના સાંતાક્રૂઝ વિસ્તારમાં આવેલા નિવાસસ્થાને દરોડા પાડયા હતા. એનસીબીએ રિયાના ભાઇ શૌવિક ચક્રવર્તીનાં ડ્રગ્સ કનેકશનને લઇને દરોડાની કાર્યવાહી હાથ ધરી છે. એનસીબીની ટીમે રિયાના ઘરના તમામ ઇલેકટ્રોનિકસ ગેઝેટસની તલાશી લીધી હતી. ફર્નિચર, કબાટ ફંફોસ્યાં હતાં. ઘરના દરેક ખૂણાની બારીકાઇથી તપાસ કરી હતી.

રિયાના ઘરેથી ડ્રગ્સ મળી આવી નથી

એનસીબીની ટીમે આજે સવારે સાડા ત્રણ કલાક સુધી રિયાના ઘરની તલાશી લીધા બાદ તેના ભાઈ શૌવિકને પોતાની સાથે પૂછપરછ માટે લઈ ગઈ હતી. આ ઉપરાંત રિયાના સાથી સેમ્યુઅલ મીરાંડાની પણ અટકાયત કરી છે. હવે એનસીબીની ટીમ શૌવિક, સેમ્યુઅલ મીરાંડા, ડ્રગ્સ પેડરલ જૈદ અને બાશિતને સામ સામે બેસાડીને પૂછપરછ કરશે. રિયાના ઘરેથી ફોન અને અન્ય ઈલેસ્ટ્રોનિક સાધનો પણ એનસીબીની ટીમે જપ્ત કર્યા છે. જોકે રિયાના ઘરેથી ડ્રગ્સ મળી આવી નથી.

મીરાંડા ડ્રગ્સ રિયા ચક્રવર્તીના ભાઇ શૌવિકને મોકલતો

આ ઉપરાંત એનસીબીની ટીમે આજે સવારે સેમ્યુઅલ મીરાંડાના ઘરે ત્રાટકીને તપાસ કરી હતી. અત્રે ઉલ્લેખનીય છે કે એનસીબીની ટીમે સુશાંતસિંહ રાજપૂતના હાઉસ મેનેજર રહેલા સેમ્યુઅલ મીરાંડાને ડ્રગ્સ પૂરું પાડવાના આરોપમાં મુંબઇમાંથી ધરપકડ કરી છે. મીરાંડા ડ્રગ્સ રિયા ચક્રવર્તીના ભાઇ શૌવિકને મોકલતો હતો.

રિયાના ઘરે એનસીબીના ટીમના આઠ સભ્યો આજે સવારે પહોંચી ગયા હતા. શૌવિકના લેપટોપ અને હાર્ડ ડિસ્ક પણ એજન્સી જપ્ત કરી શકે છે. શૌવિકને ઇડીએ આજે ૧૧-૦૦ વાગ્યે હાજર થવાનો સમન્સ પણ મોકલ્યો છે. આથી એનસીબીએ આજે સવારે જ દરોડા પાડયા છે. એવું જાણવા મળી રહ્યું છે કે એનસીબી પાસે પૂરતા પ્રમાણમાં પુરાવા છે અને ત્યાર બાદ જ દરોડાની કાર્યવાહીનો નિર્ણય લેવામાં આવ્યો હતો.

ડ્રગ્સ સપ્લાયરે જણાવ્યું કે તે બોલિવૂડ પાર્ટીઝ માટે કેનબિસ પૂરી પાડતો

સુશાંતસિંહ રાજપૂત મોત મામલામાં ડ્રગ્સનો એંગલ સામે આવ્યા બાદ એનસીબીની ટીમે પહેલાં અનેક લોકોની ધરપકડ કરી છે. ડ્રગ્સ સપ્લાયરે જણાવ્યું કે તે બોલિવૂડ પાર્ટીઝ માટે કેનબિસ (ભાંગ) પૂરી પાડતો હતો. રિયા પાસે કોઈ ડ્રગ્સ ન મળ્યા બાદ એનસીબી લોકલ સંપર્કોના માધ્યમથી એવું શોધવાનો પ્રયાસ કરી રહી છે કે, શું અભિનત્રી સુધી તેમની કોઈ પહોંચ છે કે નહીં. આ પહેલા એનસીબીએ અમુક લીક થયેલી ચેટ્સના આધારે રિયા વિરુદ્ધ એફઆઈઆર દાખલ કરી હતી.

અત્રે ઉલ્લેખનીય છે કે, રિયા અને તેના ભાઈ શોવિક વચ્ચેની માર્ચ ૨૦૨૦ની એક વોટ્સએપ ચેટ બહાર આવી છે. જેમાં રિયા કોઈ વ્યક્તિ અંગે જણાવી રહી છે કે તે દિવસમાં ચાર વાર ડ્રગ્સ ભરેલી સિગરેટ પીવે છે. આ ચેટમાં રિયા સીધે સીધી ડ્રગ્સની માગણી કરતી જોવા મળી છે. રિયા ભલે ડ્રગ્સ લેવાનો ઈનકાર કરે પરંતુ તેની વધુ એક ડ્રગ્સ ચેટ બહાર આવી છે. જેમાં તે ભાઈ શોવિક પાસે ડ્રગ્સની માગણી કરે છે.

તપાસ ટીમમાં મરાઠી સિંઘમ ઓફિસરની એન્ટ્રી થતાં ડ્રગ્સ માફિયામાં ફફડાટ

સુશાંતસિંહ રાજપૂતના મોતના મામલામાં હવે તપાસ ડ્રગ્સ એંગલ પર કે‌ન્દ્રિત થઇ છે. આજે સવારે નાર્કોટિક્સ કંટ્રોલ બ્યૂરો (એનસીબી)એ આરોપી રિયા ચક્રવર્તી અને તેના સાથી સેમ્યુઅલ મિરાન્ડાના ત્યાં દરોડા પાડ્યા હતા. નાર્કોટિક્સ ટીમનું નેતૃત્વ જોઇન્ટ ડાયરેક્ટર સમીર વાનખેડે કરી રહ્યા છે. આમ, સુશાંત કેસના ડ્રગ્સ કનેક્શનની તપાસમાં ડ્રગ્સ નેટવર્કના માફિયા જેનાથી ફફડે છે એવા આ મરાઠી સિંઘમ ઓફિસરની એન્ટ્રી થતાં ખળભળાટ મચી ગયો છે. એનસીબીએ આ કેસમાં ત્રણ ડ્રગ્સ સપ્લાયરની પણ ધરપકડ કરી છે. તેજતર્રાર અધિકારી ગણાતા સમીર વાનખેડે ગોવા અને મહારાષ્ટ્ર ઝોનના ઝોનલ ડાયરેક્ટર છે અને ડ્રગ્સ સાથે સંકળાયેલા કેસમાં સમીર નિષ્ણાત અને માહેર અધિકારી તરીકે ગણાય છે. ર૦૦૮ની બેચના આ અધિકારીની કામગીરી હોલિવૂડ અને બોલિવૂડના સુપર સિંઘમ પોલીસ અધિકારી જેવી છે કે જેઓ રીલ લાઇફમાં નહીં, પરંતુ રિયલ લાઇફમાં સિંઘમ જેવી કામગીરી કરે છે. સમીર વાનખેડે છેલ્લાં કેટલાંક વર્ષથી ડીઆરઆઇમાં કામગીરી કરી મુંબઇથી લઇ ગોવા સુધીના ડ્રગ્સ માફિયા વિરુદ્ધ કાર્યવાહી કરી ચૂક્યા છે. તેમના નેતૃત્વમાં જ છેલ્લાં બે વર્ષની અંદર જ રૂ.૧૭,૦૦૦ કરોડનું નાર્કોટિક્સ જપ્ત કરવામાં આવ્યું છે.

આ ઉપરાંત તાજેતરમાં વાનખેડેના નેતૃત્વમાં રૂ.૧,૦૦૦ કરોડનું હેરોઇન પણ જપ્ત કરવામાં આવ્યું હતું. સમીર વાનખેડેની ટીમે જ આતંકી સંગઠન આઇએસના આતંકી આરીબ મજીદની ધરપકડ કરી હતી.

બોલિવૂડના ટોચના સ્ટાર્સને ડ્રગ્સના સપ્લાય અંગે મહત્ત્વના સુરાગ મળ્યા

સુશાંતસિંહ રાજપૂત મોતના કેસમાં રિયા ચક્રવર્તી અને મિરાન્ડાના ત્યાં નાર્કોટિક્સ બ્યૂરો દ્વારા પાડવામાં આવેલા દરોડા તો એકમાત્ર નાનકડી ઝલક છે. વાસ્તવમાં નાર્કોટિક્સ કંટ્રોલ બ્યૂરોને સુશાંતના મોતના મામલામાં બોલિવૂડના મોટા મોટા ફિલ્મ સ્ટારોને ડ્રગ્સ સપ્લાય કરવાના મહત્ત્વના સુરાગ મળ્યા છે. એનસીબીનાં ઉચ્ચ સૂત્રોના જણાવ્યા પ્રમાણે અબ્બાસ લખાની અને કરણ અરોરાની પૂછપરછ બાદ બોલિવૂડની ટોચની હસ્તીઓને ડ્રગ્સ સપ્લાય અંગેની મહત્ત્વની માહિતી મળી છે. આ બંને બોલિવૂડની ટોચની હસ્તીઓને ડ્રગ્સ સપ્લાય કરતા હતા.

ડીલર્સ બોલિવૂડના ટોચના સ્ટાર્સને હાઇ ક્વોલિટીનું કોકેન પણ સપ્લાય કરતા

એનસીબીને મળેલી લીડના આધારે હવે તે મુંબઇમાં માદક દ્રવ્યોની તસ્કરી અને અન્ય મહાનગરોમાં સામેલ કાર્ટેલ્સ પર એક રાષ્ટ્રવ્યાપી કાર્યવાહી શરૂ કરશે. અબ્બાસ લખાની અને કરણ અરોરાએ પૂછપરછ દરમિયાન એવો ચોંકાવનારો ઘટસ્ફોટ કર્યો છે કે તેઓ બોલિવૂડના ટોચના સ્ટાર્સને માત્ર ગાંજો અને બડ્સ સપ્લાય કરતા ન હતા, પરંતુ હાઇ ક્વોલિટીનું કોકેન પણ સપ્લાય કરતા હતા. રિયા ચક્રવર્તીની વોટ્સએપ ચેટના આધારે એનસીબીએ ડ્રગ બડ્સના સપ્લાય સંબંધમાં જૈદ વિલાત્રા નામના એક શખ્સની ધરપકડ કર્યા બાદ જૈદ, અબ્બાસ અને કરણ વચ્ચેની સાંઠગાઠ બહાર આવી છે.

બોલિવૂડમાં પ્રતિકિલો રૂ.પ કરોડ જેની કિંમત થવા જાય છે તેવા કોકેનની અત્યંત ખર્ચાળ અનેેવૈભવી પાર્ટીઓ યોજાય છે એવો પણ ઘટસ્ફોટ થયો છે.