ક્રાઇમ / સુરતમાં શ્રમજીવી પરિવારની દિવ્યાંગ યુવતી સાથે કેટલાક નરાધમોએ દુષ્કર્મ આચર્યું, દીકરી ગર્ભવતી થતા મામલો સામે આવ્યો

• સુરતના ડીંડોલીમાં શ્રમજીવી પરિવારની યુવતી સાથે દુષ્કર્મ
• યુવતીના પિતાના મિત્રોએ જ દુષ્કર્મ આચર્યાની આશંકા
• યુવતીને ગર્ભ હોવાની જાણ થતા સમગ્ર મામલો સામે આવ્યો

ડીંડોલી ખાતે અંદાજે છેલ્લા ચારેક માસથી એક 24 વર્ષીય અસ્થિર મગજની યુવતી સાથે કેટલાક નરાધમોએ દુષ્કર્મ આચરી તેણીને ગર્ભવતી બનાવી દેતા સમગ્ર વિસ્તારમાં ભારે ચકચાર મચી ગઇ છે. આ અંગે ભોગ બનનાર માનસિક અસ્વસ્થ યુવતીના પિતાએ આ નરાધમો સામે ફરિયાદ આપતા પોલીસે દુષ્કર્મનો ગુનો નોંધી આ મામલે કાયદેસરની કાર્યવાહી હાથ ધરી છે. યુવતીના પિતાની સાથે દારૂ પીવા બેસતા શખ્સોએ જ યુવતી સાથે દુષ્કર્મ આચર્યાની શંકા વ્યક્ત કરવામાં આવી રહી છે.

ડીંડોલી પોલીસ સ્ટેશનમાં દુષ્કર્મની ફરિયાદ નોંધાઇ

યુપી બ્રહાનગંજ ખેરવા ગામ ખાતે રહેતા 6 જેટલા શખ્સો સામે ડીંડોલી પોલીસ સ્ટેશનમાં દુષ્કર્મની ફરિયાદ નોંધાવાઇ છે. ફરિયાદમાં પિતાએ જણાવ્યું હતું કે, 'છેલ્લા ચારેક માસથી આ આરોપીઓ મારી દીકરી મૂકબધિર તેમજ અસ્થિર મગજની છે તેમ જાણે છે. છતાં તેની સાથે અવારનવાર તેઓએ શારીરિક સંબંધ બાંધ્યા.'

યુવતીને ગર્ભ રહી જતા સમગ્ર મામલો સામે આવ્યો

જોકે આ યુવતીને ગર્ભ રહી જતા આ સમગ્ર ચોંકાવનારો મામલો સામે આવ્યો હતો. ત્યાર બાદ આ મામલે તપાસ કરતા આ આરોપીઓએ જ તેણી સાથે દુષ્કર્મ આચરતા તે ગર્ભવતી થઈ હોવાનું જાણવા મળી રહ્યું છે. આથી ડીંડોલી પોલીસે આ ઉપરોક્ત આરોપીઓ સામે બળાત્કારનો ગુનો નોંધી કાયદેસરની કાર્યવાહી હાથ ધરી છે.