ગાંધીનગરઃ બિટકોઈન કૌભાંડ મામલે અમરેલીના SP જગદીશ પટેલની ધરપકડ કરાઈ છે. ગાંધીનગર સિવિલ હોસ્પિટલમાં તબીબી પરીક્ષણ કરાયા બાદ હોસ્પિટલથી જ જગદીશ પટેલની ધરપકડ કરાઈ છે. CID ક્રાઈમની ટીમ સિવિલ હોસ્પિટલથી SP જગદીશ પટેલને લઈને સવાના થઈ ગઈ છે.
બિટકોઈન કૌભાંડમાં જગદીશ પટેલના સસ્પેન્શનની કાર્યવાહી પણ કરવામાં આવી રહી છે. આપને જણાવી દઈએ કે જગદીશ પટેલ અને કેતન પટેલ ફોનથી સતત એકબીજાના સંપર્કમાં હોવાના CID ક્રાઈમને પુરાવા મળ્યા હતા. જે બાદ CID ક્રાઈમે જગદીશ પટેલ સામે ગુનો નોંધી કાર્યવાહી હાથ ધરી હતી.
જગદીશ પટેલના ઘરે જોવા મળ્યું તાળું
બિટકોઈન કૌભાંડમાં સંડોવાયેલા અમરેલીના SP જગદીશ પટેલની લાંબા સમય બાદ CID ક્રાઈમે ધરપકડ કરી છે. ત્યારે SP જગદીશ પટેલના મૂળ વતન એવા હીલોલ ગામે Vtvની ટીમ પહોંચી હતી. પરંતુ અહીં જગદીશ પટેલના ઘર પર તાળું જોવા મળ્યું. જે બાદ અમારી ટીમે જગદીશ પટેલ વિશે ગામના લોકો પાસેથી માહિતી મેળવાનો પ્રયાસ કર્યો હતો.
જાણવા મળ્યું કે હીલોલ ગામમાં જગદીશ પટેલની 40 થી 50 વીઘા જમીન આવેલી છે. આ ઉપરાંત પાણીના બે બોર પણ છે. હાલ આ તમામ જમીન જગદીશ પટેલના ભાઈનો પુત્ર સંભાળી રહ્યો છે. જોકે ગામના મોટા ભાગના લોકોએ જગદીશ પટેલ અંગે વાત કરવાથી પણ અચકાઈ રહ્યા છે.
આપને જણાવી દઈએ કે ફરિયાદી બિલ્ડર શૈલેષ ભટ્ટને દહેગામના એક ફાર્મમાં રાખવામાં આવ્યો હતો. જ્યારે જગદીશ પટેલ પણ દહેગામના જ હીલોલના રહેવાસી છે. તેથી આ કૌભાંડમાં તેમની ભૂમિકા મહત્વપૂર્ણ માનવામાં આવી રહી છે.
અમરેલી LCBના પીઆઇ અનંત પટેલને કરાયા સસ્પેન્ડ
બીટકોઇન કૌભાંડનો મામલે અમરેલી LCBના પીઆઇ અનંત પટેલને સસ્પેન્ડ કરવામાં આવ્યા છે. રાજ્ય પોલીસ વડાએ અનંત પટેલને સસ્પેન્ડ કર્યા છે. બીટ કોઇન કૌભાંડમાં સંડોવણી બહાર આવતા અનંત પટેલને સસ્પેન્ડ કરવામાં આવ્યાં છે. તાત્કાલિક અસરથી અનંત પટેલને સસ્પેન્ડ કરવામાં આવ્યા છે. અનંત પટેલ હાલમાં CID ક્રાઇમના રિમાન્ડ પર છે.