- જ્ઞાનવાપી કેસ મામલે સુપ્રીમ કોર્ટમાં આજે સુનાવણી ટળી
- આવતી કાલે 3 વાગ્યાથી સુપ્રીમ કોર્ટમાં સુનાવણી શરૂ થશે
- વારાણસી કોર્ટની કાર્યવાહી ઉપર પણ રોક લગાવી
સુપ્રીમ કોર્ટે જ્ઞાનવાપી મસ્જિદ કેસની સુનાવણી શુક્રવાર સુધી ટાળી દીધી છે. આ સાથે વારાણસી કોર્ટની કાર્યવાહી પર પણ ત્યાં સુધી રોક લગાવી દેવામાં આવી છે. શુક્રવારે 3 વાગ્યાથી સુપ્રીમ કોર્ટમાં આ મામલે સુનાવણી શરૂ થશે. જસ્ટિસ ડીવાય ચંદ્રચુડની આગેવાની હેઠળની બેન્ચે જણાવ્યું કે, વારાણસી કોર્ટમાં હિન્દુ પક્ષનું પ્રતિનિધિત્વ કરતા વરિષ્ઠ વકીલ હરિ શંકર જૈનની સુનાવણીની છેલ્લી તારીખે તબિયત ખરાબ હતી અને બુધવારે જ તેઓને હોસ્પિટલમાંથી રજા આપવામાં આવી હોવાનું જાણવા મળ્યું હતું.
સુનાવણી દરમિયાન જુઓ કોર્ટરૂમમાં શું થયું?
સુપ્રીમ કોર્ટમાં જસ્ટિસ ડીવાય ચંદ્રચુડ, જસ્ટિસ સૂર્યકાંત અને જસ્ટિસ પીએસ નરસિમ્હાની બેન્ચમાં સુનાવણી શરૂ થઈ. હિંદુ પક્ષે કોર્ટમાં કહ્યું કે, અમે હજુ સુધી એફિડેવિટ દાખલ નથી કરી, આથી હજુ વધુ સમય આપવામાં આવે, જેની પર કોર્ટે મુસ્લિમ પક્ષને પૂછ્યું કે તમને કોઈ સમસ્યા છે?
તેની પર મુસ્લિમ પક્ષના વકીલ હુઝૈફા અહમદીએ કહ્યું કે કોઈ સમસ્યા નથી, માત્ર દિવાલ તૂટવા અને વઝુખાનાને લઈને નીચલી કોર્ટમાં સુનાવણી થવાની છે. ત્યાર બાદ કોર્ટે કહ્યું કે, અમે આદેશ જારી કરી રહ્યાં છીએ કે કોઇ પણ એક્શન વારાણસી લોઅર કોર્ટ તરફથી ના કરવામાં આવે.
વારાણસી કોર્ટમાં સર્વે રિપોર્ટ રજૂ કરાયો
જ્ઞાનવાપી મસ્જિદ મામલે વારાણસી કોર્ટમાં સર્વેનો ફાઈનલ રિપોર્ટ રજૂ કરી દેવાયો છે. કોર્ટ કમિશનર વિશાલ સિંહે જે રિપોર્ટ રજૂ કર્યો છે તેમાં 3 દિવસના સરવેના લેખા-જોખા છે. સહાયક કોર્ટ કમિશનર અજય પ્રતાપ સિંહના જણાવ્યા અનુસાર આ રિપોર્ટ 10થી 15 પાનાનો છે. આ રિપોર્ટ 14થી 16 મે વચ્ચે થયેલા સર્વે અંગેનો છે. સિવિલ જજ સીનિયર ડિવિઝન રવિકુમાર દિવાકરની કોર્ટમાં રિપોર્ટ જમા કરાવ્યા બાદ સ્પેશિયલ કોર્ટ કમિશનર એડવોકેટ વિશાલ સિંહે કહ્યું કે, અમે સીલબંધ કવરમાં વીડિયો ચિપ પણ દાખલ કરી છે. કોર્ટ સમક્ષ તમામ વિગતો રજૂ કરવામાં આવી છે.
રિપોર્ટ અંગે અજય પ્રતાપ સિંહે કોર્ટમાં જમા કરતા પહેલાં કહ્યું હતું કે, કોર્ટે અમને જ્ઞાનવાપી મસ્જિદનો સર્વે કરવાની જવાબદારી સોંપી હતી અને અમે 14, 15, 16 મેના રોજ સર્વે હાથ ધર્યો. અમે ખૂબ જ નિષ્ઠાથી સર્વે રિપોર્ટ તૈયાર કર્યો છે.
આ અરજી પર મંગળવારે સુપ્રીમ કોર્ટમાં સુનાવણી થઈ હતી. અરજી પર સુનાવણી કરતી વખતે કોર્ટે 3 મહત્વની વાત કહી...
શિવલિંગ હોવાનો દાવો કરતી જગ્યાની રક્ષા કરવી જોઈએ.
મુસ્લિમોને નમાઝ અદા કરવાથી રોકવું જોઈએ નહીં.
માત્ર 20 લોકો જ નમાઝ અદા કરે છે તે આદેશ હવે લાગુ નથી.
વારાણસીની નીચલી કોર્ટે સર્વે કરવાનો આપ્યો હતો નિર્દેશ
વારાણસી કોર્ટે 16 એપ્રિલના રોજ દિલ્હીની રહેવાસી રાખી સિંહ અને બનારસની રહેવાસી લક્ષ્મી દેવી, સીતા સાહુ, મંજૂ વ્યાસ અને રેખા પાઠકની અરજી પર સર્વેનો આદેશ આપ્યો હતો. કોર્ટે આ સર્વે માટે કોર્ટ કમિશનરની પણ નિયુક્તિ કરી હતી.
18 ઓગસ્ટ 2021ના રોજ ચારેય મહિલાઓએ એક અરજી દાખલ કરી કે જેમાં કહેવામાં આવ્યું હતું કે, જ્ઞાનવાપી પરિસરમાં હિંદુ દેવી-દેવતાઓનું સ્થાન છે. એવામાં જ્ઞાનવાપી પરિસરમાં માં શ્રૃંગાર ગૌરીના નિયમિત દર્શન-પૂજાની પરવાનગી આપવામાં આવે.
