હવે કારનું પણ 'ફેમિલી પ્લાનિંગ' કરો, સુપ્રીમ કોર્ટનો આદેશ

દિલ્હી એનસીઆરમાં વાહનોની વધતી જતી સંખ્યાને લઇને સુપ્રીમ કોર્ટે ગંભીર ચિંતા વ્યકત કરી છે. સુપ્રીમ કોર્ટે કારની સંખ્યા અને પ્રદૂષણને ધ્યાનમાં રાખીને જણાવ્યું હતું કે કુટુંબ નિયોજનની જેમ ગાડીઓ માટે પણ આવો કોઇ પ્લાન લાવવાની જરૂર છે.



દિલ્હી અને એનસીઆરમાં કારની સંખ્યા એક કરોડને પાર થઇ ગઇ છે. દર વર્ષે કારની સંખ્યામાં સાત લાખનો વધારો થઇ રહ્યો છે. તેના પર ચિંતા વ્યકત કરતાં સુપ્રીમ કોર્ટે જણાવ્યું છે કે કારની સંખ્યા નિયંત્રિત અને નિર્ધારિત કરવા માટે કુટુંબ નિયોજનની 'હમ દો હમારે દો' જેવી કોઇ કેમ્પેઇનની જરૂર છે.



તેનાથી પાટનગરમાં વસતા લોકો પર અમર્યાદિત વાહનો ખરીદવાની પ્રવૃત્તિ પર રોક લાગશે. ન્યાયમૂર્તિ અરુણ મિશ્રા અને ન્યાયમૂર્તિ દીપક ગુપ્તા દ્વારા દિલ્હીના લોકો પર મોટી સંખ્યામાં કરવામાં આવતી ગાડીઓની ખરીદી પર ગંભીર ચિંતા વ્યકત કરવામાં આવી છે. ગાડીઓની વધતી જતી સંખ્યાને કારણે ગીચ ટ્રાફિક અને પ્રદૂષણને લઇને સુપ્રીમ કોર્ટ ચિંતિત છે.



સુપ્રીમ કોર્ટની બેન્ચે જણાવ્યું હતું કે દિલ્હીને રહેવા લાયક સ્થળ બનાવવા માટે કારની સંખ્યા ઘટાડવી અનિવાર્ય છે. સુપ્રીમ કોર્ટે પાર્કિંગની સમસ્યાને લઇને થતા ઝઘડા પર પણ ટિપ્પણી કરી હતી. બે જજોની બેન્ચે જણાવ્યું હતંુ કે એવો પરિવાર કે જેમાં કમાનાર સભ્યોની સંખ્યા બે કે તેથી વધુ હોય ત્યાં એકથી વધુ સંખ્યામાં કાર રાખવા સામેે વાંધો હોઇ શકે નહીં, પરંતુ આજ કાલ એક એવો ટ્રેન્ડ ચાલી રહ્યો છે કે જ્યારે એક જ વ્યકિત પાસે પાંચથી વધુ કાર હોય છે. પાર્કિંગને લઇને પડોશીઓ સાથે તેમને સતત ઝઘડા થતા રહે છે.