- ગુજરાતમાં જામ્યો વરસાદી માહોલ
- ડાંગમાં વરસાદને લીધે સર્જાયા આહલાદ્ક દ્રશ્યો
- ગાઢ ધુમ્મસને કારણે વિઝિબલિટી ઘટતા વાહનચાલકો પરેશાન
ગુજરાતમાં વરસાદી માહોલ જામ્યો છે.. મેઘરાજા મહેર વરસાવી રહ્યા છે. ત્યારે ગુજરાતનું સ્વર્ગ ગણાતા ડાંગમાં ચોમાસાને લઇને કંઇક અલગ જ નજારો જોવા મળી રહ્યો છે. ડાંગનું સૌંદર્ય સોળે કળાએ ખીલી ઉઠ્યું છે. આ એવી જગ્યા છે જ્યાં કુદરતની નજીક રહ્યા હોય તેવી લાગણી થાય. ત્યારે વરસાદને લઇને ડાંગના અદભૂત દ્રશ્યો સામે આવ્યા છે.
ડાંગમાં સોળે કળાએ ખીલી પ્રકૃતિ
ડાંગ જિલ્લામાં પણ ચોમાસુ જામ્યું છે. ડાંગના આહવા, વઘઈ, સુબિર અને સાપુતારામાં વરસાદ પડી રહ્યો છે. ધીમીધારે વરસાદ થતા ડાંગમાં આહલાદ્ક વાતાવરણ જોવા મળી રહ્યું છે. ત્યારે વાત કરીએ ગીરીમથક સાપુતારાની તો જાણે અહીં આવીને માઉન્ટ આબુમાં હોઇએ તેવો અહેસાસ થાય. કારણ કે વરસાદી માહોલ વચ્ચે ગાઢ ધુમ્મસ, વાતાવરણમાં ઠંડકની લહેર અને પાછુ વળી પ્રકૃતિનો સુંદર નજારો. આવા કુદરતી માહોલમાં રહેવુ કોને ન ગમે, ત્યારે સાપુતારામાં પણ ચોમાસુ જામતા પ્રવાસીઓએ આ તરફ દોટ મૂકી છે. કુદરતનો આ નજારો માણવા માટે સાપુતારા લોકોમાં આકર્ષણનું કેન્દ્ર બન્યું છે. ગાઢ ધુમ્મસને કારણે વાહનચાલકોએ ધોળા દહાડે લાઇટ ચાલુ કરવાની ફરજ પડી છે. કારણ કે ધુમ્મસને લીધે વિઝિબલિટી ઘટી જતા વાહનચાલકોએ થોડી મુશ્કેલી વેઠવાનો વારો આવ્યો છે.
ગુજરાતમાં મેઘો ધોધમાર
ગુજરાતમાં વરસાદી માહોલ જામ્યો છે. વલસાડમાં મેઘાએ તોફાની બેટિંગ કરી.વલસાડમાં સરેરાશ 4.48 ઈંચ વરસાદ વરસ્યો છે. જેમાં સૌથી વધુ પારડીમાં 4 ઈંચ વરસાદ નોંધાયો છે. સાથે વાપીમાં 2.27 ઈંચ અને ઉમરગામમાં 2 ઈંચ વરસાદ થયો છે. જ્યારે કપરાડામાં 1.4 ઈંચ અને ધરમપુરમાં 1.20 ઈંચ વરસાદ થયો છે. બનાસકાંઠા જિલ્લામાં વરસાદની આતુરતાનો અંત આવ્યો છે. ડીસા સહિતના આસપાસના વિસ્તારમાં ધોધમાર વરસાદ પડતાં વરસાદથી ધરતીપુત્રોમાં ખુશીનો માહોલ થઈ ગયો હતો. તેમજ બોટાદમાં વરસાદથી નદીઓમાં નવા નીર આવ્યા છે. રાણપુરની ભાદર નદીમાં નવા નીરની આવક થવા લાગી છે
4 દિવસ સાર્વત્રિક વરસાદની આાગહી
રાજ્યમાં 4 દિવસ સાર્વત્રિક વરસાદની આગાહી છે જેમાં સૌરાષ્ટ્ર, મધ્ય ગુજરાત, ઉત્તર ગુજરાત, બનાસકાંઠા, સાબરકાંઠા, અરવલ્લી, કચ્છ, જામનગર, દ્વારકા, પોરબંદરમાં ભારે વરસાદની આગાહી કરવામાં આવી છે. પરિણામે હાલમાં ગુજરાતમાં વરસાદી માહોલ જોવા મળી રહ્યો છે.
