કાર્યવાહી / અમદાવાદમાં પથ્થરમારાની ઘટના બાદ શહેર કોટડા પોલીસ એક્શનમાં: 28 આરોપીઓને દબોચ્યાં, જાણો સમગ્ર ઘટના

 

• શહેર કોટડામાં પોલીસ પર પથ્થરમારાની ઘટનાનો મામલો
• પોલીસે 28 આરોપીની કરી ધરપકડ
• બુધવારે પોલીસ પર થયો હતો પથ્થરમારો

અમદાવાદના શહેર કોટડામાં ગઈકાલે બે જૂથ વચ્ચે અથડામણ સર્જાઈ હતી. પોલીસ કંટ્રોલ રૂમના આધારે માહિતી મળતા PCR વાન ઘટના સ્થળે દોડી આવી હતી. આ દરમિયાન પોલીસે ટોળાને વિખેરવાનો પ્રયાસ કર્યો હતો.

શહેર કોટડામાં મોડી રાત્રે પથ્થરમારો 
પોલીસની કામગીરી દરમિયાન અસામાજિક તત્વોએ પોલીસ પર પથ્થરમારો કર્યો હતો. પથ્થરમારાની ઘટનામાં 2 પોલીસકર્મીઓ ઈજાગ્રસ્ત થયા હતા. જેઓને સારવાર અર્થે હોસ્પિટલ ખાતે ખસેડવામાં આવ્યા હતા. 

32 આરોપીઓ સામે નામજોગ ફરિયાદ 
આ મામલે પોલીસે પથ્થરમારો કરનાર 32 આરોપી સામે નામજોગ ફરિયાદ દાખલ કરી હતી. સાથે જ પોલીસે 150થી વધુના ટોળા વિરુદ્ધ ફરિયાદ દાખલ કરી હતી. જેમાંથી પોલીસે આખી રાત કાર્યવાહી કરીને 28 લોકોની ધરપકડ કરી છે. 

પોલીસે 28 આરોપીઓની કરી ધરપકડ
આ પથ્થરમારાની ઘટનામાં કોણ-કોણ સામેલ હતા અને ક્યાં કારણોસર આ જૂથ અથડામણ સર્જાઈ હતી તે અંગે હાલ પોલીસ દ્વારા 28 લોકોની પૂછપરછ ચાલી રહી છે. 

ગયા મહિને સાવલીના તલાવડી વિસ્તારમાં થયો હતો પથ્થરમારો
અત્રે ઉલ્લેખનીય છે કે, ગયા મહિને વડોદરાના સાવલીમાં પથ્થરમારાની ઘટના સામે આવી હતી. જેમાં 5થી વધુ લોકો ઇજાગ્રસ્ત થયા હતા. શહેરના સાવલીના તલાવડી વિસ્તારમાં બે જૂથ વચ્ચે પથ્થરમારો થતા સમગ્ર વિસ્તારમાં વાતાવરણ ઉગ્ર બન્યું હતું. તલાવડી વિસ્તારમાં એકાએક બે જૂથ વચ્ચે બોલાચાલી થતા મામલો ઉગ્ર બનતા બંને જૂથ વચ્ચે પથ્થરમારો શરૂ થઇ ગયો હતો. જેમાં 5થી વધુ લોકો ઇજાગ્રસ્ત પણ થયા હતા. જોકે આ ઘટનાની પોલીસને જાણ થતા જ તુરંત ઘટનાસ્થળે સાવલી પોલીસ પહોંચી ગઇ હતી. બાદમાં પોલીસે ટોળાને વિખેરી સમગ્ર મામલો થાળે પાડ્યો હતો.