ભાવનગર / 'આ બિલ્ડિંગ જર્જરિત, દૂર રહેવા વિનંતી' : સર ટી. હોસ્પિટલના પાંચમાં માળે ચેતવણીના બેનરો લાગતા દર્દીના જીવ તાળવે ચોંટ્યા

• ભાવનગરની સર.ટી.હોસ્પિટલનું બિલ્ડીંગ જોખમી હોવાના લાગ્યાં બેનર
• બિલ્ડીંગના પાંચમાં માળે છત-દિવાલો જર્જરિત
• તંત્ર દ્વારા જ લોકોને સૂચના આપતા બેનરો હોસ્પિટલમાં લગાવાયા

ભાવનગરની સર.ટી.હોસ્પિટલ ભાવનગર પંથકના ગરીબ અને મધ્યમ વર્ગના લોકો માટે આશીર્વાદરૂપ સાબિત થઇ છે. પરંતુ જ્યાં હજ્જારો દર્દીઓની સારવાર કરવામાં આવી રહી છે તે હોસ્પિટલનું બિલ્ડીંગ જોખમી હોવાના બેનરો લાગ્યાં છે. હોસ્પિટલના પાંચમાં માળે ચેતવણી આપતા બેનરો લગાવવામાં આવ્યા છે. મહત્વનું છે કે, સબંધિત વિભાગ દ્વારા આપવામાં આવેલી સૂચનાને પગલે આંખ વિભાગના ફ્લોર પર છત-દિવાલો જોખમી હોવાના પોસ્ટરો લગાવી દેવામાં આવ્યા છે ત્યારે આ અંગે તાત્કાલિક કાર્યવાહી કરવામાં આવે તેવી લોકોમાં માંગ ઉઠી છે. 

લોકહિતને પગલે સલામતીના બેનર લગાવતુ હોસ્પિટલ તંત્ર 
ભાવનગરની સર.ટી.હોસ્પિટલમાં દરરોજ હજ્જારોની સંખ્યામાં દર્દીઓની ઓપીડી અને ઓપરેશન કરવામાં આવી રહ્યા છે. પરંતુ સમયના વ્હાણા વીતી જતાં ભાવનગરની સર.ટી.હોસ્પિટલનું બાંધકામ જીર્ણ થવા લાગ્યું છે જેને પગલે હોસ્પિટલની છતમાંથી અવારનવાર પોપડા ખરવાના કિસ્સાઓ પ્રકાશમાં આવ્યા છે. અમુક બનાવોમાં તો દર્દી અને તેંના સગાઓ પર પણ પોપડા ખર્યાના કિસ્સાઓ હજરાહજુર છે. વધુમાં હોસ્પિટના બાંધકામના તળીયે ગટર ઉભરાવાની પણ ભૂતકાળમાં ફરિયાદ ઉઠી છે. ત્યારે હવે જ્યાં આંખ વિભાગ કાર્યરત છે તે હોસ્પિટલનો પાંચમો માળ જોખમી હોવાનું ખુદ તંત્રએ સ્વીકાર્યું છે. એટલું જ હોસ્પિટલમાં સારવાર અર્થે આવતા દર્દીઓ અને તેના સબંધીઓના હિતને ધ્યાને લઈને  ખુદ હોસ્પિટલ સંચાલકો દ્વારા પાંચમો માળ જોખમી હોવાના બેનરો પ્રસિદ્ધ કરાયા છે અને સતર્ક રહેવાં બેનરમાં સૂચન કરાયું છે. 

જર્જરીત બિલ્ડિંગને નવુંરૂપ આપવા લોક માંગ
ત્યારે લોકોમાંથી ઊઠતો સવાલ એ છે કે, માત્ર બેનર પ્રસિદ્ધ કરવાથી જવાબદારી પૂર્ણ થતી નથી. પરતું આંખ વિભાગની મુલાકાતે આવતા કોઇ પણ લોકોને નુકસાન કે જાનહાનિ ન થયા તે પહેલા સબંધિત વિભાગને જાણ કરી કામ મંજૂર કરાવવું જોઈએ. બેનર લગાવવાની મથામણ મૂકી તંત્ર દ્વારા આ બાંધકામને નવુંનકોર બનાવવાની દિશામાં કાર્યવાહી કરવી જોઈએ તેવું લોકોમાં ચર્ચાઇ રહ્યું છે.