ચેતજો / સ્વાસ્થ્ય માટે ફાયદાકારક આદુ પહોંચાડી શકે છે ગંભીર નુકસાન, જાણો કેટલી માત્રામાં સેવન કરવું

• આદુના અનેક સ્વાસ્થ્ય ફાયદા છે
• પરંતુ વારંવાર આદુની ચા પીવો છો તો ચેતજો
• વધુ પ્રમાણમાં આદુનું સેવન છે નુકસાનકારક

છાતીમાં બળતરા

ચામાં થોડું આદુ નાખીને પીવાથી તેનો સ્વાદ પણ વધે છે અને ડાઈજેશન પણ સારું રહે છે પણ જ્યારે પણ ચા પીવો તેમાં આદુ નાખો તો તેના કારણે ઘણીવાર છાતીમાં બળતરાની સમસ્યા થઈ શકે છે અને પાચનમાં પણ ગરબડી થઈ શકે છે. 

અનિદ્રાની તકલીફ

રાતે આદુવાળી ચા પીવાથી બચવું જોઈએ. કારણ કે તેનાથી બેચેની અને અનિદ્રાનો પ્રોબ્લેમ થઈ શકે છે. રાતે આદુવાળી ચા પીવાથી ઘણાં સમય સુધી ઊંઘ આવતી નથી, કારણ કે તેનાથી બ્રેન એક્ટિવ થઈ જાય છે અને છાતીમાં બળતરા જેવી સમસ્યા પણ થઈ શકે છે. 

બ્લડ શુગર

વધુ પ્રમાણમાં આદુવાળી ચા પીવાથી બ્લડ શુગર લેવલ પણ ઘટી જાય છે. તેના કારણે હાઈપોગ્લાઈસીમિયાની સ્થિતિ પેદા થઈ શકે છે. જેથી શુગરના દર્દીઓ અથવા જેમનું શુગર લેવલ નોર્મલ રહે છે આદુનું વધુ સેવન કરવાથી બચવું જોઈએ. શુગરની કમી શુગર વધવા કરતાં વધુ હાનિકારક હોય છે. કારણ કે તેમાં દર્દીને ચક્કર આવવા, બેભાન થઈ જવાથી લઈ અચાનક પડી જવાની પણ સમસ્યા થઈ શકે છે. 

એસિડિટી

યોગ્ય માત્રામાં આદુનું સેવન ફાયદો આપે છે પણ વધુ પ્રમાણમાં તેનું સેવન કરવાથી હાર્ટ બર્ન, ઓડકાર અને દસ્ત જેવી સમસ્યાઓ થઈ શકે છે. આદુની ચા પેટમાં એસિડનું લેવલ વધારી દે છે. જેના કારણે એસિડ રિફલક્સનો પ્રોબ્લેમ થાય છે અને એસિડિટીની સમસ્યા વધે છે. 

બીપી

જે લોકોને હાઈ બીપીની સમસ્યા હોય તેઓ યોગ્ય માત્રામાં આદુનું સેવન કરે તો ફાયદો થઈ શકે છે પણ જે લોકોને બીપી લો રહેતું હોય તેમના માટે વધુ પ્રમાણમાં આદુ બહુ જ નુકસાનકારક સાબિત થઈ શકે છે, કારણ કે આદુમાં લોહીના પાતળું કરવાના ગુણ હોય છે. એવામાં લો બીપીમાં સીમિત માત્રામાં જ આદુનું સેવન કરવું. 

આટલા પ્રમાણમાં આદુનું સેવન કરવું

દરેક વખતે આદુવાળી ચા પીવાથી ઘણી પરેશાનીઓ થઈ શકે છે. જેથી સામાન્ય વ્યક્તિ માટે રોજ 5 ગ્રામ આદુનું સેવન કરવું જોઈએ. આ સિવાય 1 કપ ચામાં 1/4 ચમચી આદુ જ નાખવું. પ્રેગ્નેન્ટ મહિલાઓએ એક દિવસમાં 2.5 ગ્રામ આદુનું સેવન કરવું. ડાઈજેશન ખરાબ રહેતું હોય ત્યારે 1.2 ગ્રામથી વધુ આદુનું સેવન નુકસાન કરી શકે છે.