પાપ છાપરે / શિવાંશ કેસ: સચિનની આ એક ભૂલના કારણે ફૂટ્યો ભાંડો, નહીં તો મહેંદીની હત્યા બની રહેત એક રાઝ!

• શિવાંશને તરછોડવા જતા હત્યાનો કેસ સામે આવ્યો 
• શિવાંશની માતા અને  પોતાની પ્રેમિકા મહેંદીની કરી હત્યા 
• સચિન દીક્ષિત પોલીસ પાસે બની ગયો પોપટ;રાઝ ખુલ્યા 

ગાંધીનગરના પેથાપૂરમાં બાળકને તરછોડવા ગયેલા પિતા સામે પ્રેમિકાની હત્યાનો પણ ગુનો બન્યો છે. બાળકને તરછોડ્યો ના હોત તો એક મહિલાની હત્યાનો કેસ અને હત્યારા સુધી પહોચતા પોલીસને આટલી જલ્દી સફળતા કદાચ ના હાથ લાગી હોત.

પાપ છાપરે ચઢીને પોકાર્યું તે આનું નામ 

છેલ્લા 48 કલાક કરતા વધુ વધુ સમયથી રાજ્ય આખાના  મો પર એક જ ચર્ચા છે 10 માસના બાળક શિવાંશની.એવી કઈ જનેતા હશે કે ફૂલ જેવા માસુમ બાળકને તરછોડતા જીવ ચાલ્યો હશે.પરંતુ, દિવસ રાતની જહેમતથી ગાંધીનગર પોલીસે માત્ર બાળકના પિતા જ નહિ પરંતુ બાળકની માતાના હત્યારા પ્રેમીને પણ શોધી કાઢી,સીલસીલાબંધ કેફિયત પોપટની માફક કઢાવી છે. ત્યારે, સૌથી મોટી બાબત એ છે કે બાળકનો પિતા સચિન દીક્ષિત જો શિવાંશને પેથાપૂર ગૌશાળામાં છોડવા નાં ગયો હોત,તો બાળક શિવાંશની માતા અને પોતાની પ્રેમિકા મહેંદી અંગે કોઈ ખુલાસો કદાચ સત્વરે ના થાત. બાળક તરછોડવા પાછળ પોલીસને પ્રેમિકાના હાથ ખૂનથી રંગાયેલા પ્રેમી સુધી લઇ ગયા છે.

લાશને બેગમાં પેક કરી,રસોડામાં મૂકી 

કહેવાય છે કે 'પાપ છાપરે ચઢીને પોકારે છે' એ કહેવત અહીં સાચી પડી છે. વડોદરાની ખાનગી કંપનીમાં નોકરી કરતા અને ગાંધીનગરમાં માતા-પિતા અને પત્ની સાથે રહેતો સચિન દીક્ષિત પોતાની પ્રેમિકા કહેવાતી મહેંદી  ઉર્ફ હીના પેથાણી સાથેના સંબંધથી બાળક શિવાંશનો જન્મ 2020 માં થયો. પોલીસ થિયરી મુજબ,સચિન દીક્ષિત અને પ્રેમિકા મહેંદી વચ્ચે પરિવાર સાથે રહેવાની બાબતે થયેલી ઉગ્ર બોલાચાલી બાદ, મહેંદીની ગળું દબાવી સચિને હત્યા કરી નાખી હતી. બાદમાં મૃતદેહને બેગમાં પેક કરીને રસોડામાં મૂકી દીધો હતો. સૌથી મોટો સવાલ એ છે કે, એ જ દિવસે મહેંદી ઉર્ફ હીના ની હત્યા થઇ,જે દિવસે શિવાંશને ગૌશાળામાં તરછોડવા સચિન પેથાપૂર પહોચ્યો હતો.