ખાડાનો વિકાસ / તંત્રને ઢંઢોળવાની અનોખી રીત! ખખડધજ રોડ પર ગામ લોકોએ કર્યું વૃક્ષારોપણ, કરાયો અનોખો વિરોધ

• ગામડાના માર્ગને વખણાવતો નેશનલ હાઇવે પરનો મુખ્ય માર્ગ
• માર્ગને ડામરથી મઢવા લોકોએ કરી માંગ
• મસમોટા ખાડાઓમાં પાણી ભરાઇ જતાં થાય છે અકસ્માતો

રાજકોટના શાપર-વેરાવળથી પારડી સુધીનો માર્ગ દોઢ વર્ષથી બિસ્માર હાલતમાં છે. આ અંગે અનેક વખત રજૂઆત કરવા છતાં સબંધિત વિભાગ દ્વારા રોડનું સમારકામ હાથ ન ધરતા લોકોમા રોષ ભભૂકી રહ્યો છે. ત્યારે આ અંગે નવતર વિરોધ પ્રદર્શન કરવામાં આવ્યું હતુ. જેમાં ખખડધજ રોડના ખાડામાં વૃક્ષારોપણ કરવામાં આવ્યું હતું. છેલ્લા 2 વર્ષથી રોડ પર ખાડાની સમસ્યાને કારણે ચોમાસામાં મુશ્કેલી સર્જાઇ રહી હોવાથી લોકોએ આક્રોશ થાલાવ્યો હતો.

શાપર-વેરાવળ રોડ પર વૃક્ષારોપણ કરી વિરોધ
શાપર-વેરાવળથી પારડી સુધીના બિસ્માર માર્ગને લઈને ચોમાસામાં અકસ્માતોમાં વધારો થયો છે. વધુમાં શાપર ઈન્ડસ્ટ્રીયલ એરિયા હોવાથી કામદારો, એકમના માલિકો સહિતના લોકોની સતત અવરજવર રહેતી હોય છે. જેથી આ માર્ગને લઇ સ્થાનિઓ, ઈન્ડસ્ટ્રીઝ એસોસિએશનો અને ગ્રામ પંચાયતના સભ્યો અનેક વખત રજૂઆત કરી ચૂક્યા છે. ઉપરાંત થોડા સમય પહેલાં ધારાસભ્ય લાખા સાગઠિયાએ પણ સમીક્ષા કરી હતી. આમ છતાં તંત્ર દ્વારા રોડ પરના ખાડા પુરવાનું કામ કરવામાં આવ્યું નથી. જેથી સ્થાનિકો, ઈન્ડસ્ટ્રીઝ એસોસિએશન અને ગ્રામ પંચાયતના સભ્યોએ ખાડાઓમાં વૃક્ષારોપણ કરીને વિરોધ નોંધાવ્યો છે.

ઈન્ડસ્ટ્રીઝ એસો. અને ગ્રામ પંચાયતના સભ્યો કરી ચૂક્યા છે રજૂઆતો
એટલું જ નહિ નેશનલ હાઇવે પરનો મુખ્ય માર્ગ ગામડાઓના માર્ગને પણ વખણાવે તેવો છે. ચોમાસાની ઋતુ દરમિયાન રોડ પર ગોઠણસમાં મસમોટા ખાડ પડી જાય છે અને આ ખાડામાં પાણી ભરાઈ જતું હોવાથી વાહનચાલકોને ધ્યાને ન આવતા અકસ્માતો થઇ રહ્યા છે. રોડને ડામરની મઢવાની માંગ સામે અનેક વખત રજૂઆત કરવા છતાં પ્રશ્ન ઉકેલાયો નથી. આથી તંત્રને પ્રજાની સમસ્યા ઉકેલવામાં કોઇ રસ ન હોય તેવું લાગી રહ્યું છે. તો બીજી તરફ સુવિધાના નામે લોકો પાસેથી ઉસેડાતા ટેક્સની રકમ કયા જાય છે તેવા લોકોમાં સવાલો ઊભા થયા છે. આ રોડને નવું રૂપ આપવા પાછળ કયું વિઘ્ન આડે આવી રહ્યું છે? તે લોકોને સમજાતું નાથી.

સળગતા સવાલો

• તંત્રને આ રોડ કેમ દેખાતો નથી?
• તંત્ર શા માટે સારા રોડ નથી આપી શકતું?
• કોન્ટ્રાક્ટરો શા માટે સારા રોડ નથી બનાવતા?
• શું કોન્ટ્રાક્ટરો તંત્રને ગણકારતા નથી?
• આ રોડ બનાવનારા કોન્ટ્રાક્ટર વિરુદ્ધ ક્યારે કાર્યવાહી થશે?
• જનતાને ક્યારે સારો રોડ મળશે?
• આ રોડના કારણે અકસ્માત થશે તો જવાબદાર કોણ?
• દોઢ વર્ષ બાદ પણ કેમ રોડ બનતો નથી?