ચૂંટણીનું ચકડોળ / શંકર ચૌધરીને વાવથી નહીં થરાદ બેઠક પરથી ટિકિટ મળશે? અટકળો તેજ થતાં ખુદ કરી ચોખવટ

• શંકર ચૌધરીનું ઢીમા ખાતે મોટુ નિવેદન 
• પાર્ટી જ્યાથી ટિકિટ આપશે ત્યાંથી હું ચૂંટણી લડીશ: શંકર ચૌધરી
• વાવ બાદ થરાદમાં પણ ચાલે છે ચૂંટણી લડવાની અટકળો : ચૌધરી

ગુજરાતમાં ચૂંટણીને પગલે રાજકીય પક્ષોમાં કામગીરીનો ધમધમાટ ચાલી રહ્યો છે. તેવામાં ભાજપ દ્વારા ટિકિટ અંગે કોઈ જાહેરાત હજુ સુધી કરવામાં આવી નથી. ત્યારે  બનાસકાંઠા જિલ્લાના ઢીમાં ખાતે શંકરભાઈ ચૌધરીનું મોટું નિવેદન સામે આવ્યું છે. જેમાં શંકર ચૌધરીએ પાર્ટી જ્યાંથી ટિકીટ આપશે ત્યાંથી ચૂંટણી લડવાની તૈયારી દર્શાવી છે.

શંકર ચૌધરીની થરાદમાં ચૂંટણી લડવાની ચાલે છે અટકળો 
ઢીમાં ખાતે ધરધીધર મંદિર ખાતે શંકરભાઈ ચૌધરીએ પોતાના સમર્થકો સાથે આરતી કરી હતી. ત્યારબાદ તેમણે નિવેદન આપ્યું હતું. શંકર ચૌધરી વાવ બાદ થરાદમાં  ચૂંટણી લડવાની અટકળો પણ ચાલે છે. તેમણે વધુમાં જણાવ્યું કે ઢીમાં ખાતે ભગવાન ધરણીધરની મહાઆરતી કરવાનો લહાવો મળ્યો. આ ભક્તિમય ક્ષણે વડાપ્રધાન નરેન્દ્ર મોદીના નેતૃત્વમાં ભારતીય જનતા પાર્ટી બનાસકાંઠાની તમામ બેઠકો જીતે અને સૌનો સાથ, સૌના વિકાસની આ યાત્રા ધબકતી રહે તેવી તમામ કાર્યકરો સાથે પ્રાર્થના કરી હતી.

અગાઉ  અલ્પેશ ઠાકોરે ચૂંટણી લડવાને લઇને કર્યો હતો આડકતરો ઇશારો
અગાઉ પાટણના રાધનપુરમાં બનાસ ડેરીના દૂધ દિન મહિલા જાગૃતિ કાર્યક્રમમાં અલ્પેશ ઠાકોરએ મહત્વનું નિવેદન આપ્યું  હતું. રાધનપુરમાં અલ્પેશ ઠાકોરનો ચૂંટણી લડવાને લઈને આડકતરો ઈશારો જોવા મળ્યો હતો. વિધાનસભાની ચૂંટણીમાં રાધનપુરમાં સીટ માટે અલ્પેશ ઠાકોરે દાવો કર્યો છે. તો બીજી બાજુ શંકર ચૌધરી માટે પણ વાવથી ચૂંટણી લડવાનો અલ્પેશ ઠાકોરે દાવો કર્યો  હતો અને બનેને જિતાડવા તંજ કસ્યો હતો.