ગોઝારો FRIDAY / ગુજરાતમાં આજે એક નહીં 7-7 સ્થળોએ સર્જાયા ગંભીર અકસ્માત: 6નાં મોત, 3 ઇજાગ્રસ્ત, એકની હાલત ગંભીર

• રાજ્યમાં અલગ-અલગ અકસ્માતમાં 6 લોકોના મોત, 4 ઇજાગ્રસ્ત 
• અમદાવાદના ઠક્કરબાપા નગર પાસે હિટ એન્ડ રન, યુવકનું મોત
• રાજકોટ રિંગ રોડ પર બાઇકસવારનું કમકમાટીભર્યું મોત  
• ભરૂચમાં કાર ચાલકે એક્ટિવાને ટક્કર મારતા યુવતીનું મૃત્યુ
• મહેસાણાના મેવડ ટોલનાકા નજીક  હિટ એન્ડ રનમાં વૃધ્ધનું મોત 
• ધ્રોલના-રાજકોટ-જામનગર હાઇવે પર થયો અકસ્માતમાં 2 લોકોના મોત 

રાજ્યમાં સતત અકસ્માતની ઘટનાઓમાં સતત વધારો થઈ રહ્યો છે. પ્રાથમિક વિગતો મુજબ છેલ્લા 24 કલાકમાં ગુજરાતમાં અલગ-અલગ 7 અકસ્માતની ઘટનાઓમાં 6 વ્યક્તિઓના કરુણ મોત થયા છે. આ સાથે 4થી વધુ લોકો ગંભીર રીતે ઇજાગ્રસ્ત બન્યા છે. આ અકસ્માતોની ઘટના અમદાવાદ, મહેસાણા, ભરૂચ અને ધ્રોલ-રાજકોટ હાઇવે પર બની છે.

અમદાવાદના ઠક્કરબાપા નગર પાસે હિટ એન્ડ રન
અમદાવાદના ઠક્કરબાપા નગર પાસે અજાણ્યા વાહન ચાલક યુવકને અડફેટે લઈને ફરાર થઈ ગયો હતો. જોકે વાહનની ટક્કર એટલી જોરદાર હતી કે, યુવકનું ગંભીર ઇજાઓને કારણે ઘટના સ્થળે જ કમકમાટીભર્યું મોત નિપજ્યું હતું. આ તરફઆ ટ્રાફિક પોલીસે અકસ્માતમાં ગુન્હો નોંધી અજાણ્યા વાહન ચાલકને લઈને વધુ તપાસ શરૂ કરી છે. 

મહેસાણા-અમદાવાદ હાઇવે પર વૃધ્ધનું મોત 
મહેસાણાથી અમદાવાદ હાઇવે ઉપર હિટ એન્ડ રનની ઘટના સામે આવી છે. વિગતો મુજબ મેવડ ટોલનાકા નજીક હિટ એન્ડ રનની ઘટનામાં 60 વર્ષીય વ્યક્તિને ટક્કર મારી અજાણ્યો વાહન ચાલક ફરાર થઈ ગયો હતી. જોકે ગંભીર રીતે ઇજાગ્રસ્ત 60 વર્ષીય વ્યક્તિનું સારવાર દરમિયાન મૃત્યુ થયું છે. ગઇકાલની ઘટનામાં ઇજાગ્રસ્ત વ્યક્તિનું સારવાર દરમિયાન મૃત્યુ થાય બાદ અજાણ્યા વાહન ચાલક સામે ફરિયાદ નોંધાઇ છે. 

રાજકોટ રિંગ રોડ પર બાઇકસવારનું મોત 
રાજકોટના 150 ફૂટ રીંગ રોડ ઉપર બાઈક સવારને અકસ્માત નડ્યો હોવાનું સામે આવ્યું છે. વિગતો મુજબ રૈયા ટેલિફોન એક્સચેન્જ પાસે બાઈક સવારને અકસ્માત નડતા ઘટના સ્થળે જ કમકમાટીભર્યું મોત થયું છે. પ્રાથમિક વિગતો મુજબ બાઈક સવાર હર્ષ અશ્વિનભાઈ ઠકકર કોર્પોરેશનનાં ખાડામાં બાઈક સાથે પડતાં મોત થયું હોવાનું સામે આવ્યું છે. મૃતક હર્ષ ઠકકર પરિવારનો એકનો એક દીકરો હોઇ પિતાને જાણ થતા પરિવાર પર દુ:ખનો પહાડ તૂટી પડ્યો છે. 

ભરૂચ નર્મદા મૈયા બ્રિજ અકસ્માતમાં યુવતીનું મોત 
આ તરફ ભરૂચ નર્મદા મૈયા બ્રિજ પર બની હિટ એન્ડ રનની ઘટના સામે આવી છે. જેમાં ઈકો કાર ચાલકે એક્ટિવા ચાલક યુવતીને ટક્કર મારી હતી. આ તરફ એક્ટિવા ચાલક યુવતીનું ઘટના સ્થળે જ કરુણ મોત થયું છે. જોકે ઈકો કાર ચાલક અકસ્માત સર્જી ફરાર થયો હોવાના અહેવાલ સામે આવ્યા છે. તો સ્થાનિક પોલીસે મૃતદેહને પોસ્ટમોર્ટમ અર્થે ખસેડી વધુ કાર્યવાહી હાથ ધરી છે. 

ધ્રોલના-રાજકોટ-જામનગર હાઇવે પર થયો અકસ્માત
રાજકોટના ધ્રોલના-રાજકોટ-જામનગર હાઇવે પર અકસ્માતની ઘટના સામે આવી છે.  જેમાં ધ્રોલના જાયવા ગામ નજીક ગત રાત્રીના કારનો અકસ્માત થયો હતો. જેમાં અકસ્માતમાં કારમાં સવાર 2 લોકોના મોત થયા છે. તો બીજી તરફ અન્ય એક વ્યક્તિની હાલત ગંભીર હોઇ તેની સારવાર ચાલી રહી છે. મહત્વનું છે કે, ઘટનાની જાણ થતાં 108 અને પોલીસ કાફલો ઘટના સ્થળે પહોંચ્યો હતો. 

ભરૂચના વાલિયા-અંકલેશ્વર માર્ગ પર બે બાઇકો સળગ્યાં 
ભરૂચના વાલિયા-અંકલેશ્વર માર્ગ અકસ્માતની વધુ એક ઘટના સામે આવી છે. જેમાં ભરૂચના વાલિયા-અંકલેશ્વર માર્ગ પર વટારીયા ગામ પાસે 2 બાઈક વચ્ચે અકસ્માત થયો હતો. જોકે આ અકસ્માતમાં 3 યુવક ગંભીર રીતે ઇજાગ્રસ્ત બન્યા છે. જોકે અકસ્માતની ઘટના બાદ બન્ને બાઈકમાં આગ લાગી હતી. 

ગોંડલમાં જાનૈયાઓને નડ્યો અકસ્માત
ગોંડલની ગુંદાળા ચોકડી પાસે જાનૈયાઓને અકસ્માત નડ્યો હોવાનું સામે આવ્યું છે. વિગતો મુજબ જાન લઈ જતી બસ અને પિકઅપ વાન વચ્ચે અકસ્માત સર્જાતાં બસ દિવાલમાં અથડાઈ હતી. જોકે આ ઘટનામાં જાનૈયાઓનો ચમત્કારિક બચાવ થયો છે. અકસ્માત બાદ બસને ક્રેનની મદદથી બહાર કાઢવામાં આવી હતી. સમગ્ર મામલે પોલીસે વધુ તપાસ હાથ ધરી છે.