દારૂ પીને આખી ટ્રેન માથે લઈ મુસાફરોને પરેશાન કરનારા અમદાવાદના ત્રણ યુવકોની વાપીથી ધરપકડઃ સુરેન્દ્રનગરથી આવતી ટ્રેનમાં બબાલ કરનારા બે યુવકો સામે પણ કાર્યવાહી
ટ્રેનમાં દારૂ પીને ‘ધમાલ’ કરતાં ઇસમો સામે પોલીસ એક્શનમાં
અમદાવાદના ત્રણ દારૂડિયા યુવકોની વાપીથી ધરપકડ
સુરેન્દ્રનગરથી આવતી ટ્રેનમાં બબાલ કરનારા બે યુવકો સામે કાર્યવાહી
ટ્રેનમાં ચોરી, લૂંટ તેમજ મારામારીના સંખ્યાબંધ બનાવો બની રહ્યા છે. જેને રોકવા માટે પોલીસ તેમજ સુરક્ષા એજન્સીઓ એલર્ટ છે તો બીજી તરફ દારૂ તેમજ ગાંજાની હેરફેર પણ ટ્રેનમાં વધી રહી છે. ગુનાખોરીને કંટ્રોલમાં કરવા માટે પોલીસ એક્શન મોડ પર છે ત્યારે હવે દારૂડિયાઓને પણ કંટ્રોલ કરવા માટે પોલીસ મેદાનમાં ઊતરી છે. ટ્રેનમાં દારૂ પીને ધમાલ મચાવી તો પોલીસ સીધી લોકઅપમાં પૂરીને કાર્યવાહી કરશે. ચાલુ ટ્રેનમાં પોલીસ પેટ્રોલિંગ કરીને દારૂડિયાઓને પકડી પાડશે.
ચાલુ ટ્રેનમાં દારૂ પીને ધમાલ મચાવવાના કિસ્સા વધી રહ્યા છે, જેને જોતાં રેલવે પોલીસ હરકતમાં આવી છે. અમદાવાદથી મુંબઇ જતી ટ્રેનમાં દારૂ પીને ધમાલ મચાવવાના કિસ્સા વધી રહ્યા છે. ગઇ કાલે મુંબઇ-હાપા એસી દૂરંતો એક્સપ્રેસ ટ્રેનમાં અમદાવાદના ત્રણ યુવકો દારૂ પીને ધમાલ મચાવતા રંગે હાથ ઝડપાયા છે. ત્રણેય યુવકોએ દારૂ પીને એટલી હદે ધમાલ મચાવી હતી કે જેના કારણે બીજા મુસાફરો પણ હેરાન થયા હતા. આ ટ્રેન વાપી ખાતે સ્ટોપેજ ન હોવા છતાંય ચેઇન પુલિંગ કરીને રોકી દેવાઇ હતી.
વાપી સ્ટેશને ત્રણ દારૂડિયા ઝડપાયા
વાપી સ્ટેશન માસ્ટર દ્વારા પણ આ અંગે દારૂડિયા યુવકોને મેમો આપતાં વાપી પોલીસ હરકતમાં આવી ગઇ હતી. ટ્રેન વાપી રેલવે સ્ટેશન ખાતે ઊભી રહેતાં પોલીસે ત્રણેય શખ્સોની ધરપકડ કરી લીધી હતી. ત્રણેય દારૂડિયા અમદાવાદના રહેવાસી છે, જેમાં એકનું નામ ભરત પટણી છે, જ્યારે બીજાનું નામ પ્રકાશ અને ત્રીજાનું નામ વિજય પટણી છે. ત્રણેય જણા દારૂ ઢીંચીને મુંબઇ જઇ રહ્યા હતા, જ્યાં તેમની ધરપકડ કરી લેવામાં આવી છે. ત્રણેય વિરુદ્ધ પ્રોહિબિશનની વિવિધ કલમો હેઠળ ગુનો દાખલ કરવામાં આવ્યો છે.
સુરેન્દ્રનગરમાં બે દારૂડિયા સામે ફરિયાદ
આ સિવાય સુરેન્દ્ર રેલવે પોલીસ સ્ટેશનમાં પોલીસ કોન્સ્ટેબલ તરીકે ફરજ બજાવતા સુનીલકુમાર રાવલે પણ કાલુપુર રેલવે પોલીસ સ્ટેશનમાં બે દારૂડિયા વિરુદ્ધ ફરિયાદ કરી છે. ગઇ કાલે સૌરાષ્ટ્ર જનતા એક્સપ્રેસ ટ્રેનમાં સુરેન્દ્રનગરથી અમદાવાદ સુધીની ટ્રેનમાં સુનીલકુમાર તેમની ટીમ સાથે પેટ્રોલિંગમાં હતા ત્યારે બે યુવકો ચાલુ ટ્રેનમાં દારૂ પીને ધમાલ મચાવતા હતા. સાણંદથી અમદાવાદના રૂટ પર પ્રદીપ ઠાકોર (રહે. મહારાષ્ટ્ર) અને સૂરજ યાદવ (રહે. ઉત્તરપ્રદેશ) મુસાફરો સાથે માથાકૂટ કરતા હતા. પોલીસ કર્મચારીઓ બંને પાસે ગયા તો તેમને ઊભા રહેવાના પણ હોશ હતા નહીં અને મોઢામાંથી દારૂ પીધો હોવાની દુર્ગંધ મારતી હતી. રેલવે પોલીસે બંને યુવકો વિરુદ્ધ ગુનો દાખલ કરીને તપાસ શરૂ કરી છે.
દારૂડીયા-નશેડીઓ ગુનાખોરીને અંજામ આપતા હોવાનો ખુલાસો
પોલીસસૂત્રોના જણાવ્યા અનુસાર રેલવે પોલીસે અત્યાર સુધી જે આરોપીઓની ચોરી, લૂંટ તેમજ ચેઇન સ્નેચિંગની ઘટનાઓમાં ધરપકડ કરી છે તે દારૂડિયા તેમજ નશેડી હોવાનું સામે આવ્યું છે. ગુનેગારો દારૂ પીને તેમજ નશો કરીને ટ્રેનમાં મુસાફરી કરે છે. ત્યાર બાદ પેસેન્જરોના કીમતી સરસામાનની ચોરી કરે છે. પોલીસના એક્શન પ્લાન મુજબ જો ચાલુ ટ્રેનમાં દારૂડિયાઓને ઝડપી પાડવામાં આવે તો ચોરી, લૂંટની ઘટનાઓ બનતી અટકી શકે છે. પોલીસે ચાલુ ટ્રેનમાં સતત પેટ્રોલિંગ શરૂ કરી દીધું છે અને શંકાસ્પદ લાગતા લોકોએ દારૂ પીધો છે કે નહીં તે માટે તેમનું મોઢું સૂંઘી તેમજ બ્રેથ એનેલાઇઝરથી ચેક કરી રહ્યા છે. અમદાવાદથી જતી તમામ ટ્રેનોમાં પોલીસે પેટ્રોલિંગ વધારી દીધું છે.