લોન / દેશનાં કરોડો લોન ગ્રાહકોને લાગ્યો ઝટકો, આ બેંકે વધાર્યાં વ્યાજદરો

• SBIનાં MCLR રેટમાં થયો વધારો
• રેટ્સમાં 10-15 બેસિસ પોઇન્ટ્સની વૃદ્ધિ 
• ગ્રાહકોને હવે લોનનું વ્યાજ વધુ ચૂકવવું પડશે

જો તમે SBI સ્ટેટ બેંક ઓફ ઇન્ડિયાનાં ગ્રાહક છો તો તમારા માટે આ અગત્યનાં સમાચાર છે. એસબીઆઇએ મંગળવારે  MCLR વધારેલ છે. જે લોકોની MCLR પર આધારિત લોન ચાલી રહી છે તેનું વ્યાજ હવે મોંઘુ થયું છે. સ્ટેટ બેંકનાં માર્જિનલ કોસ્ટ ઓફ ફંડ્સ બેસ્ડ લેન્ડિંગ રેટ્સમાં 10-15 બેસિસ પોઇન્ટ્સની વૃદ્ધિ કરવામાં આવી છે. આ નવા દરો 15 નવેમ્બરથી લાગૂ થયાં છે. MCLR એ કોઇપણ બેંકનો ન્યૂનતમ રેટ હોય છે જેના પર ગ્રાહકોને લોન આપવામાં આવે છે. 

સ્ટેટ બેંકનાં MCLR દરોમાં થયાં ફેરફાર
SBIએ આપેલ માહિતી અનુસાર એક મહિના અને 3 મહિનાનાં MCLRને 7.60 % જેટલું વધારીને 7.75% કરવામાં આવ્યું છે. આવી જ રીતે 6 મહિનાનાં MCLRને 7.90 થી વધારીને 8.05% અને 1 વર્ષનાં MCLRને 7.95%થી વધારીને 8.05% કરવામાં આવ્યું છે. તો 2 વર્ષનાં MCLR 8.15%થી વધારીને 8.25% કરવામાં આવેલ છે. 

રેટમાં થયો વધારો
એમસીએલઆર વધવાને લીધે લોન પણ મોંઘી થઇ છે. જે લોકોની લોન MCLR પર આધારિત છે તેમને પહેલાંથી વધુ ઇએમઆઇ ભરવી પડશે. આ સાથે જ નવી લોન પર પણ વધુ વ્યાજ ચૂકવવું પડશે. રેપો રેટમાં થયેલા વધારા બાદ લેન્ડિંગ રેટમાં પણ વૃદ્ધિ જોવા મળી રહી છે. રિઝર્વ બેંક રેપો રેટમાં 4 વખત વૃદ્ધિ કરી ચૂકી છે અને તેમાં 1.90%નો વધારો પણ નોંધાવવામાં આવ્યો છે. આ મોંઘવારીને નિયંત્રિત કરવા માટે રિઝર્વ બેંક રેપો રેટમાં વધારો કરે છે. વધી રહેલી મોંઘવારીને જોતા સંભવત: રિઝર્વ બેંક ડિસેમ્બરમાં રેપોરેટ ફરી એકવાર મોંઘુ થઇ શકે છે. 

શું છે MCLR?
MCLRની શરૂઆત 2016માં રિઝર્વ બેંકે કરી હતી. એમસીએલઆરનાં આધાર પર જ અલગ- અલગ લોનનાં વ્યાજદર નક્કી થાય છે. આ ન્યૂનતમ દર હોય છે. આ દરની નીચેનાં રેટ પર બેંક લોન આપી શકતી નથી. આ ન્યૂનતમ દરમાં વધારો થતાં જ લોનનાં વ્યાજદરોમાં પણ વધારો થાય છે જેના લીધે વધુ ઇએમઆઇ ચૂકવવી પડે છે.