પેપર લીક કાંડ / સૌરાષ્ટ્ર યુનિવર્સિટીમાં પેપર કાંડ બાદ હલચલ: કાયમી નિમણૂંક થયાના 4 મહિનામાં જ પરીક્ષા નિયામકે રાજીનામું આપતા તર્ક-વિતર્ક

• સૌરાષ્ટ્ર યુનિવર્સિટીમાં પેપર કાંડ બાદ હલચલ
• પરીક્ષા નિયામક નિલેશ સોનીનું એકાએક રાજીનામું
• કુલપતિની રાહ જોયા બાદ આપ્યું રાજીનામું

સૌરાષ્ટ્ર યુનિવર્સિટીમાં પેપર કાંડ ઝડપાયા બાદ હવે પરીક્ષા નિયામક નિલેશ સોનીએ એકાએક રાજીનામું આપી દીધું છે. કાયમી પરીક્ષા નિયામક તરીકે નિયુક્ત થયાના માત્ર 4 જ માસમાં નિલેશ સોનીએ પરીક્ષા નિયામકપદેથી રાજીનામું ધરી દીધું છે. પેપર લીક કાંડ બાદ પરીક્ષા નિયામકના રાજીનામાથી અનેક તર્ક વિતર્ક સર્જાયા છે. પ્રકરણમાં કોલેજનું નામ જાહેર થાય એ પહેલાં જ રાજીનામાથી ચારે બાજુ ચર્ચાનો માહોલ જામ્યો છે. કુલપતિ ગિરીશ ભીમાણીની રાહ જોયા બાદ તેઓ ગેરહાજર હોવાથી તેઓએ મહેકમ વિભાગમાં રાજીનામું આપતા અનેક ચર્ચાઓ ઉઠી છે.

યુનિવર્સિટીમાં શિક્ષણકાર્યને સજ્જડ બ્રેક લાગી હોય તેવો માહોલ

રાજકીય અખાડો બની ગયેલી સૌરાષ્ટ્ર યુનિવર્સિટીમાં હાલ સંશોધન અને શિક્ષણકાર્યને સજ્જડ બ્રેક લાગી હોય તેવો માહોલ ઉભો થયો છે. કુલપતિ ગિરીશ ભીમાણીના અત્યંત નજીકના ગણાતા પરીક્ષા નિયામક નિલેશભાઈ સોનીને કુલપતિએ તેમની બાજુમાં જ તેમના જેવડી જ આલીશાન ચેમ્બર આપી હતી. તેમજ અનેક પરીક્ષાલક્ષી કાર્યો નિલેશભાઈ સોની સુપેરે સંભાળતા હતા. પરંતુ કોઈ લેખિત આદેશ વગર મૌખિક જ ચાલતું હોવાની વ્યાપક ચર્ચા ચાલી રહી છે.

પ્રકરણમાં કોલેજનું નામ જાહેર થાય એ પહેલાં રાજીનામાથી ચર્ચા

યુનિવર્સિટીના અનેક અધિકારીઓ અને કર્મચારીઓએ તો મહત્વની જવાબદારી સંભાળવાની વાત આવે ત્યારે રજા ઉપર ઉતરી જતા હોય છે. આ સંજોગોમાં કુલપતિના નજીકના અધિકારી નિલેશ સોની અને નાયબ કુલસચિવ જી.કે. જોષી મહત્વની જવાબદારી સંભાળતા હતા. તેમાં પેપર લીક કાંડ બાદ ઉભી થયેલી પરિસ્થિતિ અને સતત વિવાદમાં રહેવાને કારણે રાજકીય દાવ લેવાની સિસ્ટમથી કંટાળીને નિલેશ સોનીએ રાજીનામું આપ્યું હોવાની ચર્ચા ચાલે છે. પ્રકરણમાં કોલેજનું નામ જાહેર થાય એ પહેલા નિલેશ સોનીના એકાએક રાજીનામાથી ભારે ચર્ચા જાગી છે.