ભારતપ્રવાસ / આવતા મહિને ભારત આવશે સાઉદી ક્રાઉન પ્રિન્સ સલમાન, જાણો કેમ ખૂબ ખાસ છે આ મુલાકાત

• PM મોદીએ મહોમ્મદ સલમાનને આપ્યું નિમંત્રણ 
• સાઉદી ક્રાઉન બિન સલમાન પધારશે ભારત
• નવેમ્બર મહિનામાં લેશે મુલાકાત

સાઉદી ક્રાઉન પ્રિન્સ અને પ્રધાનમંત્રી મોહમ્મદ બિન સલમાન આવતાં મહિને એટલે તે નવેમ્બર મહિનામાં ભારતનાં પ્રવાસે આવશે અને પ્રધાનમંત્રી મોદી સાથે મુલાકાત લેશે.  રિપોર્ટ અનુસાર પીએમ મોદીએ સપ્ટેમ્બર મહિનામાં વિદેશમંત્રી એસ જયશંકર થકી સાઉદી પ્રિન્સને આમંત્રણ મોકલ્યું હતું. જેનો સ્વીકાર કરીને તેઓ ભારત પધારવાનાં છે.

14 નવેમ્બરનાં પહોંચશે ભારત
સાઉદી ક્રાઉન પ્રિન્સ 14 નવેમ્બરના સવારે ભારત પહોંચશે અને ભારતના વડાપ્રધાનની મુલાકાત લેશે. પ્રિન્સ ભારત માત્ર એક દિવસના પ્રવાસે આવી રહ્યાં છે. બીજા જ દિવસે મહોમ્મદ બિન સલમાન ઇન્ડોનેશિયાનાં બાલીમાં થનારી જી20 શિખર સમ્મેલનમાં શામેલ થવા રવાના થશે. 

સાઉદી અરબના ઊર્જામંત્રી પણ આવ્યાં હતા ભારત
સાઉદી અરબનાં ઊર્જામંત્રી અબ્દુલ અઝીઝ બિન સલમાન ભારતનાં પ્રવાસે ગયાં અઠવાડિયે જ આવ્યાં હતાં. તેમની આ યાત્રા ઓપેક+ સંગઠન તરફથી તેલ ઉત્પાદનમાં થતી તંગીના નિર્ણય બાદ થઇ હતી. તેમણે ભારતનાં વાણિજ્ય અને ઉદ્યોગમંત્રી પીયૂષ ગોયલ, તેલમંત્રી હરદીપસિંહ પુરી અને વીજમંત્રી આરકે સિંહ સાથે મુલાકાત લીધી હતી. 

ગયાં મહિને જ પ્રધાનમંત્રી બન્યાં મહોમ્મદ બિન સલમાન
સાઉદી શાસક કિંગ સલમાન બિન અબ્દુલ અઝીઝએ 27 સપ્ટેમ્બરનાં ક્રાઉન પ્રિન્સ મહોમ્મદ બિન સલમાનને પ્રધાનમંત્રી તરીકે નિયુક્ત કર્યો. તેની સાથે જ પોતાના બીજા દિકરા પ્રિન્સ ખાલીદને રક્ષામંત્રી અને ત્રીજા દિકરા અબ્દુલ અઝીઝ બિન સલમાનને ઊર્જામંત્રીના પદ માટે નિયુક્ત કર્યાં હતાં.