સંકલ્પ / દારૂના અડ્ડા વિરુદ્ધ લડી લેવાના મૂડમાં ગુજરાતના આ ગામના સરપંચ, ગામમાં હવે નહીં વેચવા દેવાય દારું

• રોજીદ ગામના સરપંચનો સંકલ્પ
• હવે ગામમાં નહી વેચાવા દે દારૂ
• દારૂના અડ્ડા વિરુદ્ધ લડી લેવાના મૂડમાં

બોટાદના બરવાળા તાલુકાના લઠ્ઠાકાંડે સમગ્ર ગુજરાતને હચમચાવી દીધુ છે. 38 જેટલા મૃત્યુથી ભલભલાની આંખમાં આંસુ લાવી દે તેવા હતા. ત્યારે હવે રોજિદ ગામના સરપંચે પણ સંકલ્પ કર્યો છે કે તે ક્યારેય પણ ગામમાં દારૂ વેચાવા નહીં દે. જ્યારે રોજિદ ગામમાં 9 લોકોની અરથી નીકળી ત્યારે ગામના સરપંચના પણ રૂવાડા ઉભા થઈ ગયા હતા. ગામમાં ચાલી રહેલા દેશી દારૂની ભઠ્ઠીઓ બંધ કરવા તેમજ રોજિદ સહિત સમગ્ર બરવાળા તાલુકામાં દેશી દારૂ વેચનારા વિરુદ્ધ એક્શન લેવાની માગ કરી હતી.     

બરવાડા તાલુકામાં દારૂનો કોઈ કેસ જ લેતા નથી
ખુદ રોજીદ ગામના સરપંચ જીગર ડુંગરાણી પોલીસ પર આક્ષેપ કરી રહ્યા છે. સરપંચે કહ્યું કે 3 મહિના પહેલા અરજી કરી હતી. જે મામલે પોલીસ ગામમાં આંટા મારવા આવે અને કાર્યવાહી કરવાના બદલે રાઉન્ડ મારીને જતી રહે છે. બરવાડા તાલુકામાં દારૂનો કોઈ કેસ જ લેતા નથી. છતાં બેફામ દારૂ વેચાતો હોવાની ફરિયાદો ઉઠે છે.  
 
મારા ગામમાં ક્યાંય દેશી દારૂ નહીં વેચાવા દઉં : સરપંચ
સરપંચ સીધે સીધો પોલીસ પર આક્ષેપ કરી રહ્યા છે કે પોલીસ દારૂ બનાવનારા બુટલેગરોને છાવરી રહી છે. જેના કારણે આ સ્થિતિનું નિર્માણ થયું છે. સરપંચના મતે વર્ષોથી ગામમાં દેશી દારૂ વેચાય છે. જે અંગે રજૂઆત પણ કરી છે જોકે કોઈ કાર્યવાહી નથી થઈ. જોકે હવે સરપંચે પણ સંકલ્પ કર્યો છે કે મારા ગામમાં ક્યાંય દેશી દારૂ નહીં વેચાવા દઉં અને જો કોઈ દારૂના નશામાં પકડાશે તો હું હાઈ લેવલ સુધી ફરિયાદ કરીશ.