ભારતને વર્લ્ડ ચેમ્પિયન બનાવનાર કેપ્ટન મહેન્દ્રસિંહ ધોનીએ રવિવારે આંતરરાષ્ટ્રીય કારકિર્દીને અલવિદા કહી દીધું હતું. ધોનીએ સોશ્યલ મીડિયા પર નિવૃત્તિ જાહેર કરી હતી. ધોનીના આ મહત્વપૂર્ણ નિર્ણય બાદ તેની પત્ની સાક્ષી ધોનીએ સોશ્યલ મીડિયા પર એક તસવીર શૅર કરતાં કહ્યું કે આ ક્ષણ ધોની માટે ખૂબ ભાવનાત્મક છે. ધોનીએ છેલ્લી મેચ 2019 વર્લ્ડ કપમાં રમી હતી. ન્યુઝીલેન્ડ સામેની સેમિફાઇનલ બાદથી ધોની કોઈ આંતરરાષ્ટ્રીય મેચ રમ્યો નથી.
સાક્ષી ધોની થઇ ઇમોશનલ
પતિ મહેન્દ્ર માટે કરી ભાવૂક પોસ્ટ
ધોનીએ લીધો આંતરરાષ્ટ્રીય ક્રિકેટમાંથી સન્યાસ
સાક્ષીએ ઈન્સ્ટાગ્રામ પર ધોનીની એક તસવીર શેર કરી હતી, જે લોકડાઉન સમયની છે. તસવીરમાં ધોની ડૂબતા સૂર્યને જોઇ રહ્યો છે. સાક્ષીએ કેપ્શનમાં લખ્યું કે, 'તમે જે કંઇ પ્રાપ્ત કર્યું છે, તેનો તમાને ગર્વ થવો જોઈએ. રમતને તમારું શ્રેષ્ઠ આપવા બદલ અભિનંદન. મને તમારી સિદ્ધિઓ પર ગર્વ છે. મને ખાતરી છે કે તમે તમારા આંસુને રોકી રાખ્યા હશે.
ધોનીની નિવૃત્તિ અંગે અનેક વખત અફવા ફેલાઈ હતી, દર વખતે સાક્ષી આગળ આવીને તેના પર સ્પષ્ટતા આપતી હતી. લૉકડાઉન દરમિયાન પણ #dhoniretire ટ્વિટર પર ટ્રેન્ડ કરતું હતું. ત્યારબાદ સાક્ષીએ તેને અફવા ગણાવી ટ્વીટ કરી હતી.
સાક્ષી અને ધોનીએ વર્ષ 2010 માં લગ્ન કર્યા હતા અને બંને વર્ષ 2015 માં પુત્રીના પિતા બન્યા હતા. અગાઉ, જ્યારે ધોનીએ આ તસવીર ઇન્સ્ટાગ્રામ પર શેર કરી હતી, ત્યારે સાક્ષીએ તેમના પર હાર્ટ ઇમોજી પણ પોસ્ટ કર્યુ હતુ. ધોની ટીમ ઈન્ડિયાના સૌથી સફળ કેપ્ટન છે. તે વિશ્વનો એકમાત્ર કેપ્ટન છે જેણે ટીમને તેની કેપ્ટનશીપ હેઠળ આઈસીસીની ત્રણ ટ્રોફી આપી છે. ધોનીની કેપ્ટનશીપ હેઠળ ભારતે 2007 નું ટી 20 વર્લ્ડ કપ, 2011 વર્લ્ડ કપ અને 2013 ચેમ્પિયન્સ ટ્રોફી ખિતાબ જીત્યા છે.