BIG NEWS / યુદ્ધનું મૂળ કારણ જ સમાપ્ત: NATOના દગા બાદ ઝેલેન્સ્કીએ કર્યું મોટું એલાન, શું હવે શાંત થશે રશિયા?

• NATO વિશે ઝેલેન્સ્કીનું મોટું નિવેદન
• બે અલગાવવાદી વિસ્તારો પર કરાર માટે પણ તૈયાર
• કહ્યું- યુક્રેન હવે NATOમાં સામેલ થવાનો આગ્રહ નથી કરી રહ્યું

યુક્રેનના રાષ્ટ્રપતિ વોલોદીમિર ઝેલેન્સ્કીએ કહ્યું કે, 'યુક્રેન માટે NATO સદસ્યતાની માંગને લઇને હવે તેઓ જોર નથી આપી રહ્યાં. રાષ્ટ્રપતિએ તેને સંવેદનશીલ મામલો ગણાવતા કહ્યું કે, રશિયન હુમલાનું એક કારણ આ પણ છે. સોમવારે રાત્રે એક ન્યુઝ ચેનલને આપેલા ઇન્ટરવ્યુમાં ઝેલેન્સ્કીએ જણાવ્યું કે, "NATO તરફથી યુક્રેનને સ્વીકાર કરવામાં અસહમતિના સંકેત મળ્યા બાદ મે આ બાબત પર ઘણા સમય પહેલેથી જ વિચારવાનું છોડી દીધું હતું.'

જો અમે આ સમયે નાટોમાં સામેલ થવા માટે અરજી કરીએ છીએ તો ચિંતાઓમાં થશે વધારો

રાષ્ટ્રપતિ ઝેલેન્સ્કીએ 'હાઉસ ઓફ કોમન્સ'માં બ્રિટિશ સાંસદોને સંબોધિત કરતા કહ્યું કે, 'યુક્રેનીઓ પોતાનો દેશ નથી ગુમાવવા માંગતા. તેમણે કહ્યું કે, જે રીતે નાઝીઓના હુમલા દરમિયાન અંગ્રેજો પોતાનો દેશ ગુમાવવા ન હોતા માંગતા એ જ રીતે અમે પણ અમારો દેશ ગુમાવવા નથી માંગતા. અગાઉ, સ્વીડનના વડાપ્રધાન મૈગ્લડાલેના એન્ડરસને કહ્યું હતું કે, આ સમયે નાટોની સભ્યપદ માટે અરજી કરવાથી યુરોપમાં વર્તમાન સુરક્ષા સ્થિતિ અસ્થિર થઈ શકે છે. તેઓએ કહ્યું કે, જો અમે આ સમયે નાટોમાં સામેલ થવા માટે અરજી કરીએ છીએ તો આ ક્ષેત્રમાં સુરક્ષા સંબંધિત અસ્થિરતા વધશે અને તેનાથી ચિંતાઓમાં પણ વધારો થશે.

તમને જણાવી દઇએ કે, યુક્રેનમાં 'No fly Zone'ને લાગુ કરવાને લઇને NATO એ ના કહી દીધી છે જેની પર ઝેલેન્સ્કી ભડકી ગયા. તેઓએ NATOના આ નિર્ણયની નિંદા કરતા કહ્યું કે, 'હવે રશિયાને યુક્રેનના શહેરો અને ગામડાંઓ પર બોમ્બમારો વરસાવવાની પરવાનગી મળી ગઇ છે.' ઝેલેન્સ્કીએ એમ પણ કહ્યું કે, 'NATO એ વાતથી અવગત છે કે, રશિયા હવે વધારે હુમલા કરશે. તેમ છતાં તેને જાણી જોઇને આ પ્રકારનો નિર્ણય લીધો છે.'

ઝેલેન્સકીએ કહ્યું કે, જો NATO ના આ નિર્ણય બાદ યુક્રેન નહીં બચે તો સમગ્ર યુરોપ પણ બરબાદ થઈ જશે. તમને જણાવી દઈએ કે, હવે યુક્રેનની રાજધાની કીવ સહિત ઘણાં શહેરોને રશિયન સૈન્યએ ઘેરી લીધા છે.