- બેલારુસમાં રશિયા અને યુક્રેન વચ્ચે શાંતિ મંત્રણા શરુ
- બન્ને દેશના પ્રતિનિધિમંડળ બેલારુસની રાજધાની પહોંચ્યાં
- મંત્રણા પહેલા યુક્રેની રાષ્ટ્રપતિ ઝેલેન્સ્કીની રશિયાને મોટી ચેતવણી
રશિયા અને યુક્રેન વચ્ચે યુદ્ધનો અંત આવશે કે નહીં તે અંગે હજુ નિર્ણય લેવાયો નથી. બેલારુસમાં રશિયા-યુક્રેન વચ્ચેની ઐતિહાસિક વાટાઘાટો પૂરી થઈ ગઈ છે. આ બેઠક કુલ સાડા ત્રણ કલાક ચાલી હતી. આ વાતચીતમાં યુક્રેને માગણી કરી છે કે ક્રિમિયા અને ડોનબાસ સહિત સમગ્ર દેશમાંથી રશિયા પોતાના સૈનિકોને પાછા બોલાવી લે.
તાત્કાલિક યુદ્ધવિરામ અને રશિયન સૈનિકોની પીછેહઠ-યુક્રેનની માગ
યુક્રેનની રાષ્ટ્રપતિ કાર્યાલયે અગાઉ કહ્યું હતું કે રશિયા સાથેની વાટાઘાટોનું તેમનું મુખ્ય લક્ષ્ય તાત્કાલિક યુદ્ધવિરામ અને રશિયન સૈનિકોની પીછેહઠ છે. બન્ને દેશોના પ્રતિનિધિમંડળ સોમવારે બપોરે 3.30 કલાકે બેલારુસના હેમુલ ખાતે પહોંચ્યાં હતા અને ત્યાં મંત્રણા શરુ કરી દીધી હતી. બન્ને દેશો પોતપોતાની શરતે યુદ્ધવિરામ કરવા માગે છે. એક બાજુ રશિયા યુક્રેન પાસેથી કરાર કરવા માગે છે તો યુક્રેને રશિયાને તાત્કાલિક ધોરણે દેશમાંથી લશ્કર પાછું ખસેડવાનું જણાવ્યું છે.
મંત્રણા પહેલા રાષ્ટ્રપતિ ઝેલેન્સ્કીએ કહ્યું-સરેન્ડર તો કદી નહીં કરીએ
મંત્રણા શરુ થતા પહેલા યુક્રેની રાષ્ટ્રપતિ ઝેલેન્સ્કીએ મોટી જાહેરાત કરતા જણાવ્યું કે અમારો ઈરાદો સરેન્ડર કરવાનો નથી. આ વિવાદનો ઉકેલ વાતચીત દ્વારા થઈ શકે તેમ નથી. 44 વર્ષીય નેતાએ વીડિયો સંદેશમાં કહ્યું કે યુરોપિયન યુનિયને તાત્કાલિક યુક્રેનને સભ્યપદ આપવું જોઈએ. તેમણે કહ્યું કે અમારુ લક્ષ્ય એ છે કે અમે તમામ યુરોપીયન લોકોની સાથે છીએ. તેમની સાથે બરાબરીના હકદાર છીએ. મને ભરોસો છે કે આ બેહતર થશે અને સંભવ છે.
ઝેલેન્સ્કીએ રશિયન સૈનિકોને કહ્યું જીવ બચાવીને ભાગો
ઝેલેન્સ્કીએ રશિયન સૈનિકોને આકરી ચેતવણી આપતા કહ્યું કે તમારો જીવ બચાવીને ભાગો. તેમણે રશિયન સૈનિકોને કહ્યું કે તમારા હથિયારો હેઠા મૂકો અને બહાર નીકળી જાવ. તમારા કમાન્ડરો પર વિશ્વાસ ન કરો, તમારો જીવ બચાવો. ઝેલેન્સ્કીએ દાવો કર્યો કે યુક્રેનની જવાબી કાર્યવાહીમાં રશિયાના 4500 સૈનિકો માર્યા ગયા છે અને મોટા પાયે હથિયારોને તબાહ કરી દેવાયા છે.
