મંદી / ડોલર સામે તળિયાઝાટક રૂપિયો, ગબડીને સૌથી નિમ્ન સ્તરે પહોંચ્યો, ફેડરલ રિઝર્વનાં નિર્ણય બાદ ભારતીય માર્કેટમા અફરાતફરી

અમેરિકન ફેડરલ રિઝર્વના વ્યાજ દરમાં વધારો કર્યા બાદ આજે ડોલર સામે રૂપિયો નબળો પડ્યો છે. 

રૂપિયો અત્યાર સુધીની સૌથી નીચી સપાટીએ પહોંચી ગયો છે. ગુરુવારે તે યુએસ ડૉલરના મુકાબલે 80.28 રૂપિયા પર ખુલ્યો હતો. આ પહેલા બુધવારે રૂપિયો 79.98 ના સ્તર પર બંધ થયો હતો. બુધવારે રૂપિયો તેની સૌથી નીચી સપાટી 80.45 પર પહોંચ્યો હતો. બીજી તરફ ડોલરમાં છેલ્લા 20 વર્ષમાં સૌથી મોટો ઉછાળો જોવા મળ્યો છે.

Rupee hits fresh record low, opens at 80.28/$ vs Wednesday’s close of 79.98/$. Touched the lowest level of 80.45/$.

Dollar climbs to a 20-year peak. https://t.co/YStdvDsw9v

— ANI (@ANI) September 22, 2022

ડોલર સામે રૂપિયો ગબડે ત્યારે દેખીતી રીતે ભારતીય માર્કેટ પર એની મોટી અસર જોવા મળતી હોય છે. કોરોના મહામારી અને રશિયા-યુક્રેન યુદ્ધને કારણે સમગ્ર વિશ્વની અર્થવ્યવસ્થા ખૂબ જ મુશ્કેલ સમયમાંથી પસાર થઈ રહી છે. ભારત સહિત સમગ્ર વિશ્વમાં મોંઘવારી વધી રહી છે. વિશ્વની મહાસત્તા અમેરિકા પર પણ તેની ખૂબ જ ખરાબ અસર પડી છે.

2008ની મંદી પછી સૌથી ખરાબ મંદી 

અમેરિકામાં છેલ્લા વર્ષોનો મોંઘવારીનો રેકોર્ડ તૂટી ગયો છે અને તેની સામાન્ય લોકોના જીવન પર ખૂબ જ ખરાબ અસર પડી છે. આવી સ્થિતિમાં દેશના મોંઘવારી દરને અંકુશમાં રાખવા માટે યુએસ ફેડરલ રિઝર્વે મોટો નિર્ણય લઈને તેના વ્યાજદરમાં વધારો કરવાનો નિર્ણય લીધો છે. ફેડરલ રિઝર્વે વ્યાજ દરોમાં 75 બેઝીસ પોઇન્ટ્સનો વધારો કર્યો છે. જે હવે 3 થી 3.25% ની વચ્ચે પહોંચી ગયો છે. નોંધનીય છે કે વ્યાજ દર 2008ની મંદી પછી અત્યાર સુધીનો સૌથી વધુ છે.

લોન મોંઘી થશે
આ બાબતે માહિતી આપતાં જેરોમ પોવેલે કહ્યું કે ફેડરલ રિઝર્વ દેશમાં વધતી જતી મોંઘવારી પર અંકુશ મેળવવા માટે દરેક જરૂરી પગલાં લઈ રહ્યું છે. આ સાથે તેમણે કહ્યું કે, બેંક ભવિષ્યમાં પણ ફુગાવાને કાબૂમાં લેવા માટે આવા પગલાં લેવાનું ચાલુ રાખશે. ઘણા નિષ્ણાતો માને છે કે ફેડરલ બેંક આ વર્ષના અંત સુધીમાં તેના વ્યાજ દરો વધારીને 4.40% અને આવતા વર્ષ સુધીમાં 4.60% કરી શકે છે. તેનાથી બજારમાં વસ્તુઓની માંગ ઘટશે અને ફુગાવાને કાબૂમાં રાખવામાં મદદ મળશે. આ સાથે જ આ નિર્ણયને કારણે દેવું પણ મોંઘુ થશે અને તેનાથી અમેરિકી અર્થવ્યવસ્થા પર વધુ દબાણ વધશે. વ્યાજદરમાં વધારાથી દેશમાં બેરોજગારી પણ વધી શકે છે.

ફેડરલ રિઝર્વ બેંકે ત્રીજી વખત વ્યાજ દરમાં વધારો કર્યો 
યુએસ ફેડરલ રિઝર્વ દેશમાં વધતી જતી મોંઘવારીને અંકુશમાં લેવા માટે તેના વ્યાજ દરોમાં સતત વધારો કરી રહ્યું છે. બેંકે સતત ત્રીજી વખત તેના વ્યાજ દરોમાં વધારો કર્યો છે અને હવે તે 3.00% થી વધીને 3.25% પર પહોંચી ગયો છે. તમને જણાવી દઈએ કે હાલ અમેરિકામાં મોંઘવારીથી જનતાની હાલત ખૂબ જ ખરાબ છે. મોંઘવારીએ છેલ્લા 40 વર્ષનો રેકોર્ડ તોડી નાખ્યો છે. આ કારણે બિડેન વહીવટીતંત્ર સતત દબાણમાં છે.

યુએસ અર્થતંત્ર માત્ર 0.2% વધશે
ફેડરલ રિઝર્વના અધિકારીઓનો અંદાજ છે કે આ નિર્ણયની યુએસ અર્થવ્યવસ્થા પર ખરાબ અસર થવાની છે અને તે આ વર્ષે માત્ર 0.2 ટકા વૃદ્ધિ પામશે. અગાઉ નિષ્ણાતોએ આશા વ્યક્ત કરી હતી કે અમેરિકી અર્થવ્યવસ્થા 1.7 ટકાના દરે વૃદ્ધિ પામશે, પરંતુ ફેડરલ બેન્કના વ્યાજદરમાં વધારાની અસર આગામી થોડા દિવસોમાં જોવા મળશે. દેશમાં નોકરીઓમાં ઘટાડાની સાથે સાથે બેરોજગારી પણ વધશે. આ કારણે આવતા વર્ષ સુધીમાં મંદી પણ આવી શકે છે.